তর্কসংগ্রহ ১ \ নিধায হৃদি বিশ্বেশং বিধায গুরুবন্দনম্। বালানাং সুখবোধায ক্রিযতে তর্কসংগ্রহঃ॥ ২ \ দ্রব্যগুণকর্মসামান্যবিশেষসমবাযাভাবাঃ সপ্ত পদার্থাঃ॥ ৩ \ তত্র দ্রব্যাণি পৃথিব্যপ্তেজোবায্বাকাশকালদিগাত্মমনাংসি নবৈব॥ ৪ \ রূপরসগন্ধস্পর্শসংখ্যাপরিমাণপৃথক্ত্বসংযোগবিভাগপরত্বাপরত্বগুরুত্বদ্রবত্ব- স্নেহশব্দবুদ্ধিসুখদুঃখেচ্ছাদ্বেষপ্রযত্নধর্মাধর্মসংস্কারাশ্চতুর্বিংশতি গুণাঃ॥ ৫ \ উত্ক্ষেপণাবক্ষেপণাকুঞ্চনপ্রসারণগমনানি পঞ্চ কর্মাণি॥ ৬ \ পরম্ অপরং চেতি দ্বিবিধং সামান্যম্॥ ৭ \ নিত্যদ্রব্যবৃত্তযো বিশেষাস্ ত্ব্ অনন্তা এব॥ ৮ \ সমবাযস্ ত্ব্ এক এব॥ ৯ \ অভাবশ্ চতুর্বিধঃ। প্রাগভাবঃ প্রধ্বংসাভাবো ঽত্যন্তাভাবো ঽন্যোন্যাভাবশ্ চেতি॥ ১০ \ গন্ধবতী পৃথিবী। সা দ্বিবিধা নিত্যানিত্যা চ। নিত্যা পরমাণুরূপা। অনিত্যা কার্যরূপা। পুনস্ ত্রিবিধা শরীরেন্দ্রিযবিষযভেদাত্। শরীরম্ অস্মদাদীনাম্। ইন্দ্রিযং গন্ধগ্রাহকং ঘ্রাণং নাসাগ্রবর্তি। বিষযো মৃত্পাষাণাদিঃ॥ ১১ \ শিতস্পর্শবত্য আপঃ। তা দ্বিবিধাঃ নিত্যা অনিত্যাশ্ চ। নিত্যা পরমাণুরূপাঃ। অনিত্যাঃ কার্যরূপাঃ.। পুনস্ বিধাঃ. শরীরেন্দ্রিযবিষযভেদাত্। শরীরং বরুণলোকে। ইন্দ্রিযং রসগ্রাহকং রসনং জিহ্বাগ্রবর্তি। বিষযঃ সরিত্সমুদ্রাদিঃ॥ ১২ \ উষ্ণস্পর্শবত্ তেজঃ। তদ্ দ্বিবিধং নিত্যম্ অনিত্যং চ। নিয্যং পরমাণুরূপম্। অনিত্যং কার্যরূপম্। পুনস্ ত্রিবিধং শরীরেন্দ্রিযবিষযভেদাত্। শরীরম্ আদিত্যলোকে। ইন্দ্রিযং রূপগ্রাহকং চক্ষুঃ কৃষ্ণতারাগ্রবর্তি। বিষযশ্ চতুর্বিধঃ। ভৌমদিব্যৌদর্যাকরজভেদাত্। ভৌমং বহ্ন্যাদিকম্। অবিন্ধনং দিব্যং বিদ্যুদাদি। ভুক্তস্য পরিণামহেতুর্ ঔদর্যম্. আকরজং সুবর্ণাদি॥ ১৩ \ রূপরহিতস্পর্শবান্ বাযুঃ। স দ্বিবিধো নিত্যো ঽনিত্যশ্ চ। নিত্যঃ পরমাণুরূপঃ। অনিত্যঃ কার্যরূপঃ। পুনস্ ত্রিবিধঃ শরীরেন্দ্রিযবিষযভেদাত্। শরীরং বাযুলোকে। ইন্দ্রিযং স্পর্শগ্রাহকং ত্বক্সর্বশরীরবর্তি। বিষযো বৃক্ষাদিকম্পনহেতুঃ॥ শরীরান্তঃসংচারী বাযুঃ প্রাণঃ। স চৈকো ঽপ্য্ উপাধিভেদাত্ প্রাণাপানাদিসংজ্ঞা লভতে॥ ১৪ \ শব্দগুণম্ আকাশম্। তচ্ চৈকং বিভু নিত্যং চ॥ ১৫ \ অতীতাদিব্যবহারহেতুঃ কালঃ। স চৈকো বিভুর্ নিত্যশ্ চ॥ ১৬ \ প্রাচ্যাদিব্যবহারহেতুর্ দিক্। সা চৈকা বিভ্বী নিত্যা চ॥ ১৭ \ জ্ঞানাধিকরণম্ আত্মা। স দ্বিবিধঃ পরমাত্মা জীবাত্মা চ। তত্রেশ্বরঃ সর্বজ্ঞঃ পরমাত্মৈক এব। জীবাত্মা প্রতিশরীরং ভিন্নো বিভুর্ নিত্যশ্ চ॥ ১৮ \ সুখাদ্যুপলব্ধিসাধনম্ ইন্দ্রিযং মনঃ। তচ্ চ প্রত্যাত্মনিযতত্বাদ্ অনন্তং পরমাণুরূপং নিত্যং চ॥ ১৯ \ চক্ষুর্মাত্রগ্রাহ্যো গুণো রূপম্। তচ্ চ শুক্লনীলপীতরক্তহরিতকপিশচিত্রভেদাত্ সপ্তবিধং পৃথিবীজলতেজোবৃত্তি। তত্র পৃথিব্যাং সপ্তবিধম্। অভাস্বরশুক্লং জলে। ভাস্বরশুক্লং তেজসি॥ ২০ \ রসনগ্রাহ্যো গুণো রসঃ। স চ মধুরাম্ললবণকটুকষাযতিক্তভেদাত্ ষড্বিধঃ। পৃথিব্যাং ষড্বিধঃ। জলে মধুর এব॥ ২১ \ ঘ্রাণগ্রাহ্যো গুণো গন্ধঃ। স চ দ্বিবিধঃ সুরভিরসুরভিশ্ চ। পৃথিবীমাত্রবৃত্তিঃ। ২২ \ ত্বগিন্দ্রিযমাত্রগ্রাহ্যো গুণো সপর্শঃ। স চ ত্রিবিধঃ শিতোষ্ণানুষ্ণাশীতভেদাত্। পৃথিব্যপ্তেজোবাযুবৃত্তিঃ। তত্র শীতো জলে। উষ্ণস্ তেজসি। অনুষ্ণাশীতঃ পৃথিবীবায্বোঃ॥ ২৩ \ রূপাদিচতুষ্টযং পৃথিব্যাং পাকজম্ অনিত্যং চ। অন্যত্রাপাকজং নিত্যম্ অন্ত্যং চ। নিত্যগতং নিত্যম্। অনিত্যগতম্ অনিত্যম্॥ ২৪ \ একত্বাদিব্যবহারহেতুঃ সংখ্যা। নবদ্রব্যবৃত্তির্ একত্বাদিপরার্ধপর্যন্তা। একত্বং নিত্যম্ অনিত্যং চ। নিত্যগতং নিত্যম্ অনিত্যগতম্ অনিত্যম্। দ্বিত্বাদিকং তু সর্বত্রানিত্যম্ এব॥ ২৫ \ মানব্যবহারকারণং পরিমাণং। নবদ্রব্যবৃত্তি। তচ্ চতুর্বিধম্। অণু মহদ্ দীর্ঘং হ্রস্বং চেতি॥ ২৬ \ পৃথগ্ব্যবহারকারণং পৃথগ্ত্বং। সর্বদ্রব্যবৃত্তি॥ ২৭ \ সংযুক্তব্যবহারহেতুঃ সংযোগঃ। সর্বদ্রব্যবৃত্তিঃ॥ ২৮ \ সংযোগনাশকো গুণো বিভাগঃ। সর্বদ্রব্যবৃত্তিঃ॥ ২৯ \ পরাপরব্যবহারাসাধারণকারণে পরত্বাপরত্বে। পৃথিব্যাদিচতুষ্টযমনোবৃত্তীতি। তে দ্বিবিধে দিক্কৃতে কালকৃতে চ। দূরস্থে দিক্কৃতং পরত্বম্। সমীপস্থে দিক্কৃতম্ অপরত্বম্। জ্যেষ্ঠে কালকৃথং পরত্বম্। কনিষ্ঠে কালকৃতম্ অপরত্বম্॥ ৩০ \ আদ্যপতনাসমবাযিকারণং গুরুত্বং। পৃথিবীজলবৃত্তি॥ ৩১ \ আদ্যস্যন্দনাসমবাযিকারণং দ্রবত্বং পৃথিব্যপ্তেজোবৃত্তি। তদ্ দ্বিবিধং সাংসিদ্ধিকং নৈমিত্তিকং চ। সাংসিদ্ধিকং জলে নৈমিত্তিকং পৃথিবীতেজসোঃ। পৃথিব্যাং ঘৃতাদাবগ্নিসংযোগজন্যং দরবত্বম্। তেজসি সুবর্ণাদৌ॥ ৩২ \ চূর্ণাদিপিণ্ডীভাবহেতুর্ গুণঃ স্নেহঃ। জলমাত্রবৃত্তিঃ॥ ৩৩ \ শ্রোত্রগ্রাহ্যো গুণঃ শব্দঃ। আকাশমাত্রবৃত্তিঃ। স দ্বিবিধো দ্বন্যাত্মকো বর্ণাত্মকশ্ চেতি। দ্বন্যাত্মকো ভের্যাদৌ। বর্ণাত্মকঃ সংস্কৃতভাষাদিরূপঃ॥ ৩৪ \ সর্বব্যবহারহেতুর্ বুদ্ধির্ জ্ঞানম্। সা দ্বিবিধা স্মৃতিরনুভবশ্ চ। সংস্কারমাত্রজন্যং জ্ঞানং স্মৃতিঃ। তদ্ভিন্নং জ্ঞানম্ অনুভবঃ॥ ৩৫ \ স দ্বিবিধো যথার্থো ঽযথার্থশ্ চ। তদ্বতি তত্প্রকারকো ঽনুভবো যথার্থঃ। যথা রজত ইদং রজতম্ ইতি জ্ঞানম্। স এব প্রমেত্য্ উচ্যতে। তদভাববতি তত্প্রকারকো ঽনুভবো ঽযথার্থঃ। যথা শুক্তাব্ ইদং রজতম্ ইতি জ্ঞানম্॥ ৩৬ \ যথার্থানুভবশ্ চতুর্বিধঃ প্রত্যক্ষানুমিত্যুপমিতিশব্দভেদাত্। তত্করণম্ অপি চতুর্বিধং প্রত্যক্ষানুমানোপমানশব্দভেদাত্॥ ৩৭ \ অসাধারণম্ কারণং করণম্। ৩৮ \ কার্যনিযতপূর্ববৃত্তি কারণম্। ৩৯ \ কার্যং প্রাগভাবপ্রতিযোগি। ৪০ \ কারণং ত্রিবিধং সমবায্যসমবাযিনিমিত্তভেদাত্। যত্ সমবেতং কার্যম্ উত্পদ্যতে তত্ সমবাযিকারণম্। যথা তন্তবঃ পটস্য পটশ্ চ খগতরূপাদেঃ। কার্যেণ কারণেন বা সহৈকস্মিন্ন্ অর্থে সমবেতত্বে সতি যত্ কারণং তদ্ অসমবাযিকারণম্। যথা তন্তুসংযোগঃ পটস্য তন্তুরূপং পটরূপস্য। তদুভযভিন্নং কারণং নিমিত্তকারণম্। যথা তুরীবেমাদিকং পটস্য। ৪১ \ তদ্ এতত্ত্রিবিধকারণমধ্যে যদ্ অসাধারণং কারণং তদ্ এব করণম্॥ ৪২ \ তত্র প্রত্যক্ষজ্ঞানকরণং প্রত্যক্ষম্। ইন্দ্রিযার্থসন্নিকর্ষজন্যং জ্ঞানং প্রত্যক্ষম্। তদ্ দ্বিবিধং নির্বিকল্পকং সবিকল্পকং চেতি। তত্র নির্বিকল্পকং জ্ঞানং নির্বিকল্পকং যথেদং কিংচিত্। সপরকারকং জ্ঞানং সবিকল্পকং যথা ডিত্থোঽযম্ ব্রহ্মণোঽযং শ্যামোঽযম্ ইতি॥ ৪৩ \ প্রত্যক্ষজ্ঞানহেতুর্ ইন্দ্রিযার্থসন্নিকর্ষঃ ষড্বিধঃ। সংযোগঃ সংযুক্তসমবাযঃ সংযুক্তসমবেতসমবাযঃ সমবাযঃ সমবেতসমবাযো বিশেষণবিশেষ্যভাবশ্ চেতি। চক্ষুষা ঘটপ্রত্যক্ষজননে সংযোগঃ সন্নিকর্ষঃ। ঘটরূপপ্রত্যক্ষজননে সংযুক্তসমবাযঃ সন্নিকর্ষঃ চক্ষুঃসংযুক্তে ঘটে রূপস্য সমবাযাত্। রূপত্বসামান্যপ্রত্যক্ষে সংযুক্তসমবেতসমবাযঃ সন্নিকর্ষঃ চক্ষুঃসংযুক্তে ঘটে রূপং সমবেতং তত্র রূপত্বস্য সমবাযাত্। শ্রোত্রেণ শব্দস্যাকাশগুণত্বাত্ গুণগুণিনোশ্ চ সমবাযাত্। শব্দত্বসাক্ষাত্কারে সমবেতসমবাযঃ সন্নিকর্ষঃ শ্রোত্রসমবেতে শব্দে শব্দত্বস্য সমবাযাত্। অভাবপরত্যক্ষে বিশেষণবিশেষ্যভাবঃ সন্নিকর্ষো ঘটাভাববদ্ ভৃতলম্ ইত্য্ অত্র চক্ষুঃসংযুক্তে ভূতলে ঘটাভাবস্য বিশেষণত্বাত্। এবং স্ন্নিকর্ষষট্কজন্যং জ্ঞানং প্রত্যক্ষম্। তত্করণম্ ইন্দ্রিযম্। তস্মাদ্ ইন্দ্রিযং প্রত্যক্ষপ্রমাণম্ ইতি সিদ্ধম্॥ ৪৪ \ অনুমিতিকরণম্ অনুমানম্। পরামর্শজন্যং জ্ঞানম্ অনুমিতিঃ। ব্যাপ্তিবিশিষ্টপক্ষধর্মতাজ্ঞানং পরামর্শঃ। যথা বহ্নিব্যাপ্যধূমবান্ অযং পর্বত ইতি জ্ঞানং পরামর্শঃ। তজ্ জন্যং পর্বতো বহ্নিমান্ ইতি জ্ঞানম্ অনুমিতিঃ। যত্র যত্র ধূমস্ তত্রাগ্নির্ ইতি সাহচর্যনিযমো ব্যাপ্তিঃ। ব্যাপ্যস্য পর্বতাদিবৃত্তিত্বং পক্ষধর্মতা॥ ৪৫ \ অনুমানং দ্বিবিধং স্বার্থং পরার্থং চ। তত্র স্বার্থং স্বানুমিতিহেতুঃ। তথা হি স্বযম্ এব ভূযো দর্শনেন যত্র ধূমস্ তত্র অগ্নির্ ইতি মহানসাদৌ ব্যাপ্তিং গৃহীত্বা পর্বতসমীপং গতস্ তদ্গতে চাগ্নৌ সন্দিহানঃ পর্বতে ধূমং পশ্যন্ ব্যাপ্তিং স্মরতি যত্র ধূমস্ তত্রাগ্নির্ ইতি। তদন্তরং বহ্নিব্যাপ্যধূমবান্ অযং পর্বত ইতি জ্ঞানম্ উত্পদ্যতে। অযম্ এব লিঙ্গপরামর্ষং ইত্য্ উচ্যতে। তস্মাত্ পর্বতো বহ্নিমান্ ইতি জ্ঞানম্ অনুমিতির্ উত্পদ্যতে। তদ্ এতত্ স্বার্থানুমানম্। যত্ তু স্বযং ধূমাদ্ অগ্নিম্ অনুমায পরপ্রতিপত্ত্যর্থং পঞ্চাবযববাক্যং প্রযুক্তে তত্ পরার্থানুমানম্। যথা পর্বতো বহ্নিমান্ ধূমবত্ত্বাত্। যো যো ধূমবান্ স বহ্নিমান্ যথা মহানসঃ। তথা চাযম্। তস্মাত্ তথেতি। অনেন প্রতিপাদিতাল্ লিন্গাত্ পরোঽপ্য্ অগ্নিং প্রতিপদ্যতে॥ ৪৬ \ প্রতিজ্ঞাহেতূদাহরণোপনযনিগমানি পঞ্চাবযবঃ। পর্বতো বহ্নিমান্ ইতি প্রতিজ্ঞা। ধূমবত্ত্বাদ্ ইতি হেতুঃ। যো যো ধূমবান্ স সোঽগ্নিমান্ যথা মহানস ইত্য্ উদাহরণম্। তথা চাযম্ ইতি উপনযঃ। তস্মাত্ তথেতি নিগমনম্॥ ৪৭ \ স্বার্থানুমিতিপরার্থানুমিত্যোর্ লিঙ্গপরামর্শ এব করণম্। তস্মাল্ লিঙ্গপরামর্শাঽনুমানম্॥ ৪৮ \ লিঙ্গং ত্রিবিধম্। অন্বযব্যতিরেকি কেবলান্বযি কেবলব্যতিরেকি চেতি। অন্বযেন ব্যতিরেকেণ চ ব্যাপ্তিমদ্ অন্বযব্যতিরেকি। যথা বহ্নৌ সাধ্যে ধূমবত্ত্বম্। যত্র ধূমস্ তত্রাগ্নির্ যথা মহানস ইত্য্ অন্বযব্যাপ্তিঃ। যত্র বহ্নির্ নাস্তি তত্র ধূমোঽপি নাস্তি যথা মহাহ্রদ ইতি ব্যতিরেকব্যাপ্তিঃ। অন্বযমাত্রব্যাপ্তিকং কেবলান্বযি যথা ঘটোঽভিধেযঃ প্রমেযত্বাত্ পটবত্। অত্র প্রমেযত্বাভিধ্যত্বযোর্ ব্যতিরেকব্যাপ্তির্ নাস্তি সর্বস্যাপি প্রমেযত্বাদ্ অভিধেযত্বাচ্ চ। ব্যতিরেকমাত্রব্যাপ্তিকং কেবলব্যতিরেকি যথা পৃথিবী তরেভ্যো ভিদ্যতে গন্ধবত্ত্বাত্। যদ্ ইতরেভ্যো ন ভিদ্যতে ন তদ্ গন্ধবত্। যথা জলম্। ন চেযং তথা। তস্মান্ ন তথেতি অত্র যদ্ গন্ধবত্ তদ্ ইতরভিন্নম্ ইত্য্ অন্বযদৃষ্টন্তো নাস্তি পৃথিবীমাত্রস্য পক্ষত্বাত্॥ ৪৯ \ সংদিগ্ধসাধ্যবান্ পক্ষঃ। যথা ধূমবত্ত্বে হেতৌ পর্বতঃ॥ ৫০ \ নিশ্চিতসাধ্যবান্ সপক্ষঃ। যথা তত্রৈব মহানসঃ॥ ৫১ \ নিশ্চিতসাধ্যাভাববান্ বিপক্ষঃ। যথা তত্রৈব মহাহ্রদঃ॥ ৫২ \ সব্যভিচারবিরুদ্ধসত্পক্ষাসিদ্ধবাধিতাঃ পঞ্চ হেত্বাভাসাঃ॥ ৫৩ \ সব্যভিচারোঽনৈকান্তিকঃ। স ত্রিবিধঃ। সাধারণাসাধারণানুপসংহারিভেদাত্। তত্র সাধ্যাভাববদ্বৃত্তিঃ সাধারণো অনৈকান্তিকঃ। যথা পর্বতো বহ্নিমান্ প্রমেযত্বাদ্ ইতি প্রমেযত্বস্য বহ্ন্যভাববতি হ্রদে বিদ্যমানত্বাত্। সর্বসপক্ষবিপক্ষব্যাবৃত্তোঽসাধারণঃ। যথা শব্দো নিত্যঃ শব্দত্বাদ্ ইতি। শব্দত্বং সর্বেভ্যো নিত্যেভ্যোঽন্ত্যেভ্যশ্ চ ব্যাবৃত্তং শব্দমাত্রবৃত্তি। অন্বযব্যতিরেকদৃষ্টান্তরহিতোঽনুপসংহারী। যথা সর্বম্ অনিত্যং প্রমেযত্বাদ্ ইতি। অত্র সর্বস্যাপি পক্ষত্বাদ্ দৃষ্টান্তো নাস্তি॥ ৫৪ \ সাধ্যাভাবব্যাপ্তো হেতুর্ বিরুদ্ধঃ। যত্র শব্দো নিত্যঃ কৃতকত্বাদ্ ইতি। কৃতকত্বং হি নিত্যত্বাভাবেনানিত্যত্বেন ব্যাপ্তম্॥ ৫৫ \ যস্য সাধ্যভাবসাধকং হেত্বন্তরং বিদ্যতে স সত্প্রতিপক্ষঃ। যথা শব্দো নিত্যঃ শ্রাবণত্বাচ্ ছব্দত্ববদ্ ইতি। শব্দোঽনিত্যঃ কার্যত্বাদ্ ঘটবদ্ ইতি॥ ৫৬ \ অসিদ্ধস্ ত্রিবিধঃ। আশ্রযাসিদ্ধঃ স্বরূপাসিদ্ধো ব্যাপ্যত্বাসিদ্ধশ্ চেতি। আশ্রযাসিদ্ধো যথা গগনারবিন্দং সুরভ্য্ অরবিন্দত্বাত্ সরোজারবিন্দবত্। অত্র গগনারবিন্দম্ আশ্রযঃ। স চ নাস্ত্য্ এব। স্বরূপাসিদ্ধো যথা শব্দো গুণশ্ চাক্ষুষত্বাত্। অত্র চাক্ষুষত্বং শব্দে নাস্তি শব্দস্য শ্রাবণত্বাত্। সোপাধিকো ব্যাপ্যত্বাসিদ্ধঃ। সাধ্যব্যাপকত্বে সতি সাধনাব্যাপক উপাধিঃ। সাধ্যসমানাধিকরণাত্যন্তাভাবাপ্রতিযোগিত্বং সাধ্যব্যাপকত্বম্। সাধনবন্ন্ ইষ্টাত্যন্তাভাবপ্রতিযোগিত্বং সাধারণাব্যপকত্বম্। পর্বতো ধূমবান্ বহ্নিমত্ত্বাদ্ ইত্য্ অত্রার্দ্রেন্ধসংযোগ উপাধিঃ। তথা হি। যত্র ধূমস্ তত্রার্দ্রেন্ধ্নসংযোগ ইতি সাধ্যব্যাপকতা। যত্র বহ্নিস্ তত্রার্দ্রেন্ধনসংযোগাভাবাদ্ ইতি সাধনাব্যাপকতা। এবং সাধ্যব্যাপকত্বে সতি সাধনাব্যাপকত্বাদ্ অর্দ্রেন্ধনসংযোগ উপাধিঃ। সোপাধিকত্বাদ্ বহ্নিমত্ত্বং ব্যাপ্যত্বাসিদ্ধম্॥ ৫৭ \ যস্য সাধ্যাভাবঃ প্রমাণান্তরেণ নিশ্চিতঃ স বাধিতঃ। যথা বহ্নির্ অনুষ্ণো দ্রব্যত্বাদ্ ইতি। অত্রানুষ্ণত্বং সাধ্যং তদভাব উষ্ণত্বং স্পার্শনপ্রত্যক্ষেণ গৃহ্যত ইতি বাধিতত্বম্॥ ৫৮ \ উপমিতিকরণম্ উপমানম্। সংজ্ঞাসংজ্ঞিসংবন্ধজ্ঞানম্ উপমিতিঃ। তত্করণং সাদৃশ্যজ্ঞানম্। অতিদেশবাক্যার্থস্মরণম্ অবান্তরব্যাপারঃ। তথা হি কশ্ চিদ্ গবযশব্দার্থম্ অজানন্ কুতশ্ চিদ্ আরণ্যকপুরুষাদ্ গোসদৃশো গবয ইতি শ্রুত্বা বনং গতো বাক্যার্থং স্মরন্ গোসদৃষং পিণ্ডং পশ্যতি। তদনন্তরম্ অসৌ গবযশব্দবাচ্য ইত্য্ উপমিতির্ উত্পদ্য্তে॥ ৫৯ \ আপ্তবাক্যং শব্দঃ। আপ্তস্ তু যথার্থবক্তা। বাক্যং পদসমূহঃ। যথা গাম্ আনযেতি। শক্তং পদম্। অস্মাত্ পদাদ্ অযম্ অর্থো বোদ্ধব্য ইতীশ্বরসংকেতঃ শক্তিঃ॥ ৬০ \ আকাঙ্ক্ষা যোগ্যতা সংনিধিশ্ চ বাক্যার্থজ্ঞানহেতুঃ। পদস্য পদান্তরব্যতিরেকপ্রযুক্তান্বযাননুভাবকত্বম্ আকাঙ্ক্ষা। অর্থাবাধো যোগ্যতা। পদানামবিলম্বেনোচ্চারণং সংনিধিঃ॥ ৬১ \ আকাঙ্ক্ষাদিরহিতং বাক্যম্ অপ্রমাণম্। যথা গৌর্ অশ্বঃ পুরুষো হস্তীতি ন প্রমাণম্ আকাঙ্ক্ষাবিরহাত্। অগ্নিনা সিঞ্চেদ্ ইতি ন প্রমাণং যোগ্যতাবিরহাত্। প্রহরে প্রেহরেঽসহোচ্চারিতানি গাম্ আনযেত্যাদিপদানি ন প্রমাণং সংনিধ্যভাবাত্॥ ৬২ \ বাক্যং দ্বিবিধম্। বৈদিকং লৌকিকং চ। বৈদিকম্ ঈশ্বরোক্তত্বাত্ সর্বম্ এব প্রমাণম্। লৌকিকং ত্ব্ আপ্তোক্তং প্রমাণম্। অন্যদ্ অপ্রমাণম্॥ ৬৩ \ বাক্যার্থজ্ঞানং শব্দজ্ঞানম্। তত্করণং শব্দঃ॥ ৬৪ \ অযথার্থানুভবস্ ত্রিবিধঃ সংশযবিপর্যযতর্কভেদাত্। একস্মিন্ ধর্মিনি বিরুদ্ধনানাধর্মবৈশিষ্ট্যাবগাহি জ্ঞানং সংশযঃ। যথা স্থাণুর্ বা পুর্ষো বেতি। মিথ্যাজ্ঞানং বিপর্যযঃ। যথা শুক্তাব্ ইদং রজতম্ ইতি। ব্যাপ্যারোপেণ ব্যাপকারোপস্ তর্কঃ যথা যদি বহ্নির্ ন স্যাত্ তর্হি ধূমোঽপি ন স্যাদ্ ইতি॥ ৬৫ \ স্মৃতির্ অপি দ্বিবিধা। যথার্থাযথার্থা চ প্রমাজন্যা যথার্থা। অপ্রমাজন্যাযথার্থা॥ ৬৬ \ সর্বেশাম্ অনুকূলতযা বেদনীযং সুখম্॥ ৬৭ \ সর্বেশাং প্রতিকূলতযা বেদনীযং দুঃখম্॥ ৬৮ \ ইচ্ছা কামঃ॥ ৬৯ \ ক্রোধো দ্বেষঃ॥ ৭০ \ কৃতিঃ প্রযত্নঃ॥ ৭১ \ বিহিতকর্মজন্যো ধর্মঃ॥ ৭২ \ নিষিদ্ধকর্মজন্যস্ ত্ব্ অধর্মঃ॥ ৭৩ \ বুদ্ধ্যাদযোঽষ্টাব্ আত্মমাত্রবিশেষগুণাঃ॥ ৭৪ \ বুদ্ধীচ্ছাপ্রযত্না দ্বিবিধাঃ। নিত্যা অনিত্যাশ্ চ। নিত্যা ঈশ্বরস্য। অনিত্যা জীবস্য॥ ৭৫ \ সংস্কারস্ ত্রিবিধঃ। বেগো ভাবনা স্থিতিস্থাপকশ্ চেতি। বেগঃ পৃথিব্যাদিচতুষ্টযমনোবৃত্তিঃ। অনুভবজন্যা স্মৃতিহেতুর্ ভাবনাত্মমাত্রবৃত্তিঃ। অন্যথা কৃতস্য পুনস্ তদবস্থাপাদকঃ স্থিতিস্থাপকঃ কটাদিপৃথিবীবৃত্তিঃ॥ ৭৬ \ চলনাত্মকং কর্ম। ঊর্ধ্বদেশসংযোগহেতুর্ উত্ক্ষেপণম্। অধোদেশসংযোগহেতুর্ অপক্ষেপণম্। শরীরসংনিকৃষ্টসংযোগহেতুর্ আকুঞ্চনম্। বিপ্রকৃষ্টসংযোগহেতুঃ প্রসারণম্। অন্যত্ সর্বং গমনম্। পৃথিব্যাদিচতুষ্টযমনোমাত্রবৃত্তি॥ ৭৭ \ নিত্যম্ একম্ অনেকানুগতং সামান্যম্। দ্রব্যগুণকর্মবৃত্তি। তদ্ দ্বিবিধং পরাপরভেদাত্। পরং সত্তা। অপরং দ্রব্যত্বাদিঃ॥ ৭৮ \ নিত্যদ্রব্যবৃত্তযো ব্যাবর্তকা বিশেষাঃ॥ ৭৯ \ নিত্যসংবন্ধঃ সমবাযঃ। অযুতসিদ্ধবৃত্তিঃ। যযোর্ দ্বযোর্ মধ্য একম্ অবিনশ্যদপরাশ্রিতম্ এবাবতিষ্টতে তাব্ অযুতসিদ্দৌ। যথাবযবাবযবিনৌ গুণগুণিনৌ ক্রিযাক্রিযাবন্তৌ জাতিব্যক্তী বিশেষনিত্যদ্রব্যে চেতি॥ ৮০ \ অনাদিঃ সান্তঃ প্রাগভাবঃ। উত্পত্তেঃ পূর্বং কার্যস্য। সাদির্ অনন্তঃ প্রধ্বংসঃ। উত্পত্ত্যনন্তরং কার্যস্য। ত্রৈকালিকসংসর্গাবচ্ছিন্নপ্রতিযোগিতাকোঽত্যন্তাভাবঃ। যথা ভূতলে ঘটো নাস্তীতি। তাদাত্ম্যসংবন্ধাবচ্ছিন্নপ্রতিযোগিতাকোঽন্যোন্যাভাবঃ যথা ঘটঃ পটো ন ভবতীতি॥ ৮১ \ সর্বেষাং পদার্থানাং যথাযথম্ উক্তেষ্ব্ অন্তর্ভাবাত্ সপ্তৈব পদার্থা ইতি সিদ্ধম্॥ কাণাদন্যাযমতযোর্ বালাব্যুত্পত্তিসিদ্ধযে। অন্নংভট্টেন বিদুষা রচিতস্ তর্কসংগ্রহঃ॥