ನ್ಯಾಯಸೂತ್ರ
(ಅಥ ಪ್ರಥಮಃ ಅಧ್ಯಾಯಃ)
॥ಅನುಬನ್ಧಚತುಷ್ಟಯಪ್ರಕರಣಮ್॥
೧.೧.೧ \ ಪ್ರಮಾಣ-ಪ್ರಮೇಯ-ಸಂಶಯ-ಪ್ರಯೋಜನ-ದೃಷ್ಟಾನ್ತ-ಸಿದ್ಧಾನ್ತಾವಯವ-ತರ್ಕ-ನಿರ್ಣಯ-ವಾದ-ಜಲ್ಪ-
ವಿತಣ್ಡಾಹೇತ್ವಾಭಾಸ-ಚ್ಛಲ-ಜಾತಿ-ನಿಗ್ರಹಸ್ಥಾನಾನಾಮ್ತತ್ತ್ವಜ್ಞಾನಾತ್ ನಿಃಶ್ರೇಯಸಾಧಿಗಮಃ
{ಪದಾರ್ಥೋದ್ದೇಶಸೂತ್ರಮ್}
೧.೧.೨ \ ದುಃಖಜನ್ಮಪ್ರವೃತ್ತಿದೋಷಮಿಥ್ಯಾಜ್ಞಾನಾನಾಮ್ ಉತ್ತರೋತ್ತರಾಪಾಯೇ ತದನನ್ತರಾ ಪಾಯಾತ್ ಅಪವರ್ಗಃ
{ಪದಾರ್ಥೋದ್ದೇಶಸೂತ್ರಮ್}
॥ಪ್ರಮಾಣಪ್ರಕರಣಮ್॥
೧.೧.೩ \ ಪ್ರತ್ಯಕ್ಷಾನುಮಾನೋಪಮಾನಶಬ್ದಾಃ ಪ್ರಮಾಣಾನಿ
{ಪ್ರಮಾಣ-ಉದ್ದೇಶ-ಸೂತ್ರಮ್}
೧.೧.೪ \ ಇನ್ದ್ರಿಯಾರ್ಥಸನ್ನಿಕರ್ಷೋತ್ಪನ್ನಮ್ ಜ್ಞಾನಮ್ ಅವ್ಯಪದೇಶ್ಯಮ್ ಅವ್ಯಭಿಚಾರಿ ವ್ಯವಸಾಯಾತ್ಮಕಮ್ ಪ್ರತ್ಯಕ್ಷಮ್
{ಪ್ರತ್ಯಕ್ಷಲಕ್ಷಣಮ್}
೧.೧.೫ \ ಅಥ ತತ್ಪೂರ್ವಕಂ ತ್ರಿವಿಧಮ್ ಅನುಮಾನಂ ಪೂರ್ವವತ್ ಶೇಷವತ್ ಸಾಮಾನ್ಯತೋದೃಷ್ಟಂ ಚ
{ಅನುಮಾನಲಕ್ಷಣಮ್}
೧.೧.೬ \ ಪ್ರಸಿದ್ಧಸಾಧರ್ಮ್ಯಾತ್ ಸಾಧ್ಯಸಾಧನಮ್ ಉಪಮಾನಮ್
{ಉಪಮಾನಲಕ್ಷಣಮ್}
೧.೧.೭ \ ಆಪ್ತೋಪದೇಶಃ ಶಬ್ದಃ
{ಶಬ್ದಲಕ್ಷಣಮ್}
೧.೧.೮ \ ಸಃ ದ್ವಿವಿಧಃ ದೃಷ್ಟಾದೃಷ್ಟಾರ್ಥತ್ವಾತ್
{ಶಬ್ದಭೇದಃ}
॥ಪ್ರಮೇಯಪ್ರಕರಣಮ್॥
೧.೧.೯ \ ಆತ್ಮಶರೀರೇನ್ದ್ರಿಯಾರ್ಥಬುದ್ಧಿಮನಃಪ್ರವೃತ್ತಿದೋಷಪ್ರೇತ್ಯಭಾವಫಲದುಃಖಾಪವರ್ಗಾಃ ತು ಪ್ರಮೇಯಮ್
{ಪ್ರಮೇಯ-ಉದ್ದೇಶ-ಸೂತ್ರಮ್}
೧.೧.೧೦ \ ಇಚ್ಛಾದ್ವೇಷಪ್ರಯತ್ನಸುಖದುಃಖಜ್ಞಾನಾನಿ ಆತ್ಮನಃ ಲಿಙ್ಗಮ್ ಇತಿ
{ಆತ್ಮಲಕ್ಷಣಮ್}
೧.೧.೧೧ \ ಚೇಷ್ಟೇನ್ದ್ರಿಯಾರ್ಥಾಶ್ರಯಃ ಶರೀರಮ್
{ಶರೀರಲಕ್ಷಣಮ್}
೧.೧.೧೨ \ ಘ್ರಾಣರಸನಚಕ್ಷುಸ್ತ್ವಕ್ಶ್ರೋತ್ರಾಣಿ ಇನ್ದ್ರಿಯಾಣಿ ಭೂತೇಭ್ಯಃ
{ಇನ್ದ್ರಿಯಲಕ್ಷಣಮ್}
೧.೧.೧೩ \ ಪೃಥಿವೀ ಆಪಃ ತೇಜಃ ವಾಯುಃ ಆಕಾಶಮ್ ಇತಿ ಭೂತಾನಿ
{ಭೂತಲಕ್ಷಣಮ್}
೧.೧.೧೪ \ ಗನ್ಧರಸರೂಪಸ್ಪರ್ಶಶಬ್ದಾಃ ಪೃಥಿವ್ಯಾದಿಗುಣಾಃ ತದರ್ಥಾಃ
{ಅರ್ಥ(ವಿಷಯ)ಲಕ್ಷಣಮ್}
೧.೧.೧೫ \ ಬುದ್ಧಿಃ ಉಪಲಬ್ಧಿಃ ಜ್ಞಾನಮ್ ಇತಿ ಅನರ್ಥಾನ್ತರಮ್
{ಬುದ್ಧಿಲಕ್ಷಣಮ್}
೧.೧.೧೬ \ ಯುಗಪತ್ ಜ್ಞಾನಾನುತ್ಪತ್ತಿಃ ಮನಸಃ ಲಿಙ್ಗಮ್
{ಮನೋಲಕ್ಷಣಮ್}
೧.೧.೧೭ \ ಪ್ರವೃತ್ತಿಃ ವಾಗ್ಬುದ್ಧಿಶರೀರಾರಮ್ಭಃ
{ಪ್ರವೃತ್ತಿಲಕ್ಷಣಮ್}
೧.೧.೧೮ \ ಪ್ರವರ್ತ್ತನಾಲಕ್ಷಣಾಃ ದೋಷಾಃ
{ದೋಷಲಕ್ಷಣಮ್}
೧.೧.೧೯ \ ಪುನರುತ್ಪತ್ತಿಃ ಪ್ರೇತ್ಯಭಾವಃ
{ಪ್ರೇತ್ಯಭಾವಲಕ್ಷಣಮ್}
೧.೧.೨೦ \ ಪ್ರವೃತ್ತಿದೋಷಜನಿತಃ ಅರ್ಥಃ ಫಲಮ್
{ಫಲಲಕ್ಷಣಮ್}
೧.೧.೨೧ \ ಬಾಧನಾಲಕ್ಷಣಮ್ ದುಃಖಮ್
{ದುಃಖಲಕ್ಷಣಮ್}
೧.೧.೨೨ \ ತದತ್ಯನ್ತವಿಮೋಕ್ಷಃ ಅಪವರ್ಗಃ
{ಅಪವರ್ಗಲಕ್ಷಣಮ್}
॥ನ್ಯಾಯಪೂರ್ವಾಙ್ಗಲಕ್ಷಣಪ್ರಕರಣಮ್॥
೧.೧.೨೩ \ ಸಮಾನಾನೇಕಧರ್ಮೋಪಪತ್ತೇಃ ವಿಪ್ರತಿಪತ್ತೇಃ ಉಪಲಬ್ಧ್ಯನುಪಲಬ್ಧ್ಯವ್ಯವಸ್ಥಾತಃ ಚ ವಿಶೇಷಾಪೇಕ್ಷಃ ವಿಮರ್ಶಃ ಸಂಶಯಃ
{ಸಂಶಯಲಕ್ಷಣಮ್}
೧.೧.೨೪ \ ಯಮ್ ಅರ್ಥಮ್ ಅಧಿಕೃತ್ಯ ಪ್ರವರ್ತತೇ ತತ್ ಪ್ರಯೋಜನಮ್
{ಪ್ರಯೋಜನಲಕ್ಷಣಮ್}
೧.೧.೨೫ \ ಲೌಕಿಕಪರೀಕ್ಷಕಾಣಾಂ ಯಸ್ಮಿನ್ ಅರ್ಥೇ ಬುದ್ಧಿಸಾಮ್ಯಮ್ ಸಃ ದೃಷ್ಟಾನ್ತಃ
{ದೃಷ್ಟಾನ್ತಲಕ್ಷಣಮ್}
॥ನ್ಯಾಯಾಶ್ರಯಸಿದ್ಧಾನ್ತಲಕ್ಷಣಪ್ರಕರಣಮ್॥
೧.೧.೨೬ \ ತನ್ತ್ರಾಧಿಕರಣಾಭ್ಯುಪಗಮಸಂಸ್ಥಿತಿಃ ಸಿದ್ಧಾನ್ತಃ
{ಅಭ್ಯುಪಗಮಸಿದ್ಧಾನ್ತಲಕ್ಷಣಮ್}
೧.೧.೨೭ \ ಸಃ ಚತುರ್ವಿಧಃ ಸರ್ವತನ್ತ್ರಪ್ರತಿತನ್ತ್ರಾಧಿಕರಣಾಭ್ಯುಪಗಮಸಂಸ್ಥಿತ್ಯರ್ಥಾನ್ತರಭಾವಾತ್
{ತನ್ತ್ರಭೇದ-ಉದ್ದೇಶಸೂತ್ರಮ್}
೧.೧.೨೮ \ ಸರ್ವತನ್ತ್ರಾವಿರುದ್ಧಃ ತನ್ತ್ರೇ ಅಧಿಕೃತಃ ಅರ್ಥಃ ಸರ್ವತನ್ತ್ರಸಿದ್ಧಾನ್ತಃ
{ಸರ್ವತನ್ತ್ರಸಿದ್ಧಾನ್ತ-ಲಕ್ಷಣಮ್}
೧.೧.೨೯ \ ಸಮಾನತನ್ತ್ರಸಿದ್ಧಃ ಪರತನ್ತ್ರಾಸಿದ್ಧಃ ಪ್ರತಿತನ್ತ್ರಸಿದ್ಧಾನ್ತಃ
{ಪ್ರತಿತನ್ತ್ರಸಿದ್ಧಾನ್ತ-ಲಕ್ಷಣಮ್}
೧.೧.೩೦ \ ಯತ್ಸಿದ್ಧೌ ಅನ್ಯಪ್ರಕರಣಸಿದ್ಧಿಃ ಸಃ ಅಧಿಕರಣಸಿದ್ಧಾನ್ತಃ
{ಅಧಿಕರಣಸಿದ್ಧಾನ್ತ-ಲಕ್ಷಣಮ್}
೧.೧.೩೧ \ ಅಪರೀಕ್ಷಿತಾಭ್ಯುಪಗಮಾತ್ ತದ್ವಿಶೇಷಪರೀಕ್ಷಣಮ್ ಅಭ್ಯುಪಗಮಸಿದ್ಧಾನ್ತಃ
{ಅಭ್ಯುಪಗಮಸಿದ್ಧಾನ್ತ-ಲಕ್ಷಣಮ್}
॥ನ್ಯಾಯಪ್ರಕರಣಮ್॥
೧.೧.೩೨ \ ಪ್ರತಿಜ್ಞಾಹೇತೂದಾಹರಣೋಪನಯನಿಗಮನಾನಿ ಅವಯವಾಃ
{ಅವಯವ-ಉದ್ದೇಶಸೂತ್ರಮ್}
೧.೧.೩೩ \ ಸಾಧ್ಯನಿರ್ದೇಶಃ ಪ್ರತಿಜ್ಞಾ
{ಪ್ರತಿಜ್ಞಾ-ಲಕ್ಷಣಮ್}
೧.೧.೩೪ \ ಉದಾಹರಣಸಾಧರ್ಮ್ಯಾತ್ ಸಾಧ್ಯಸಾಧನಂ ಹೇತುಃ
{ಹೇತು-ಲಕ್ಷಣಮ್}
೧.೧.೩೫ \ ತಥಾ ವೈಧರ್ಮ್ಯಾತ್
{ಹೇತು-ಲಕ್ಷಣಮ್}
೧.೧.೩೬ \ ಸಾಧ್ಯಸಾಧರ್ಮ್ಯಾತ್ ತದ್ಧರ್ಮಭಾವೀ ದೃಷ್ಟಾನ್ತಃ ಉದಾಹರಣಮ್
{ಉದಾಹರಣ-ಲಕ್ಷಣಮ್}
೧.೧.೩೭ \ ತದ್ವಿಪರ್ಯಯಾತ್ ವಾ ವಿಪರೀತಮ್
{ಉದಾಹರಣ-ಲಕ್ಷಣಮ್}
೧.೧.೩೮ \ ಉದಾಹರಣಾಪೇಕ್ಷಃ ತಥಾ ಇತಿ ಉಪಸಂಹಾರಃ ನ ತಥಾ ಇತಿ ವಾ ಸಾಧ್ಯಸ್ಯ ಉಪನಯಃ
{ಉಪನಯ-ಲಕ್ಷಣಮ್}
೧.೧.೩೯ \ ಹೇತ್ವಪದೇಶಾತ್ ಪ್ರತಿಜ್ಞಾಯಾಃ ಪುನರ್ವಚನಮ್ ನಿಗಮನಮ್
{ನಿಗಮನ-ಲಕ್ಷಣಮ್}
॥ನ್ಯಾಯೋತ್ತರಾಙ್ಗಪ್ರಕರಣಮ್॥
೧.೧.೪೦ \ ಅವಿಜ್ಞಾತತತ್ವೇ ಅರ್ಥೇ ಕಾರಣೋಪಪತ್ತಿತಃ ತತ್ತ್ವಜ್ಞಾನಾರ್ಥಮ್ ಉಹಃ ತರ್ಕಃ
{ತರ್ಕ-ಲಕ್ಷಣಮ್}
೧.೧.೪೧ \ ವಿಮೃಶ್ಯ ಪಕ್ಷಪ್ರತಿಪಕ್ಷಾಭ್ಯಾಮ್ ಅರ್ಥಾವಧಾರಣಮ್ ನಿರ್ಣಯಃ
{ನಿರ್ಣಯ-ಲಕ್ಷಣಮ್}
(ಇತಿ ನ್ಯಾಯಸೂತ್ರೇ ಪ್ರಥಮಾಧ್ಯಾಯಸ್ಯ ಪ್ರಥಮಮ್ ಆಹ್ನಿಕಮ್)
(ಅಥ ದ್ವಿತೀಯಮ್ ಆಹ್ನಿಕಮ್)
॥ಕಥಾಲಕ್ಷಣಪ್ರಕರಣಮ್॥
೧.೨.೧ \ ಪ್ರಮಾಣತರ್ಕಸಾಧನೋಪಾಲಮ್ಭಃ ಸಿದ್ಧಾನ್ತಾವಿರುದ್ಧಃ ಪಞ್ಚಾವಯವೋಪಪನ್ನಃ ಪಕ್ಷಪ್ರತಿಪಕ್ಷಪರಿಗ್ರಹಃ ವಾದಃ
{ವಾದ-ಲಕ್ಷಣಮ್}
೧.೨.೨ \ ಯಥೋಕ್ತೋಪಪನ್ನಃ ಛಲಜಾತಿನಿಗ್ರಹಸ್ಥಾನಸಾಧನೋಪಾಲಮ್ಭಃ ಜಲ್ಪಃ
{ಜಲ್ಪ-ಲಕ್ಷಣಮ್}
೧.೨.೩ \ ಸಃ ಪ್ರತಿಪಕ್ಷಸ್ಥಾಪನಾಹೀನಃ ವಿತಣ್ಡಾ
{ವಿತಣ್ಡಾ-ಲಕ್ಷಣಮ್}
॥ಹೇತ್ವಾಭಾಸಪ್ರಕರಣಮ್॥
೧.೨.೪ \ ಸವ್ಯಭಿಚಾರ-ವಿರುದ್ಧ-ಪ್ರಕರಣಸಮ-ಸಾಧ್ಯಸಮ-ಕಾಲಾತೀತಾಃ ಹೇತ್ವಾಭಾಸಾಃ
{ಹೇತ್ವಾಭಾಸ-ಉದ್ದೇಶ-ಸೂತ್ರಮ್}
೧.೨.೫ \ ಅನೈಕಾನ್ತಿಕಃ ಸವ್ಯಭಿಚಾರಃ
{ಸವ್ಯಭಿಚಾರ-ಲಕ್ಷಣಮ್}
೧.೨.೬ \ ಸಿದ್ಧಾನ್ತಮ್ ಅಭ್ಯುಪೇತ್ಯ ತದ್ವಿರೋಧೀ ವಿರುದ್ಧಃ
{ವಿರುದ್ಧ-ಲಕ್ಷಣಮ್}
೧.೨.೭ \ ಯಸ್ಮಾತ್ ಪ್ರಕರಣಚಿನ್ತಾ ಸಃ ನಿರ್ಣಯಾರ್ಥಮಪದಿಷ್ಟಃ ಪ್ರಕರಣಸಮಃ
{ಪ್ರಕರಣಸಮ-ಲಕ್ಷಣಮ್}
೧.೨.೮ \ ಸಾಧ್ಯಾವಿಶಿಷ್ಟಃ ಸಾಧ್ಯತ್ವಾತ್ ಸಾಧ್ಯಸಮಃ
{ಸಾಧ್ಯಸಮ-ಲಕ್ಷಣಮ್}
೧.೨.೯ \ ಕಾಲಾತ್ಯಯಾಪದಿಷ್ಟಃ ಕಾಲಾತೀತಃ
{ಕಾಲಾತೀತ-ಲಕ್ಷಣಮ್}
॥ಛಲಪ್ರಕರಣಮ್॥
೧.೨.೧೦ \ ವಚನವಿಘಾತಃ ಅರ್ಥವಿಕಲ್ಪೋಪಪತ್ತ್ಯಾ ಛಲಮ್
{ಛಲ-ಲಕ್ಷಣಮ್}
೧.೨.೧೧ \ ತತ್ ತ್ರಿವಿಧಮ್ - ವಾಕ್ಛಲಮ್ ಸಾಮಾನ್ಯಚ್ಛಲಮ್ ಉಪಚಾರಚ್ಛಲಮ್ ಚ ಇತಿ
{ಛಲ-ಭೇದ-ಉದ್ದೇಶ-ಸೂತ್ರಮ್}
೧.೨.೧೨ \ ಅವಿಶೇಷಾಭಿಹಿತೇ ಅರ್ಥೇ ವಕ್ತುಃ ಅಭಿಪ್ರಾಯಾತ್ ಅರ್ಥಾನ್ತರಕಲ್ಪನಾ ವಾಕ್ಛಲಮ್
{ವಾಕ್ಛಲ-ಲಕ್ಷಣಮ್}
೧.೨.೧೩ \ ಸಮ್ಭವತಃ ಅರ್ಥಸ್ಯ ಅತಿಸಾಮಾನ್ಯಯೋಗಾತ್ ಅಸಮ್ಭೂತಾರ್ಥಕಲ್ಪನಾ ಸಾಮಾನ್ಯಚ್ಛಲಮ್
{ಸಾಮಾನ್ಯಚ್ಛಲ-ಲಕ್ಷಣಮ್}
೧.೨.೧೪ \ ಧರ್ಮವಿಕಲ್ಪನಿರ್ದೇಶೇ ಅರ್ಥಸದ್ಭಾವಪ್ರತಿಷೇಧಃ ಉಪಚಾರಚ್ಛಲಮ್
{ಉಪಚಾರಚ್ಛಲ-ಲಕ್ಷಣಮ್}
೧.೨.೧೫ \ ವಾಕ್ಛಲಮ್ ಏವ ಉಪಚಾರಚ್ಛಲಮ್ ತತ್ ಅವಿಶೇಷಾತ್
{ಉಪಚಾರಚ್ಛಲ-ಪೂರ್ವಪಕ್ಷ-ಲಕ್ಷಣಮ್}
೧.೨.೧೬ \ ನ ತತ್ ಅರ್ಥಾನ್ತರಭಾವಾತ್
{ಉಪಚಾರಚ್ಛಲ-ಲಕ್ಷಣಮ್}
೧.೨.೧೭ \ ಅವಿಶೇಷೇ ವಾ ಕಿಞ್ಚಿತ್ಸಾಧರ್ಮ್ಯಾತ್ ಏಕಚ್ಛಲಪ್ರಸಙ್ಗಃ
{ಉಪಚಾರಚ್ಛಲ-ಲಕ್ಷಣಮ್}
॥ಲಿಙ್ಗದೋಷಸಾಮಾನ್ಯಪ್ರಕರಣಮ್॥
೧.೨.೧೮ \ ಸಾಧರ್ಮ್ಯವೈಧರ್ಮ್ಯಾಭ್ಯಾಮ್ ಪ್ರತ್ಯವಸ್ಥಾನಂ ಜಾತಿಃ
{ಜಾತಿ-ಲಕ್ಷಣಮ್}
೧.೨.೧೯ \ ವಿಪ್ರತಿಪತ್ತಿಃ ಅಪ್ರತಿಪತ್ತಿಃ ಚ ನಿಗ್ರಹಸ್ಥಾನಮ್
{ನಿಗ್ರಹಸ್ಥಾನ-ಲಕ್ಷಣಮ್}
೧.೨.೨೦ \ ತದ್ವಿಕಲ್ಪಾತ್ ಜಾತಿನಿಗ್ರಹಸ್ಥಾನಬಹುತ್ವಮ್
{ನಿಗ್ರಹಸ್ಥಾನಬಹುತ್ವ-ಸೂತ್ರಮ್}
(ಇತಿ ನ್ಯಾಯಸೂತ್ರೇ ಪ್ರಥಮಾಧ್ಯಾಯಸ್ಯ ದ್ವಿತೀಯಮ್ ಆಹ್ನಿಕಮ್)
(ಸಮಾಪ್ತಃ ಚ ಅಯಮ್ ಪ್ರಥಮಃ ಅಧ್ಯಾಯಃ)
(ಅಥ ದ್ವಿತೀಯಃ ಅಧ್ಯಾಯಃ)
(ಪ್ರಥಮಮ್ ಆಹ್ನಿಕಮ್)
॥ಸಂಶಯಪರೀಕ್ಷಾಪ್ರಕರಣಮ್॥
೨.೧.೧ \ ಸಮಾನಾನೇಕಧರ್ಮಾಧ್ಯವಸಾಯಾತ್ ಅನ್ಯತರಧರ್ಮಾಧ್ಯವಸಾಯಾತ್ ವಾ ನ ಸಂಶಯಃ
{ಸಂಶಯ-}
೨.೧.೨ \ ವಿಪ್ರತ್ತಿಪತ್ತ್ಯವ್ಯವಸ್ಥಾಧ್ಯವಸಾಯಾತ್ ಚ
{ಸಂಶಯ-}
೨.೧.೩ \ ವಿಪ್ರತ್ತಿಪತ್ತೌ ಚ ಸಂಪ್ರತ್ತಿಪತ್ತೇಃ
{ಸಂಶಯ-}
೨.೧.೪ \ ಅವ್ಯವಸ್ಥಾ ಆತ್ಮನಿ ವ್ಯವಸ್ಥಿತತ್ವಾತ್ ಚ ಅವ್ಯವಸ್ಥಾಯಾಃ
{ಸಂಶಯ-}
೨.೧.೫ \ ತಥಾ ಅತ್ಯನ್ತಸಂಶಯಃ ತದ್ಧರ್ಮಸಾತತ್ಯೋಪಪತ್ತೇಃ
{ಸಂಶಯ-}
೨.೧.೬ \ ಯಥೋಕ್ತಾಧ್ಯವಸಾಯಾತ್ ಏವ ತದ್ವಿಶೇಷಾಪೇಕ್ಷಾತ್ ಸಂಶಯೇ ನ ಅಸಂಶಯಃ ನ ಅತ್ಯನ್ತಸಂಶಯಃ ವಾ
{ಸಂಶಯ-}
೨.೧.೭ \ ಯತ್ರ ಸಂಶಯಃ ತತ್ರ ಏವಮ್ ಉತ್ತರೋತ್ತರಪ್ರಸಙ್ಗಃ
{ಸಂಶಯ-}
॥ಪ್ರಮಾಣಸಾಮಾನ್ಯಪರೀಕ್ಷಾಪ್ರಕರಣಮ್॥
೨.೧.೮ \ ಪ್ರತ್ಯಕ್ಷಾದೀನಾಮ್ ಅಪ್ರಾಮಾಣ್ಯಂ ತ್ರೈಕಾಲ್ಯಾಸಿದ್ಧೇಃ
{ಪೂರ್ವಪಕ್ಷಸೂತ್ರಮ್}
೨.೧.೯ \ ಪೂರ್ವಂ ಹಿ ಪ್ರಮಾಣಸಿದ್ಧೌ ನ ಇನ್ದ್ರಿಯಾರ್ಥಸನ್ನಿಕರ್ಷಾತ್ ಪ್ರತ್ಯಕ್ಷೋತ್ಪತ್ತಿಃ
{ಪೂರ್ವಪಕ್ಷಸೂತ್ರಮ್}
೨.೧.೧೦ \ ಪಶ್ಚಾತ್ಸಿದ್ಧೌ ನ ಪ್ರಮಾಣೇಭ್ಯಃ ಪ್ರಮೇಯಸಿದ್ಧಿಃ
{ಪೂರ್ವಪಕ್ಷಸೂತ್ರಮ್}
೨.೧.೧೧ \ ಯುಗಪತ್ಸಿದ್ಧೌ ಪ್ರತ್ಯರ್ಥನಿಯತತ್ವಾತ್ ಕ್ರಮವೃತ್ತಿತ್ವಾಭಾವಃ ಬುದ್ಧೀನಾಮ್
{ಪೂರ್ವಪಕ್ಷಸೂತ್ರಮ್}
೨.೧.೧೨ \ ತ್ರೈಕಾಲ್ಯಾಸಿದ್ಧೇಃ ಪ್ರತಿಷೇಧಾನುಪಪತ್ತಿಃ
{ಪೂರ್ವಪಕ್ಷಸೂತ್ರಮ್}
೨.೧.೧೩ \ ಸರ್ವಪ್ರಮಾಣಪ್ರತಿಷೇಧಾತ್ ಚ ಪ್ರತಿಷೇಧಾನುಪಪತ್ತಿಃ
{ಪೂರ್ವಪಕ್ಷಸೂತ್ರಮ್}
೨.೧.೧೪ \ ತತ್ಪ್ರಾಮಾಣ್ಯೇ ವಾ ನ ಸರ್ವಪ್ರಮಾಣವಿಪ್ರತಿಷೇಧಃ
{ಪೂರ್ವಪಕ್ಷಸೂತ್ರಮ್}
೨.೧.೧೫ \ ತ್ರೈಕಾಲ್ಯಾಪ್ರತಿಷೇಧಃ ಚ ಶಬ್ದಾತ್ ಆತೋದ್ಯಸಿದ್ಧಿವತ್ ತತ್ಸಿದ್ಧೇಃ
{ಪೂರ್ವಪಕ್ಷಸೂತ್ರಮ್}
೨.೧.೧೬ \ ಪ್ರಮೇಯಾ ಚ ತುಲಾಪ್ರಾಮಾಣ್ಯವತ್
{ಪೂರ್ವಪಕ್ಷಸೂತ್ರಮ್}
೨.೧.೧೭ \ ಪ್ರಮಾಣತಃ ಸಿದ್ಧೇಃ ಪ್ರಮಾಣಾನಾಮ್ ಪ್ರಮಾಣಾನ್ತರಸಿದ್ಧಿಪ್ರಸಙ್ಗಃ
{ಪೂರ್ವಪಕ್ಷಸೂತ್ರಮ್}
೨.೧.೧೮ \ ತದ್ವಿನಿವೃತ್ತೇಃ ವಾ ಪ್ರಮಾಣಸಿದ್ಧಿವತ್ ಪ್ರಮೇಯಸಿದ್ಧಿಃ
{ಪೂರ್ವಪಕ್ಷಸೂತ್ರಮ್}
೨.೧.೧೯ \ ನ, ಪ್ರದೀಪಪ್ರಕಾಶಸಿದ್ಧಿವತ್ ತತ್ಸಿದ್ಧೇಃ
{ಸಿದ್ಧಾನ್ತಲಕ್ಷಣಮ್}
೨.೧.೨೦ \ ಕ್ವಚಿತ್ ನಿವೃತ್ತಿದರ್ಶನಾತ್ ಅನಿವೃತ್ತಿದರ್ಶನಾತ್ ಚ ಕ್ವಚಿತ್ ಅನೇಕಾನ್ತಃ
{ಸಿದ್ಧಾನ್ತಲಕ್ಷಣಮ್}
॥ಪ್ರತ್ಯಕ್ಷಪರೀಕ್ಷಾಪ್ರಕರಣಾಮ್॥
೨.೧.೨೧ \ ಪ್ರತ್ಯಕ್ಷಲಕ್ಷಣಾನುಪಪತ್ತಿಃ ಅಸಮಗ್ರವಚನಾತ್
{ಪ್ರತ್ಯಕ್ಷಲಕ್ಷಣ-}
{ಪ್ರತ್ಯಕ್ಷಲಕ್ಷಣಪರೀಕ್ಷಾ}
೨.೧.೨೨ \ ನ ಆತ್ಮಮನಸೋಃ ಸನ್ನಿಕರ್ಷಾಭಾವೇ ಪ್ರತ್ಯಕ್ಷೋತ್ಪತ್ತಿಃ
{ಪ್ರತ್ಯಕ್ಷಲಕ್ಷಣಪರೀಕ್ಷಾ}
೨.೧.೨೩ \ ದಿಗ್ದೇಶಕಾಲಾಕಾಶೇಷು ಅಪಿ ಏವಂ ಪ್ರಸಙ್ಗಃ
{ಪ್ರತ್ಯಕ್ಷಲಕ್ಷಣಪರೀಕ್ಷಾ}
೨.೧.೨೪ \ ಜ್ಞಾನಲಿಙ್ಗತ್ವಾತ್ ಆತ್ಮನಃ ನ ಅನವರೋಧಃ
{ಪ್ರತ್ಯಕ್ಷಲಕ್ಷಣ-ಸಿದ್ಧಾನ್ತ-ಸೂತ್ರಮ್}
೨.೧.೨೫ \ ತದಯೌಗಪದ್ಯಲಿಙ್ಗತ್ವಾತ್ ಚ ನ ಮನಸಃ
{ಪ್ರತ್ಯಕ್ಷಲಕ್ಷಣ-ಸಿದ್ಧಾನ್ತ-ಸೂತ್ರ}
೨.೧.೨೬ \ ಪ್ರತ್ಯಕ್ಷನಿಮಿತ್ತತ್ವಾತ್ ಚ ಇನ್ದ್ರಿಯಾರ್ಥಯೋಃ ಸನ್ನಿಕರ್ಷಸ್ಯ ಸ್ವಶಬ್ದೇನ ವಚನಮ್
{ಪ್ರತ್ಯಕ್ಷಲಕ್ಷಣ-ಸಿದ್ಧಾನ್ತ-ಸೂತ್ರ}
೨.೧.೨೭ \ ಸುಪ್ತವ್ಯಾಸಕ್ತಮನಸಾಂ ಚ ಇನ್ದ್ರಿಯಾರ್ಥಯೋಃ ಸನ್ನಿಕರ್ಷನಿಮಿತ್ತತ್ವಾತ್
{ಪ್ರತ್ಯಕ್ಷಲಕ್ಷಣ-ಸಿದ್ಧಾನ್ತ-ಸೂತ್ರ}
೨.೧.೨೮ \ ತೈಃ ಚ ಅಪದೇಶಃ ಜ್ಞಾನವಿಶೇಷಾಣಾಮ್
{ಪ್ರತ್ಯಕ್ಷಲಕ್ಷಣ-ಸಿದ್ಧಾನ್ತ-ಸೂತ್ರ}
೨.೧.೨೯ \ ವ್ಯಾಹತತ್ವಾತ್ ಅಹೇತುಃ
{ಪ್ರತ್ಯಕ್ಷಲಕ್ಷಣ-ಸಿದ್ಧಾನ್ತ-ಸೂತ್ರ}
೨.೧.೩೦ \ ನ ಅರ್ಥವಿಶೇಷಪ್ರಾಬಲ್ಯಾತ್
{ಪ್ರತ್ಯಕ್ಷಲಕ್ಷಣ-ಸಿದ್ಧಾನ್ತ-ಸೂತ್ರ}
॥ವಿಷಯಪರೀಕ್ಷಾ-ಪ್ರಕರಣಾಮ್॥
೨.೧.೩೧ \ ಪ್ರತ್ಯಕ್ಷಮ್ ಅನುಮಾನಮ್ ಏಕದೇಶಗ್ರಹಣಾತ್ ಉಪಲಬ್ಧೇಃ
{ಪೂರ್ವಪಕ್ಷ-ಸೂತ್ರ}
೨.೧.೩೨ \ ನ, ಪ್ರತ್ಯಕ್ಷೇಣ ಯಾವತ್ ತಾವತ್ ಅಪಿ ಉಪಲಮ್ಭಾತ್
{ಸಿದ್ಧಾನ್ತ-ಸೂತ್ರ}
೨.೧.೩೩ \ ನ ಚೈಕದೇಶೋಪಲಬ್ಧಿರವಯವಿಸದ್ಭಾವಾತ್
{ಸಿದ್ಧಾನ್ತ-ಸೂತ್ರ}
॥ಪ್ರಸಙ್ಗೋಪಾತ್ತಾ ಅವಯವಿಪರೀಕ್ಷಾ॥
೨.೧.೩೪ \ ಸಾಧ್ಯತ್ವಾತ್ ಅವಯವಿನಿ ಸನ್ದೇಹಃ
{ಪೂರ್ವಪಕ್ಷ-ಸೂತ್ರ}
೨.೧.೩೫ \ ಸರ್ವಾಗ್ರಹಣಮ್ ಅವಯವ್ಯಸಿದ್ಧೇಃ
{ಸಿದ್ಧಾನ್ತ-ಸೂತ್ರ}
೨.೧.೩೬ \ ಧಾರಣಾಕರ್ಷಣೋಪಪತ್ತೇಃ ಚ
{ಸಿದ್ಧಾನ್ತ-ಸೂತ್ರ}
೨.೧.೩೭ \ ಸೇನಾವನವತ್ ಗ್ರಹಣಮ್ ಇತಿ ಚೇತ್ ನ ಅತೀನ್ದ್ರಿಯತ್ವಾತ್ ಅಣೂನಾಮ್
{ಸಿದ್ಧಾನ್ತ-ಸೂತ್ರ}
॥ಅನುಮಾನಪರೀಕ್ಷಾಪ್ರಕರಣಮ್॥
೨.೧.೩೮ \ ರೋಧೋಪಘಾತಸಾದೃಶ್ಯೇಭ್ಯಃ ವ್ಯಭಿಚಾರಾತ್ ಅನುಮಾನಮ್ ಅಪ್ರಮಾಣಮ್
{ಪೂರ್ವಪಕ್ಷ-ಸೂತ್ರ}
೨.೧.೩೯ \ ನ, ಏಕದೇಶತ್ರಾಸಸಾದೃಶ್ಯೇಭ್ಯಃ ಅರ್ಥಾನ್ತರಭಾವಾತ್
{ಸಿದ್ಧಾನ್ತ-ಸೂತ್ರ}
{ವರ್ತಮಾನಕಾಲಪರೀಕ್ಷಾ}
೨.೧.೪೦ \ ವರ್ತಮಾನಾಭಾವಃ, ಪತತಃ ಪತಿತಪತಿತವ್ಯಕಾಲೋಪಪತ್ತೇಃ
{ಪೂರ್ವಪಕ್ಷ-ಸೂತ್ರ}
೨.೧.೪೧ \ ತಯೋಃ ಅಪಿ ಅಭಾವಃ ವರ್ತಮಾನಾಭಾವೇ, ತದಪೇಕ್ಷತ್ವಾತ್
{ಸಿದ್ಧಾನ್ತ-ಸೂತ್ರ}
೨.೧.೪೨ \ ನ ಅತೀತಾನಾಗತಯೋಃ ಇತರೇತರಾಪೇಕ್ಷಾ ಸಿದ್ಧಿಃ
{ಸಿದ್ಧಾನ್ತ-ಸೂತ್ರ}
೨.೧.೪೩ \ ವರ್ತಮಾನಾಭಾವೇ ಸರ್ವಾಗ್ರಹಣಂ ಪ್ರತ್ಯಕ್ಷಾನುಪಪತ್ತೇಃ
{ಸಿದ್ಧಾನ್ತ-ಸೂತ್ರ}
೨.೧.೪೪ \ ಕೃತತಾಕರ್ತ್ತವ್ಯತೋಪಪತ್ತೇಃ ತು ಉಭಯಥಾ ಗ್ರಹಣಮ್
{ಸಿದ್ಧಾನ್ತ-ಸೂತ್ರ}
॥ಉಪಮಾನಪರೀಕ್ಷಾಪ್ರಕರಣಮ್॥
೨.೧.೪೫ \ ಅತ್ಯನ್ತಪ್ರಾಯೈಕದೇಶಸಾಧರ್ಮ್ಯಾತ್ ಉಪಮಾನಾಸಿದ್ಧಿಃ
{ಸಿದ್ಧಾನ್ತ-ಸೂತ್ರ}
೨.೧.೪೬ \ ಪ್ರಸಿದ್ಧಸಾಧರ್ಮ್ಯಾತ್ ಉಪಮಾನಸಿದ್ಧೇಃ ಯಥೋಕ್ತದೋಷಾನುಪಪತ್ತಿಃ
{ಪೂರ್ವಪಕ್ಷ-ಸೂತ್ರ}
೨.೧.೪೭ \ ಪ್ರತ್ಯಕ್ಷೇಣ ಅಪ್ರತ್ಯಕ್ಷಸಿದ್ಧೇಃ
{ಸಿದ್ಧಾನ್ತ-ಸೂತ್ರ}
೨.೧.೪೮ \ ನ ಅಪ್ರತ್ಯಕ್ಷೇ ಗವಯೇ ಪ್ರಮಾಣಾರ್ಥಮ್ ಉಪಮಾನಸ್ಯ ಪಶ್ಯಾಮಃ
{ಸಿದ್ಧಾನ್ತ-ಸೂತ್ರ}
೨.೧.೪೯ \ ತಥಾ ಇತಿ ಉಪಸಂಹಾರಾತ್ ಉಪಮಾನಸಿದ್ಧೇಃ ನ ಅವಿಶೇಷಃ
{ಸಿದ್ಧಾನ್ತ-ಸೂತ್ರ}
॥ಶಬ್ದಸಾಮಾನ್ಯಪರೀಕ್ಷಾಪ್ರಕರಣಮ್॥
೨.೧.೫೦ \ ಶಬ್ದಃ ಅನುಮಾನಮ್ ಅರ್ಥಸ್ಯ ಅನುಪಲಬ್ಧೇಃ ಅನುಮೇಯತ್ವಾತ್
{ಪೂರ್ವಪಕ್ಷ-ಸೂತ್ರ}
೨.೧.೫೧ \ ಉಪಲಬ್ಧೇಃ ಅದ್ವಿಪ್ರವೃತ್ತಿತ್ವಾತ್
{ಪೂರ್ವಪಕ್ಷ-ಸೂತ್ರ}
೨.೧.೫೨ \ ಸಮ್ಬನ್ಧಾತ್ ಚ
{ಪೂರ್ವಪಕ್ಷ-ಸೂತ್ರ}
೨.೧.೫೩ \ ಆಪ್ತೋಪದೇಶಸಾಮರ್ಥ್ಯಾತ್ ಶಬ್ದಾತ್ ಅರ್ಥಸಮ್ಪ್ರತ್ಯಯಃ
{ಸಿದ್ಧಾನ್ತ-ಸೂತ್ರ}
೨.೧.೫೪ \ ಪೂರಣಪ್ರದಾಹಪಾಟನಾನುಪಲಬ್ಧೇಃ ಚ ಸಮ್ಬನ್ಧಾಭಾವಃ
{ಸಿದ್ಧಾನ್ತ-ಸೂತ್ರ}
೨.೧.೫೫ \ ಶಬ್ದಾರ್ಥವ್ಯವಸ್ಥಾನಾತ್ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೨.೧.೫೬ \ ನ, ಸಾಮಯಿಕತ್ವಾತ್ ಶಬ್ದಾರ್ಥಸಮ್ಪ್ರತ್ಯಯಸ್ಯ
{ಸಿದ್ಧಾನ್ತ-ಸೂತ್ರ}
೨.೧.೫೭ \ ಜಾತಿವಿಶೇಷೇ ಚ ಅನಿಯಮಾತ್
{ಸಿದ್ಧಾನ್ತ-ಸೂತ್ರ}
॥ಶಬ್ದವಿಶೇಷಪರೀಕ್ಷಾಪ್ರಕರಣಮ್॥
೨.೧.೫೮ \ ತದಪ್ರಾಮಾಣ್ಯಮ್ ಅನೃತವ್ಯಾಘಾತಪುನರುಕ್ತದೋಷೇಭ್ಯಃ
{ಸಿದ್ಧಾನ್ತ-ಸೂತ್ರ}
೨.೧.೫೯ \ ನ, ಕರ್ಮಕರ್ತೃಸಾಧನವೈಗುಣ್ಯಾತ್
{ಸಿದ್ಧಾನ್ತ-ಸೂತ್ರ}
೨.೧.೬೦ \ ಅಭ್ಯುಪೇತ್ಯ ಕಾಲಭೇದೇ ದೋಷವಚನಾತ್
{ಸಿದ್ಧಾನ್ತ-ಸೂತ್ರ}
೨.೧.೬೧ \ ಅನುವಾದೋಪಪತ್ತೇಃ ಚ
{ಸಿದ್ಧಾನ್ತ-ಸೂತ್ರ}
೨.೧.೬೨ \ ವಾಕ್ಯವಿಭಾಗಸ್ಯ ಚ ಅರ್ಥಗ್ರಹಣಾತ್
{ಸಿದ್ಧಾನ್ತ-ಸೂತ್ರ}
೨.೧.೬೩ \ ವಿಧ್ಯರ್ಥವಾದಾನುವಾದವಚನವಿನಿಯೋಗಾತ್
{ಸಿದ್ಧಾನ್ತ-ಸೂತ್ರ}
೨.೧.೬೪ \ ವಿಧಿಃ ವಿಧಾಯಕಃ
{ಸಿದ್ಧಾನ್ತ-ಸೂತ್ರ}
೨.೧.೬೫ \ ಸ್ತುತಿಃ ನಿನ್ದಾ ಪರಕೃತಿಃ ಪುರಾಕಲ್ಪಃ ಇತಿ ಅರ್ಥವಾದಃ
{ಸಿದ್ಧಾನ್ತ-ಸೂತ್ರ}
{ಅರ್ಥವಾದ-ಭೇದಃ}
೨.೧.೬೬ \ ವಿಧಿವಿಹಿತಸ್ಯ ಅನುವಚನಮ್ ಅನುವಾದಃ
{ಅರ್ಥವಾದ-}
೨.೧.೬೭ \ ನ ಅನುವಾದಪುನರುಕ್ತಯೋಃ ವಿಶೇಷಃ, ಶಬ್ದಾಭ್ಯಾಸೋಪಪತ್ತೇಃ
{ಸಿದ್ಧಾನ್ತ-ಸೂತ್ರ}
೨.೧.೬೮ \ ಶೀಘ್ರತರಗಮನೋಪದೇಶವತ್ ಅಭ್ಯಾಸಾತ್ ನ ಅವಿಶೇಷಃ
{ಸಿದ್ಧಾನ್ತ-ಸೂತ್ರ}
೨.೧.೬೯ \ ಮನ್ತ್ರಾಯುರ್ವೇದಪ್ರಾಮಾಣ್ಯವತ್ ಚ ತತ್ಪ್ರಾಮಾಣ್ಯಮ್, ಆಪ್ತಪ್ರಾಮಾಣ್ಯಾತ್
{ಸಿದ್ಧಾನ್ತ-ಸೂತ್ರ}
(ಇತಿ ನ್ಯಾಯಸೂತ್ರೇ ದ್ವಿತೀಯಾಧ್ಯಾಯಸ್ಯ ಪ್ರಥಮಮ್ ಆಹ್ನಿಕಮ್)
(ದ್ವಿತೀಯಮ್ ಆಹ್ನಿಕಮ್)
॥ಪ್ರಮಾಣಚತುಷ್ಟ್ವಪರೀಕ್ಷಾಪ್ರಕರಣಮ್॥
೨.೨.೧ \ ನ ಚತುಷ್ಟ್ವಮ್, ಐತಿಹ್ಯಾರ್ಥಾಪತ್ತಿಸಮ್ಭವಾಭಾವಪ್ರಾಮಾಣ್ಯಾತ್
{ಪೂರ್ವಪಕ್ಷ-ಸೂತ್ರ}
೨.೨.೨ \ ಶಬ್ದೇ ಐತಿಹ್ಯಾನರ್ಥಾನ್ತರಭಾವಾತ್ ಅನುಮಾನೇ ಅರ್ಥಾಪತ್ತಿಸಮ್ಭವಾಭಾವಾನರ್ಥಾನ್ತರ ಭಾವಾತ್ ಚ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೨.೨.೩ \ ಅರ್ಥಾಪತ್ತಿಃ ಅಪ್ರಮಾಣಮ್ ಅನೈಕಾನ್ತಿಕತ್ವಾತ್
{ಅರ್ಥಾಪತ್ತಿಪ್ರಾಮಾಣ್ಯಪರೀಕ್ಷಾ}
೨.೨.೪ \ ಅನರ್ಥಾಪತ್ತೌ ಅರ್ಥಾಪತ್ತ್ಯಭಿಮಾನಾತ್
{ನಾನೈಕಾನ್ತಿಕತ್ವಮರ್ಥಾಪತ್ತೇಃ}
೨.೨.೫ \ ಪ್ರತಿಷೇಧಾಪ್ರಾಮಾಣ್ಯಂ ಚ ಅನೈಕಾನ್ತಿಕತ್ವಾತ್
??
೨.೨.೬ \ ತತ್ಪ್ರಾಮಾಣ್ಯೇ ವಾ ನ ಅರ್ಥಾಪತ್ತ್ಯಪ್ರಾಮಾಣ್ಯಮ್
{ಸಿದ್ಧಾನ್ತ-ಸೂತ್ರ}
॥ಅಭಾವಪ್ರಾಮಾಣ್ಯಸಿದ್ಧಿಃ - ಅವಾನ್ತರಪ್ರಕರಣಮ್॥
೨.೨.೭ \ ನ ಅಭಾವಪ್ರಾಮಾಣ್ಯಂ ಪ್ರಮೇಯಾಸಿದ್ಧೇಃ
{ಪೂರ್ವಪಕ್ಷ-ಸೂತ್ರ}
೨.೨.೮ \ ಲಕ್ಷಿತೇಷ್ವಲಕ್ಷಣಲಕ್ಷಿತತ್ವಾತ್ ಅಲಕ್ಷಿತಾನಾಂ ತತ್ಪ್ರಮೇಯಸಿದ್ಧೇಃ
{ಉದಾಹರಣ ಸೂತ್ರ}
೨.೨.೯ \ ಅಸತಿ ಅರ್ಥೇ ನ ಅಭಾವಃ ಇತಿ ಚೇತ್ ನ, ಅನ್ಯಲಕ್ಷಣೋಪಪತ್ತೇಃ
{ಸಿದ್ಧಾನ್ತ-ಸೂತ್ರ}
೨.೨.೧೦ \ ತತ್ಸಿದ್ಧೇಃ ಅಲಕ್ಷಿತೇಷು ಅಹೇತುಃ
{ಪೂರ್ವಪಕ್ಷ-ಸೂತ್ರ}
೨.೨.೧೧ \ ನ, ಲಕ್ಷಣಾವಸ್ಥಿತಾಪೇಕ್ಷಸಿದ್ಧೇಃ
{ಸಿದ್ಧಾನ್ತ-ಸೂತ್ರ}
೨.೨.೧೨ \ ಪ್ರಾಕ್ ಉತ್ಪತ್ತೇಃ ಅಭಾವೋಪಪತ್ತೇಃ ಚ
{ಸಿದ್ಧಾನ್ತ-ಸೂತ್ರ}
॥ಶಬ್ದಾನಿತ್ಯತ್ವಪರೀಕ್ಷಾಪ್ರಕರಣಮ್ (೧೩-೩೯)॥
೨.೨.೧೩ \ ಆದಿಮತ್ವಾತ್ ಐನ್ದ್ರಿಯಕತ್ವಾತ್ ಕೃತಕವತ್ ಉಪಚಾರಾತ್ ಚ
{ಶಬ್ದಾನಿತ್ಯತ್ವ-ಪ್ರತಿಪಾದನ-ಸೂತ್ರ}
೨.೨.೧೪ \ ನ, ಘಟಾಭಾವಸಾಮಾನ್ಯನಿತ್ಯತ್ವಾತ್ ನಿತ್ಯೇಷು ಅಪಿ ಅನಿತ್ಯವತ್ ಉಪಚಾರಾತ್ ಚ
{ಸಿದ್ಧಾನ್ತ-ಸೂತ್ರ}
೨.೨.೧೫ \ ತತ್ತ್ವಭಾಕ್ತಯೋಃ ನಾನಾತ್ವವಿಭಾಗಾತ್ ಅವ್ಯಭಿಚಾರಃ
{ಶಬ್ದಾನಿತ್ಯತ್ವ-ಪ್ರತಿಪಾದನ-ಸೂತ್ರ}
{ಸಿದ್ಧಾನ್ತ-ಸೂತ್ರ}
೨.೨.೧೬ \ ಸನ್ತಾನಾನುಮಾನವಿಶೇಷಣಾತ್
{ಶಬ್ದಾನಿತ್ಯತ್ವ-ಪ್ರತಿಪಾದನ-ಸೂತ್ರ}
{ಸಿದ್ಧಾನ್ತ-ಸೂತ್ರ}
೨.೨.೧೭ \ ಕಾರಣದ್ರವ್ಯಸ್ಯ ಪ್ರದೇಶಶಬ್ದೇನಾಭಿಧಾನಾತ್
{ಶಬ್ದಾನಿತ್ಯತ್ವ-ಪ್ರತಿಪಾದನ-ಸೂತ್ರ}
{ಸಿದ್ಧಾನ್ತ-ಸೂತ್ರ}
೨.೨.೧೮ \ ಪ್ರಾಕ್ ಉಚ್ಚಾರಣಾತ್ ಅನುಪಲಬ್ಧೇಃ ಆವರಣಾದ್ಯನುಪಲಬ್ಧೇಃ ಚ
{ಶಬ್ದಾನಿತ್ಯತ್ವ-ಪ್ರತಿಪಾದನ-ಸೂತ್ರ}
೨.೨.೧೯ \ ತದನುಪಲಬ್ಧೇಃ ಅನುಪಲಮ್ಭಾತ್ ಆವರಣೋಪಪತ್ತಿಃ
{ಶಬ್ದಾನಿತ್ಯತ್ವ-ಪ್ರತಿಪಾದನ-ಸೂತ್ರ}
೨.೨.೨೦ \ ಅನುಪಲಮ್ಭಾತ್ ಅನುಪಲಬ್ಧಿಸದ್ಭಾವಾತ್ ನ ಆವರಣಾನುಪಪತ್ತಿಃ ಅನುಪಲಮ್ಭಾತ್
{ಸಿದ್ಧಾನ್ತ-ಸೂತ್ರ}
೨.೨.೨೧ \ ಅನುಪಲಮ್ಭಾತ್ಮಕತ್ವಾತ್ ಅನುಪಲಬ್ಧೇಃ ಅಹೇತುಃ
{ಸಿದ್ಧಾನ್ತ-ಸೂತ್ರ}
೨.೨.೨೨ \ ಅಸ್ಪರ್ಶತ್ವಾತ್
{ಸಿದ್ಧಾನ್ತ-ಸೂತ್ರ}
೨.೨.೨೩ \ ನ, ಕರ್ಮಾನಿತ್ಯತ್ವಾತ್
{ಸಿದ್ಧಾನ್ತ-ಸೂತ್ರ}
೨.೨.೨೪ \ ನ, ಅಣುನಿತ್ಯತ್ವಾತ್
{ಸಿದ್ಧಾನ್ತ-ಸೂತ್ರ}
೨.೨.೨೫ \ ಸಮ್ಪ್ರದಾನಾತ್
{ಸಿದ್ಧಾನ್ತ-ಸೂತ್ರ}
೨.೨.೨೬ \ ತದನ್ತರಾಲಾನುಪಲಬ್ಧೇಃ ಅಹೇತುಃ
{ಸಿದ್ಧಾನ್ತ-ಸೂತ್ರ}
೨.೨.೨೭ \ ಅಧ್ಯಾಪನಾತ್ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೨.೨.೨೮ \ ಉಭಯೋಃ ಪಕ್ಷಯೋಃ ಅನ್ಯತರಸ್ಯ ಅಧ್ಯಾಪನಾತ್ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೨.೨.೨೯ \ ಅಭ್ಯಾಸಾತ್
{ಸಿದ್ಧಾನ್ತ-ಸೂತ್ರ}
೨.೨.೩೦ \ ನ ಅನ್ಯತ್ವೇ ಅಪಿ ಅಭ್ಯಾಸಸ್ಯ ಉಪಚಾರಾತ್
{ಸಿದ್ಧಾನ್ತ-ಸೂತ್ರ}
೨.೨.೩೧ \ ಅನ್ಯತ್ ಅನ್ಯಸ್ಮಾತ್ ಅನನ್ಯತ್ವಾತ್ ಅನನ್ಯತ್ ಇತಿ ಅನ್ಯತಾಭಾವಃ
{ಸಿದ್ಧಾನ್ತ-ಸೂತ್ರ}
೨.೨.೩೨ \ ತದಭಾವೇ ನ ಅಸ್ತಿ ಅನನ್ಯತಾ, ತಯೋಃ ಇತರೇತರಾಪೇಕ್ಷಸಿದ್ಧೇಃ
{ಸಿದ್ಧಾನ್ತ-ಸೂತ್ರ}
೨.೨.೩೩ \ ವಿನಾಶಕಾರಣಾನುಪಲಬ್ಧೇಃ
{ಸಿದ್ಧಾನ್ತ-ಸೂತ್ರ}
೨.೨.೩೪ \ ಅಶ್ರವಣಕಾರಣಾನುಪಲಬ್ಧೇಃ ಸತತಶ್ರವಣಪ್ರಸಙ್ಗಃ
{ಸಿದ್ಧಾನ್ತ-ಸೂತ್ರ}
೨.೨.೩೫ \ ಉಪಲಭ್ಯಮಾನೇ ಚ ಅನುಪಲಬ್ಧೇಃ ಅಸತ್ತ್ವಾತ್ ಅನಪದೇಶಃ
{ಸಿದ್ಧಾನ್ತ-ಸೂತ್ರ}
೨.೨.೩೬ \ ಪಾಣಿನಿಮಿತ್ತಪ್ರಶ್ಲೇಷಾತ್ ಶಬ್ದಾಭಾವೇ ನ ಅನುಪಲಬ್ಧಿಃ
{ಸಿದ್ಧಾನ್ತ-ಸೂತ್ರ}
೨.೨.೩೭ \ ವಿನಾಶಕಾರಣಾನುಪಲಬ್ಧೇಃ ಚ ಅವಸ್ಥಾನೇ ತನ್ನಿತ್ಯತ್ವಪ್ರಸಙ್ಗಃ
{ಸಿದ್ಧಾನ್ತ-ಸೂತ್ರ}
೨.೨.೩೮ \ ಅಸ್ಪರ್ಶತ್ವಾತ್ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೨.೨.೩೯ \ ವಿಭಕ್ತ್ಯನ್ತರೋಪಪತ್ತೇಃ ಚ ಸಮಾಸೇ
{ಸಿದ್ಧಾನ್ತ-ಸೂತ್ರ}
॥ಶಬ್ದಪರಿಣಾಮಪರೀಕ್ಷಾಪ್ರಕರಣಮ್ (೪೦-೫೬)॥
೨.೨.೪೦ \ ವಿಕಾರಾದೇಶೋಪದೇಶಾತ್ ಸಂಶಯಃ
{ಪೂರ್ವಪಕ್ಷ-ಸೂತ್ರ}
೨.೨.೪೧ \ ಪ್ರಕೃತಿವಿವೃದ್ಧೌ ವಿಕಾರವಿವೃದ್ಧೇಃ
{ಸಿದ್ಧಾನ್ತ-ಸೂತ್ರ}
೨.೨.೪೨ \ ನ್ಯೂನಸಮಾಧಿಕೋಪಲಬ್ಧೇಃ ವಿಕಾರಾಣಾಮ್ ಅಹೇತುಃ
{ಸಿದ್ಧಾನ್ತ-ಸೂತ್ರ}
೨.೨.೪೩ \ ದ್ವಿವಿಧಸ್ಯ ಅಪಿ ಹೇತೋಃ ಅಭಾವಾತ್ ಅಸಾಧನಂ ದೃಷ್ಟಾನ್ತಃ
{ಉದಾಹರಣಸೂತ್ರ}
೨.೨.೪೪ \ ನ, ಅತುಲ್ಯಪ್ರಕೃತೀನಾಮ್ ವಿಕಾರವಿಕಲ್ಪಾತ್
{ಸಿದ್ಧಾನ್ತ-ಸೂತ್ರ}
೨.೨.೪೫ \ ದ್ರವ್ಯವಿಕಾರವೈಷಮ್ಯವತ್ ವರ್ಣವಿಕಾರವಿಕಲಃ
{ಪೂರ್ವಪಕ್ಷ-ಸೂತ್ರ}
೨.೨.೪೬ \ ನ, ವಿಕಾರಧರ್ಮಾನುಪಪತ್ತೇಃ
{ಸಿದ್ಧಾನ್ತ-ಸೂತ್ರ}
೨.೨.೪೭ \ ವಿಕಾರಪ್ರಾಪ್ತಾನಾಮ್ ಅಪುನರಾಪತ್ತೇಃ
{ಸಿದ್ಧಾನ್ತ-ಸೂತ್ರ}
೨.೨.೪೮ \ ಸುವರ್ಣಾದೀನಾಂ ಪುನರಾಪತ್ತೇಃ ಅಹೇತುಃ
{ಪೂರ್ವಪಕ್ಷ-ಸೂತ್ರ}
೨.೨.೪೯ \ ನ, ತದ್ವಿಕಾರಾಣಾಂ ಸುವರ್ಣಭಾವಾವ್ಯತಿರೇಕಾತ್
{ಸಿದ್ಧಾನ್ತ-ಸೂತ್ರ}
೨.೨.೫೦ \ ವರ್ಣತ್ವಾವ್ಯತಿರೇಕಾತ್ ವರ್ಣವಿಕಾರಾಣಾಮ್ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೨.೨.೫೧ \ ಸಾಮಾನ್ಯವತೋ ಧರ್ಮಯೋಗೋ ನ ಸಾಮಾನ್ಯಸ್ಯ
{ಸಿದ್ಧಾನ್ತ-ಸೂತ್ರ}
೨.೨.೫೨ \ ನಿತ್ಯತ್ವೇ ಅವಿಕಾರಾತ್ ಅನಿತ್ಯತ್ವೇ ಚ ಅನವಸ್ಥಾನಾತ್
{ಸಿದ್ಧಾನ್ತ-ಸೂತ್ರ}
೨.೨.೫೩ \ ನಿತ್ಯಾನಾಮ್ ಅತೀನ್ದ್ರಿಯತ್ವಾತ್ ತದ್ಧರ್ಮವಿಕಲ್ಪಾತ್ ಚ ವರ್ಣವಿಕಾರಾಣಾಮ್ ಅಪ್ರತಿಷೇಧಃ
{ಪೂರ್ವಪಕ್ಷ-ಸೂತ್ರ}
೨.೨.೫೪ \ ಅನವಸ್ಥಾಯಿತ್ವೇ ಚ ವರ್ಣೋಪಲಬ್ಧಿವತ್ ತದ್ವಿಕಾರೋಪಪತ್ತಿಃ
{ಪೂರ್ವಪಕ್ಷ-ಸೂತ್ರ}
೨.೨.೫೫ \ ವಿಕಾರಧರ್ಮಿತ್ವೇ ನಿತ್ಯತ್ವಾಭಾವಾತ್ ಕಾಲಾನ್ತರೇ ವಿಕಾರೋಪಪತ್ತೇಃ ಚ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೨.೨.೫೬ \ ಪ್ರಕೃತ್ಯನಿಯಮಾತ್
{ಸಿದ್ಧಾನ್ತ-ಸೂತ್ರ}
೨.೨.೫೭ \ ಅನಿಯಮೇ ನಿಯಮಾತ್ ನ ಅನಿಯಮಃ
{ಪೂರ್ವಪಕ್ಷ-ಸೂತ್ರ}
೨.೨.೫೮ \ ನಿಯಮಾನಿಯಮವಿರೋಧಾತ್ ಅನಿಯಮೇ ನಿಯಮಾತ್ ಚ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೨.೨.೫೯ \ ಗುಣಾನ್ತರಾಪತ್ತ್ಯುಪಮರ್ದ-ಹ್ರಾಸ-ವೃದ್ಧಿ-ಶ್ಲೇಷೇಭ್ಯಃ ತು ವಿಕಾರೋಪಪತ್ತೇಃ ವರ್ಣವಿಕಾರಾಃ
{ಸಿದ್ಧಾನ್ತ-ಸೂತ್ರ}
॥ಶಬ್ದಶಕ್ತಿಪರೀಕ್ಷಾಪ್ರಕರಣಮ್॥
೨.೨.೬೦ \ ತೇ ವಿಭಕ್ತ್ಯನ್ತಾಃ ಪದಮ್
{ಪದ-ಲಕ್ಷಣ-ಸೂತ್ರಮ್}
೨.೨.೬೧ \ ವ್ಯಕ್ತ್ಯಾಕೃತಿಜಾತಿಸನ್ನಿಧೌ ಉಪಚಾರಾತ್ ಸಂಶಯಃ
{ಪೂರ್ವಪಕ್ಷ-ಸೂತ್ರ}
॥ವ್ಯಕ್ತಿವಾದ-ಅವಾನ್ತರಪ್ರಕರಣಮ್॥
೨.೨.೬೨ \ ಯಾಶಬ್ದ-ಸಮೂಹ-ತ್ಯಾಗ-ಪರಿಗ್ರಹ-ಸಙ್ಖ್ಯಾ-ವೃದ್ಧ್ಯಪಚಯ-ವರ್ಣ-ಸಮಾಸಾನುಬನ್ಧಾನಾಮ್ ವ್ಯಕ್ತೌ ಉಪಚಾರಾತ್ ವ್ಯಕ್ತಿಃ
{ಪೂರ್ವಪಕ್ಷ-ಸೂತ್ರ}
೨.೨.೬೩ \ ನ, ತತ್ ಅನವಸ್ಥಾನಾತ್
{ಸಿದ್ಧಾನ್ತ-ಸೂತ್ರ}
೨.೨.೬೪ \ ಸಹಚರಣ-ಸ್ಥಾನ-ತಾದರ್ಥ್ಯ-ವೃತ್ತ-ಮಾನ-ಧಾರಣ-ಸಾಮೀಪ್ಯ-ಯೋಗ-ಸಾಧನಾಧಿಪತ್ಯೇಭ್ಯಃ
ಬ್ರಾಹ್ಮಣ-ಮಞ್ಚ-ಕಟ-ರಾಜ-ಸಕ್ತು-ಚನ್ದನ-ಗಙ್ಗಾ-ಶಾಟಕಾನ್ನ-ಪುರುಷೇಷ್ವತದ್ಭಾವೇ ಅಪಿ ತದುಪಚಾರಃ
{ಸಿದ್ಧಾನ್ತ-ಸೂತ್ರ}
॥ಆಕೃತಿವಾದ-ಅವಾನ್ತರಪ್ರಕರಣಮ್॥
೨.೨.೬೫ \ ಆಕೃತಿಃ, ತದಪೇಕ್ಷತ್ವಾತ್ ಸತ್ತ್ವವ್ಯವಸ್ಥಾನಸಿದ್ಧೇಃ
{ಪೂರ್ವಪಕ್ಷ-ಸೂತ್ರ}
॥ಜಾತಿವಾದ-ಅವಾನ್ತರಪ್ರಕರಣಮ್॥
೨.೨.೬೬ \ ವ್ಯಕ್ತ್ಯಾಕೃತಿಯುಕ್ತೇ ಅಪಿ ಅಪ್ರಸಙ್ಗಾತ್ ಪ್ರೋಕ್ಷಣಾದಿನಾಂ ಮೃದ್ಗವಕೇ ಜಾತಿಃ
{ಪೂರ್ವಪಕ್ಷ-ಸೂತ್ರ}
೨.೨.೬೭ \ ನ, ಆಕೃತಿವ್ಯಕ್ತ್ಯಪೇಕ್ಷತ್ವಾತ್ ಜಾತ್ಯಭಿವ್ಯಕ್ತೇಃ
{ಸಿದ್ಧಾನ್ತ-ಸೂತ್ರ}
॥ಸಿದ್ಧಾನ್ತವಾದ-ಅವಾನ್ತರಪ್ರಕರಣಮ್॥
೨.೨.೬೮ \ ವ್ಯಕ್ತ್ಯಾಕೃತಿಜಾತಯಃ ತು ಪದಾರ್ಥಃ
{ಸಿದ್ಧಾನ್ತ-ಸೂತ್ರ}
೨.೨.೬೯ \ ವ್ಯಕ್ತಿಃ ಗುಣವಿಶೇಷಾಶ್ರಯಃ ಮೂರ್ತಿಃ
{ಸಿದ್ಧಾನ್ತ-ಸೂತ್ರ}
೨.೨.೭೦ \ ಆಕೃತಿಃ ಜಾತಿಲಿಙ್ಗಾಖ್ಯಾ
{ಸಿದ್ಧಾನ್ತ-ಸೂತ್ರ}
೨.೨.೭೧ \ ಸಮಾನಪ್ರಸವಾತ್ಮಿಕಾ ಜಾತಿಃ
{ಸಿದ್ಧಾನ್ತ-ಸೂತ್ರ}
(ಇತಿ ನ್ಯಾಯಸೂತ್ರೇ ದ್ವಿತೀಯಾಧ್ಯಾಯಸ್ಯ ದ್ವಿತೀಯಮ್ ಆಹ್ನಿಕಮ್)
ಸಮಾಪ್ತಃ ಚ ಅಯಮ್ ದ್ವಿತೀಯಾಧ್ಯಾಯಃ
(ಅಥ ತೃತೀಯಃ ಅಧ್ಯಾಯಃ)
(ಪ್ರಥಮಮ್ ಆಹ್ನಿಕಮ್)
॥ಇನ್ದ್ರಿಯವ್ಯತಿರಿಕ್ತಾತ್ಮಪರೀಕ್ಷಾಪ್ರಕರಣಂ (೧-೩)॥
೩.೧.೧ \ ದರ್ಶನಸ್ಪರ್ಶನಾಭ್ಯಾಮ್ ಏಕಾರ್ಥಗ್ರಹಣಾತ್
{ಪೂರ್ವಪಕ್ಷ-ಸೂತ್ರ}
೩.೧.೨ \ ನ, ವಿಷಯವ್ಯವಸ್ಥಾನಾತ್
{ಪೂರ್ವಪಕ್ಷ-ಸೂತ್ರ}
೩.೧.೩ \ ತದ್ವ್ಯವಸ್ಥಾನಾತ್ ಏವ ಆತ್ಮಸದ್ಭಾವಾತ್ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಶರೀರವ್ಯತಿರಿಕ್ತಾತ್ಮಪರೀಕ್ಷಾಪ್ರಕರಣಮ್॥
೩.೧.೪ \ ಶರೀರದಾಹೇ ಪಾತಕಾಭಾವಾತ್
{ಸಿದ್ಧಾನ್ತ-ಸೂತ್ರ}
೩.೧.೫ \ ತದಭಾವಃ ಸಾತ್ಮಕಪ್ರದಾಹೇ ಅಪಿ, ತನ್ನಿತ್ಯತ್ವಾತ್
{ಪೂರ್ವಪಕ್ಷ-ಸೂತ್ರ}
೩.೧.೬ \ ನ, ಕಾರ್ಯಾಶ್ರಯಕರ್ತೃವಧಾತ್
{ಸಿದ್ಧಾನ್ತ-ಸೂತ್ರ}
॥ಪ್ರಾಸಙ್ಗಿಕಂ ಚಕ್ಷುರದ್ವೈತಪರೀಕ್ಷಾಪ್ರಕರಣಮ್ (೭-೧೪)॥
೩.೧.೭ \ ಸವ್ಯದೃಷ್ಟಸ್ಯ ಇತರೇಣ ಪ್ರತ್ಯಭಿಜ್ಞಾನಾತ್
{ಸಿದ್ಧಾನ್ತ-ಸೂತ್ರ}
೩.೧.೮ \ ನ ಏಕಸ್ಮಿನ್ ನಾಸಾಸ್ಥಿವ್ಯವಹಿತೇ ದ್ವಿತ್ವಾಭಿಮಾನಾತ್
{ಪೂರ್ವಪಕ್ಷ-ಸೂತ್ರ}
೩.೧.೯ \ ಏಕವಿನಾಶೇ ದ್ವಿತೀಯಾವಿನಾಶಾತ್ ನ ಏಕತ್ವಮ್
{ಸಿದ್ಧಾನ್ತ-ಸೂತ್ರ}
೩.೧.೧೦ \ ಅವಯವನಾಶೇ ಅಪಿ ಅವಯವ್ಯುಪಲಬ್ಧೇಃ ಅಹೇತುಃ
{ಪೂರ್ವಪಕ್ಷ-ಸೂತ್ರ}
೩.೧.೧೧ \ ದೃಷ್ಟಾನ್ತವಿರೋಧಾತ್ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೩.೧.೧೨ \ ಇನ್ದ್ರಿಯಾನ್ತರವಿಕಾರಾತ್
{ಸಿದ್ಧಾನ್ತ-ಸೂತ್ರ}
೩.೧.೧೩ \ ನ, ಸ್ಮೃತೇಃ ಸ್ಮರ್ತ್ತವ್ಯವಿಷಯತ್ವಾತ್
{ಪೂರ್ವಪಕ್ಷ-ಸೂತ್ರ}
೩.೧.೧೪ \ ತದಾತ್ಮಗುಣಸದ್ಭಾವಾತ್ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಆತ್ಮಮನೋಭೇದಪರೀಕ್ಷಾಪ್ರಕರಣಮ್ (೧೫-೧೭)॥
೩.೧.೧೫ \ ನ, ಆತ್ಮಪ್ರತಿಪತ್ತಿಹೇತೂನಾಂ ಮನಸಿ ಸಮ್ಭವಾತ್
{ಪೂರ್ವಪಕ್ಷ-ಸೂತ್ರ}
೩.೧.೧೬ \ ಜ್ಞಾತುಃ ಜ್ಞಾನಸಾಧನೋಪಪತ್ತೇಃ ಸಂಜ್ಞಾಭೇದಮಾತ್ರಮ್
{ಸಿದ್ಧಾನ್ತ-ಸೂತ್ರ}
೩.೧.೧೭ \ ನಿಯಮಃ ಚ ನಿರನುಮಾನಃ
{ಸಿದ್ಧಾನ್ತ-ಸೂತ್ರ}
॥ಆತ್ಮನಿತ್ಯತ್ವಪರೀಕ್ಷಾಪ್ರಕರಣಮ್ (೧೮-೨೬)॥
೩.೧.೧೮ \ ಪೂರ್ವಾಭ್ಯಸ್ತಸ್ಮೃತ್ಯನುಬನ್ಧಾತ್ ಜಾತಸ್ಯ ಹರ್ಷಭಯಶೋಕಸಮ್ಪ್ರತಿಪತ್ತೇಃ
{ಸಿದ್ಧಾನ್ತ-ಸೂತ್ರ}
೩.೧.೧೯ \ ಪದ್ಮಾದಿಷು ಪ್ರಬೋಧಸಮ್ಮೀಲನವಿಕಾರವತ್ ತದ್ವಿಕಾರಃ
{ಪೂರ್ವಪಕ್ಷ-ಸೂತ್ರ}
೩.೧.೨೦ \ ನ, ಉಷ್ಣಶೀತವರ್ಷಾಕಾಲನಿಮಿತ್ತತ್ವಾತ್ ಪಞ್ಚಾತ್ಮಕವಿಕಾರಾಣಾಮ್
{ಸಿದ್ಧಾನ್ತ-ಸೂತ್ರ}
೩.೧.೨೧ \ ಪ್ರೇತ್ಯಾಹಾರಾಭ್ಯಾಸಕೃತಾತ್ ಸ್ತನ್ಯಾಭಿಲಾಷಾತ್
{ಸಿದ್ಧಾನ್ತ-ಸೂತ್ರ}
೩.೧.೨೨ \ ಅಯಸಃ ಅಯಸ್ಕಾನ್ತಾಭಿಗಮನವತ್ ತದುಪಸರ್ಪಣಮ್
{ಪೂರ್ವಪಕ್ಷ-ಸೂತ್ರ}
೩.೧.೨೩ \ ನ, ಅನ್ಯತ್ರ ಪ್ರವೃತ್ತ್ಯಭಾವಾತ್
{ಸಿದ್ಧಾನ್ತ-ಸೂತ್ರ}
೩.೧.೨೪ \ ವೀತರಾಗಜನ್ಮಾದರ್ಶನಾತ್
{ಸಿದ್ಧಾನ್ತ-ಸೂತ್ರ}
೩.೧.೨೫ \ ಸಗುಣದ್ರವ್ಯೋತ್ಪತ್ತಿವತ್ ತದುತ್ಪತ್ತಿಃ
{ಪೂರ್ವಪಕ್ಷ-ಸೂತ್ರ}
೩.೧.೨೬ \ ನ, ಸಙ್ಕಲ್ಪನಿಮಿತ್ತತ್ವಾತ್ ರಾಗಾದೀನಾಮ್
{ಸಿದ್ಧಾನ್ತ-ಸೂತ್ರ}
॥ಶರೀರಪರೀಕ್ಷಾಪ್ರಕರಣಮ್ (೨೭-೩೧)॥
೩.೧.೨೭ \ ಪಾರ್ಥಿವಂ ಗುಣಾನ್ತರೋಪಲಬ್ಧೇಃ
{ಸಿದ್ಧಾನ್ತ-ಸೂತ್ರ}
೩.೧.೨೮ \ ಪಾರ್ಥಿವಾಪ್ಯತೈಜಸಂ ತದ್ಗುಣೋಪಲಬ್ಧೇಃ
{ಸಿದ್ಧಾನ್ತ-ಸೂತ್ರ}
೩.೧.೨೯ \ ನಿಃಶ್ವಾಸೋಚ್ಛ್ವಾಸೋಪಲಬ್ಧೇಃ ಚಾತುರ್ಭೌನ್ತಿಕಮ್
{ಪೂರ್ವಪಕ್ಷ-ಸೂತ್ರ}
೩.೧.೩೦ \ ಗನ್ಧಕ್ಲೇದಪಾಕವ್ಯೂಹಾವಕಾಶದಾನೇಭ್ಯಃ ಪಾಞ್ಚಭೌತಿಕಮ್
{ಪೂರ್ವಪಕ್ಷ-ಸೂತ್ರ}
೩.೧.೩೧ \ ಶ್ರುತಿಪ್ರಾಮಾಣ್ಯಾತ್ ಚ
{ಸಿದ್ಧಾನ್ತ-ಸೂತ್ರ}
॥ಇನ್ದ್ರಿಯಪರೀಕ್ಷಾಪ್ರಕರಣಮ್ (೩೨-೫೧)॥
೩.೧.೩೨ \ ಕೃಷ್ಣಸಾರೇ ಸತಿ ಉಪಲಮ್ಭಾತ್ ವ್ಯತಿರಿಚ್ಯ ಚ ಉಪಲಮ್ಭಾತ್ ಸಂಶಯಃ
{ಸಿದ್ಧಾನ್ತ-ಸೂತ್ರ}
೩.೧.೩೩ \ ಮಹದಣುಗ್ರಹಣಾತ್
{ಸಾಙ್ಖ್ಯಮತಖಣ್ಡನಮ್}
೩.೧.೩೪ \ ರಶ್ಮ್ಯರ್ಥಸನ್ನಿಕರ್ಷವಿಶೇಷಾತ್ ತದ್ಗ್ರಹಣಮ್
{ಸಿದ್ಧಾನ್ತ-ಸೂತ್ರ}
೩.೧.೩೫ \ ತದನುಪಲಬ್ಧೇಃ ಅಹೇತುಃ
{ಸಿದ್ಧಾನ್ತ-ಸೂತ್ರ}
೩.೧.೩೬ \ ನ ಅನುಮೀಯಮಾನಸ್ಯ ಪ್ರತ್ಯಕ್ಷತಃ ಅನುಪಲಬ್ಧಿಃ ಅಭಾವಹೇತುಃ
{ಸಿದ್ಧಾನ್ತ-ಸೂತ್ರ}
೩.೧.೩೭ \ ದ್ರವ್ಯಗುಣಧರ್ಮಭೇದಾತ್ ಚ ಉಪಲಬ್ಧಿನಿಯಮಃ
{ಸಿದ್ಧಾನ್ತ-ಸೂತ್ರ}
೩.೧.೩೮ \ ಅನೇಕದ್ರವ್ಯಸಮವಾಯಾತ್ ರೂಪವಿಶೇಷಾತ್ ಚ ರೂಪೋಪಲಬ್ಧಿಃ
{ಸಿದ್ಧಾನ್ತ-ಸೂತ್ರ}
೩.೧.೩೯ \ ಕರ್ಮಕಾರಿತಃ ಚ ಇನ್ದ್ರಿಯಾಣಾಂ ವ್ಯೂಹಃ ಪುರುಷಾರ್ಥತನ್ತ್ರಃ
{ಸಿದ್ಧಾನ್ತ-ಸೂತ್ರ}
೩.೧.೪೦ \ ಮಧ್ಯನ್ದಿನೋಲ್ಕಾಪ್ರಕಾಶಾನುಪಲಬ್ಧಿವತ್ ತದನುಪಲಬ್ಧಿಃ
{ಸಿದ್ಧಾನ್ತ-ಸೂತ್ರ}
೩.೧.೪೧ \ ನ, ರಾತ್ರೌ ಅಪಿ ಅನುಪಲಬ್ಧೇಃ
{ಸಿದ್ಧಾನ್ತ-ಸೂತ್ರ}
೩.೧.೪೨ \ ಬಾಹ್ಯಪ್ರಕಾಶಾನುಗ್ರಹಾತ್ ವಿಷಯೋಪಲಬ್ಧೇಃ ಅನಭಿವ್ಯಕ್ತಿತಃ ಅನುಪಲಬ್ಧಿಃ
{ಸಿದ್ಧಾನ್ತ-ಸೂತ್ರ}
೩.೧.೪೩ \ ಅಭಿವ್ಯಕ್ತೌ ಚ ಅಭಿಭವಾತ್
{ಸಿದ್ಧಾನ್ತ-ಸೂತ್ರ}
೩.೧.೪೪ \ ನಕ್ತಞ್ಚರನಯನರಶ್ಮಿದರ್ಶನಾತ್ ಚ
{ಸಿದ್ಧಾನ್ತ-ಸೂತ್ರ}
೩.೧.೪೫ \ ಅಪ್ರಾಪ್ಯಗ್ರಹಣಂ ಕಾಚಾಭ್ರಪಟಲಸ್ಫಟಿಕಾನ್ತರಿತೋಪಲಬ್ಧೇಃ
{ಪೂರ್ವಪಕ್ಷ-ಸೂತ್ರ}
೩.೧.೪೬ \ ಕುಡ್ಯಾನ್ತರಿತಾನುಪಲಬ್ಧೇಃ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೩.೧.೪೭ \ ಅಪ್ರತೀಘಾತಾತ್ ಸನ್ನಿಕರ್ಷೋಪಪತ್ತಿಃ
{ಸಿದ್ಧಾನ್ತ-ಸೂತ್ರ}
೩.೧.೪೮ \ ಆದಿತ್ಯರಶ್ಮೇಃ ಸ್ಫಟಿಕಾನ್ತರಿತೇ ಅಪಿ ದಾಹ್ಯೇ ಅವಿಘಾತಾತ್
{ಸಿದ್ಧಾನ್ತ-ಸೂತ್ರ}
೩.೧.೪೯ \ ನ ಇತರೇತರಧರ್ಮಪ್ರಸಙ್ಗಾತ್
{ಪೂರ್ವಪಕ್ಷ-ಸೂತ್ರ}
೩.೧.೫೦ \ ಆದರ್ಶೋದಕಯೋಃ ಪ್ರಸಾದಸ್ವಾಭಾವ್ಯಾತ್ ರೂಪೋಪಲಬ್ಧಿಃ
{ಸಿದ್ಧಾನ್ತ-ಸೂತ್ರ}
೩.೧.೫೧ \ ದೃಷ್ಟಾನುಮಿತಾನಾಂ ಹಿ ನಿಯೋಗಪ್ರತಿಷೇಧಾನುಪಪತ್ತಿಃ
{ಸಿದ್ಧಾನ್ತ-ಸೂತ್ರ}
॥ಇನ್ದ್ರಿಯನಾನಾತ್ವಪರೀಕ್ಷಾಪ್ರಕರಣಮ್ (೫೨-೬೨)॥
೩.೧.೫೨ \ ಸ್ಥಾನಾನ್ಯತ್ವೇ ನಾನಾತ್ವಾತ್ ಅವಯವಿನಾನಾಸ್ಥಾನತ್ವಾತ್ ಚ ಸಂಶಯಃ
{ಸಿದ್ಧಾನ್ತ-ಸೂತ್ರ}
೩.೧.೫೩ \ ತ್ವಕ್ ಅವ್ಯತಿರೇಕಾತ್
{ಪೂರ್ವಪಕ್ಷ-ಸೂತ್ರ}
೩.೧.೫೪ \ ನ ಯುಗಪತ್ ಅರ್ಥಾನುಪಲಬ್ಧೇಃ
{ಸಿದ್ಧಾನ್ತ-ಸೂತ್ರ}
೩.೧.೫೫ \ ವಿಪ್ರತಿಷೇಧಾತ್ ಚ ನ ತ್ವಕ್ ಏಕಾ
{ಸಿದ್ಧಾನ್ತ-ಸೂತ್ರ}
೩.೧.೫೬ \ ಇನ್ದ್ರಿಯಾರ್ಥಪಞ್ಚತ್ವಾತ್
{ಸಿದ್ಧಾನ್ತ-ಸೂತ್ರ}
೩.೧.೫೭ \ ನ, ತದರ್ಥಬಹುತ್ವಾತ್
{ಪೂರ್ವಪಕ್ಷ-ಸೂತ್ರ}
೩.೧.೫೮ \ ಗನ್ಧತ್ವಾದ್ಯವ್ಯತಿರೇಕಾತ್ ಗನ್ಧಾದೀನಾಮಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೩.೧.೫೯ \ ವಿಷಯತ್ವಾವ್ಯತಿರೇಕಾತ್ ಏಕತ್ವಮ್
{ಸಿದ್ಧಾನ್ತ-ಸೂತ್ರ}
೩.೧.೬೦ \ ನ, ಬುದ್ಧಿಲಕ್ಷಣಾಧಿಷ್ಠಾನ-ಗತ್ಯಾಕೃತಿ-ಜಾತಿಪಞ್ಚತ್ವೇಭ್ಯಃ
{ಸಿದ್ಧಾನ್ತ-ಸೂತ್ರ}
೩.೧.೬೧ \ ಭೂತಗುಣವಿಶೇಷೋಪಲಬ್ಧೇಃ ತಾದಾತ್ಮ್ಯಮ್
{ಸಿದ್ಧಾನ್ತ-ಸೂತ್ರ}
॥ಅರ್ಥಪರೀಕ್ಷಾಪ್ರಕರಣಮ್ (೬೨-೭೪)॥
೩.೧.೬೨ \ ಗನ್ಧ-ರಸ-ರೂಪ-ಸ್ಪರ್ಶ-ಶಬ್ದಾನಾಂ ಸ್ಪರ್ಶಪರ್ಯನ್ತಾಃ ಪೃಥಿವ್ಯಾಃ
{ಸಿದ್ಧಾನ್ತ-ಸೂತ್ರ}
೩.೧.೬೩ \ ಅಪ್-ತೇಜೋ-ವಾಯೂನಾಂ ಪೂರ್ವಂ ಪೂರ್ವಮ್ ಅಪೋಹ್ಯ ಆಕಾಶಸ್ಯ ಉತ್ತರಃ
{ಪೂರ್ವಪಕ್ಷ-ಸೂತ್ರ}
೩.೧.೬೪ \ ನ, ಸರ್ವಗುಣಾನುಪಲಬ್ಧೇಃ
{ಸಿದ್ಧಾನ್ತ-ಸೂತ್ರ}
೩.೧.೬೫ \ ಏಕೈಕಶ್ಯೇನ ಉತ್ತರಗುಣಾಸದ್ಭಾವಾತ್ ಉತ್ತರೋತ್ತರಾಣಾಂ ತದನುಪಲಬ್ಧಿಃ
{ಪೂರ್ವಪಕ್ಷ-ಸೂತ್ರ}
೩.೧.೬೬ \ ವಿಷ್ಟಂ ಹಿ ಅಪರಂ ಪರೇಣ
{ಪೂರ್ವಪಕ್ಷ-ಸೂತ್ರ}
೩.೧.೬೭ \ ನ, ಪಾರ್ಥಿವಾಪ್ಯಯೋಃ ಪ್ರತ್ಯಕ್ಷತ್ವಾತ್
{ಸಿದ್ಧಾನ್ತ-ಸೂತ್ರ}
೩.೧.೬೮ \ ಪೂರ್ವಪೂರ್ವಗುಣೋತ್ಕರ್ಷಾತ್ ತತ್ತತ್ ಪ್ರಧಾನಮ್
{ಸಿದ್ಧಾನ್ತ-ಸೂತ್ರ}
೩.೧.೬೯ \ ತದ್ಧ್ಯವಸ್ಥಾನಂ ತು ಭೂಯಸ್ತ್ವಾತ್
{ಸಿದ್ಧಾನ್ತ-ಸೂತ್ರ}
೩.೧.೭೦ \ ಸಗುಣಾನಾಮ್ ಇನ್ದ್ರಿಯಭಾವಾತ್
{ಸಿದ್ಧಾನ್ತ-ಸೂತ್ರ}
೩.೧.೭೧ \ ತೇನ ಏವ ತಸ್ಯ ಅಗ್ರಹಣಾತ್ ಚ
{ಸಿದ್ಧಾನ್ತ-ಸೂತ್ರ}
೩.೧.೭೨ \ ನ, ಶಬ್ದಗುಣೋಪಲಬ್ಧೇಃ
{ಪೂರ್ವಪಕ್ಷ-ಸೂತ್ರ}
೩.೧.೭೩ \ ತದುಪಲಬ್ಧಿಃ ಇತರೇತರದ್ರವ್ಯಗುಣವೈಧರ್ಮ್ಯಾತ್
{ಸಿದ್ಧಾನ್ತ-ಸೂತ್ರ}
(ಇತಿ ನ್ಯಾಯಸೂತ್ರೇ ತೃತೀಯಾಧ್ಯಾಯಸ್ಯ ಪ್ರಥಮಮ್ ಆಹ್ನಿಕಮ್)
(ದ್ವಿತೀಯಮ್ ಆಹ್ನಿಕಮ್)
॥ಬುದ್ಧೇರನಿತ್ಯತ್ವಪರೀಕ್ಷಾಪ್ರಕರಣಮ್ (೧-೯)॥
೩.೨.೧ \ ಕರ್ಮಾಕಾಶಸಾಧರ್ಮ್ಯಾತ್ ಸಂಶಯಃ
{ಸಿದ್ಧಾನ್ತ-ಸೂತ್ರ}
೩.೨.೨ \ ವಿಷಯಪ್ರತ್ಯಭಿಜ್ಞಾನಾತ್
{ಸಿದ್ಧಾನ್ತ-ಸೂತ್ರ}
೩.೨.೩ \ ಸಾಧ್ಯಸಮತ್ವಾತ್ ಅಹೇತುಃ
{ಸಿದ್ಧಾನ್ತ-ಸೂತ್ರ}
೩.೨.೪ \ ನ, ಯುಗಪತ್ ಅಗ್ರಹಣಾತ್
{ಸಿದ್ಧಾನ್ತ-ಸೂತ್ರ}
೩.೨.೫ \ ಅಪ್ರತ್ಯಭಿಜ್ಞಾನೇ ಚ ವಿನಾಶಪ್ರಸಙ್ಗಃ
{ಸಿದ್ಧಾನ್ತ-ಸೂತ್ರ}
೩.೨.೬ \ ಕ್ರಮವೃತ್ತಿತ್ವಾತ್ ಅಯುಗಪತ್ ಗ್ರಹಣಮ್
{ಸಿದ್ಧಾನ್ತ-ಸೂತ್ರ}
೩.೨.೭ \ ಅಪ್ರತ್ಯಭಿಜ್ಞಾನಂ ಚ ವಿಷಯಾನ್ತರವ್ಯಾಸಙ್ಗಾತ್
{ಸಿದ್ಧಾನ್ತ-ಸೂತ್ರ}
೩.೨.೮ \ ನ, ಗತ್ಯಭಾವಾತ್
{ಸಿದ್ಧಾನ್ತ-ಸೂತ್ರ}
೩.೨.೯ \ ಸ್ಫಟಿಕಾನ್ಯತ್ವಾಭಿಮಾನವತ್ ತದನ್ಯತ್ವಾಭಿಮಾನಃ
{ಸಿದ್ಧಾನ್ತ-ಸೂತ್ರ}
॥ಕ್ಷಣಭಙ್ಗಪರೀಕ್ಷಾಪ್ರಕರಣಮ್ (೧೦-೧೭)॥
೩.೨.೧೦ \ ಸ್ಫಟಿಕೇ ಅಪಿ ಅಪರಾಪರೋತ್ಪತ್ತೇಃ ಕ್ಷಣಿಕತ್ವಾತ್ ವ್ಯಕ್ತೀನಾಮ್ ಅಹೇತುಃ
{ಸಿದ್ಧಾನ್ತ-ಸೂತ್ರ}
೩.೨.೧೧ \ ನಿಯಮಹೇತ್ವಭಾವಾತ್ ಯಥಾದರ್ಶನಮ್ ಅಭ್ಯನುಜ್ಞಾ
{ಸಿದ್ಧಾನ್ತ-ಸೂತ್ರ}
೩.೨.೧೨ \ ನ, ಉತ್ಪತ್ತಿವಿನಾಶಕಾರಣೋಪಲಬ್ಧೇಃ
{ಸಿದ್ಧಾನ್ತ-ಸೂತ್ರ}
೩.೨.೧೩ \ ಕ್ಷೀರವಿನಾಶೇ ಕಾರಣಾನುಪಲಬ್ಧಿವತ್ ದಧ್ಯುತ್ಪತ್ತಿವತ್ ಚ ತದುತ್ಪತ್ತಿಃ
{ಪೂರ್ವಪಕ್ಷ-ಸೂತ್ರ}
೩.೨.೧೪ \ ಲಿಙ್ಗತಃ ಗ್ರಹಣಾತ್ ನ ಅನುಪಲಬ್ಧಿಃ
{ಸಿದ್ಧಾನ್ತ-ಸೂತ್ರ}
೩.೨.೧೫ \ ನ ಪಯಸಃ ಪರಿಣಾಮ-ಗುಣಾನ್ತರಪ್ರಾದುರ್ಭಾವಾತ್
{ಸಿದ್ಧಾನ್ತ-ಸೂತ್ರ}
೩.೨.೧೬ \ ವ್ಯೂಹಾನ್ತರಾತ್ ದ್ರವ್ಯಾನ್ತರೋತ್ಪತ್ತಿದರ್ಶನಂ ಪೂರ್ವದ್ರವ್ಯನಿವೃತ್ತೇಃ ಅನುಮಾನಮ್
{ಸಿದ್ಧಾನ್ತ-ಸೂತ್ರ}
೩.೨.೧೭ \ ಕ್ವಚಿತ್ ವಿನಾಶಕಾರಣಾನುಪಲಬ್ಧೇಃ ಕ್ವಚಿತ್ ಚ ಉಪಲಬ್ಧೇಃ ಅನೇಕಾನ್ತಃ
{ಸಿದ್ಧಾನ್ತ-ಸೂತ್ರ}
॥ಬುದ್ಧೇರಾತ್ಮಗುಣತ್ವಪರೀಕ್ಷಾಪ್ರಕರಣಾಮ್ (೧೮-೪೧)॥
೩.೨.೧೮ \ ನ ಇನ್ದ್ರಿಯಾರ್ಥಯೋಃ, ತದ್ವಿನಾಶೇ ಅಪಿ ಜ್ಞಾನಾವಸ್ಥಾನಾತ್
{ಸಿದ್ಧಾನ್ತ-ಸೂತ್ರ}
೩.೨.೧೯ \ ಯುಗಪತ್ ಜ್ಞಾನಾನುಪಲಬ್ಧೇಃ ಚ ನ ಮನಸಃ
{ಸಿದ್ಧಾನ್ತ-ಸೂತ್ರ}
೩.೨.೨೦ \ ತತ್ ಆತ್ಮಗುಣತ್ವೇ ಅಪಿ ತುಲ್ಯಮ್
{ಪೂರ್ವಪಕ್ಷ-ಸೂತ್ರ}
೩.೨.೨೧ \ ಇನ್ದ್ರಿಯೈಃ ಮನಸಃ ಸನ್ನಿಕರ್ಷಾಭಾವಾತ್ ತದನುತ್ಪತ್ತಿಃ
{ಪೂರ್ವಪಕ್ಷ-ಸೂತ್ರ}
೩.೨.೨೨ \ ನ, ಉತ್ಪತ್ತಿಕಾರಣಾನಪದೇಶಾತ್
{ಸಿದ್ಧಾನ್ತ-ಸೂತ್ರ}
೩.೨.೨೩ \ ವಿನಾಶಕಾರಣಾನುಪಲಬ್ಧೇಃ ಚ ಅವಸ್ಥಾನೇ ತನ್ನಿತ್ಯತ್ವಪ್ರಸಙ್ಗಃ
{ಪೂರ್ವಪಕ್ಷ-ಸೂತ್ರ}
೩.೨.೨೪ \ ಅನಿತ್ಯತ್ವಗ್ರಹಾತ್ ಬುದ್ಧೇಃ ಬುದ್ಧ್ಯನ್ತರಾತ್ ವಿನಾಶಃ ಶಬ್ದವತ್
{ಸಿದ್ಧಾನ್ತ-ಸೂತ್ರ}
೩.೨.೨೫ \ ಜ್ಞಾನಸಮವೇತಾತ್ಮಪ್ರದೇಶಸನ್ನಿಕರ್ಷಾತ್ ಮನಸಃ ಸ್ಮೃತ್ಯುತ್ಪತ್ತೇಃ ನ ಯುಗಪತ್ ಉತ್ಪತ್ತಿಃ
{ಪೂರ್ವಪಕ್ಷ-ಸೂತ್ರ}
೩.೨.೨೬ \ ನ, ಅನ್ತಃ-ಶರೀರವೃತ್ತಿತ್ವಾತ್ ಮನಸಃ
{ಸಿದ್ಧಾನ್ತ-ಸೂತ್ರ}
೩.೨.೨೭ \ ಸಾಧ್ಯತ್ವಾತ್ ಅಹೇತುಃ
{ಪೂರ್ವಪಕ್ಷ-ಸೂತ್ರ}
೩.೨.೨೮ \ ಸ್ಮರತಃ ಶರೀರಧಾರಣೋಪಪತ್ತೇಃ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೩.೨.೨೯ \ ನ, ತದಾಶುಗತಿತ್ವಾನ್ಮನಸಃ
{ಪೂರ್ವಪಕ್ಷ-ಸೂತ್ರ}
೩.೨.೩೦ \ ನ, ಸ್ಮರಣಕಾಲಾನಿಯಮಾತ್
{ಸಿದ್ಧಾನ್ತ-ಸೂತ್ರ}
೩.೨.೩೧ \ ಆತ್ಮಪ್ರೇರಣ-ಯದೃಚ್ಛಾ-ಜ್ಞತಾಭಿಃ ಚ ನ ಸಂಯೋಗವಿಶೇಷಃ
{ಪೂರ್ವಪಕ್ಷ-ಸೂತ್ರ}
೩.೨.೩೨ \ ವ್ಯಾಸಕ್ತಮನಸಃ ಪಾದವ್ಯಥನೇನ ಸಂಯೋಗವಿಶೇಷೇಣ ಸಮಾನಮ್
{ಸಿದ್ಧಾನ್ತ-ಸೂತ್ರ}
೩.೨.೩೩ \ ಪ್ರಣಿಧಾನಲಿಙ್ಗಾದಿಜ್ಞಾನಾನಾಮ್ ಅಯುಗಪದ್ಭಾವಾತ್ ಅಯುಗಪತ್ಸ್ಮರಣಮ್
{ಸಿದ್ಧಾನ್ತ-ಸೂತ್ರ}
೩.೨.೩೪ \ ಜ್ಞಸ್ಯ ಇಚ್ಛಾದ್ವೇಷನಿಮಿತ್ತತ್ವಾತ್ ಆರಮ್ಭನಿವೃತ್ತ್ಯೋಃ
{ಸಿದ್ಧಾನ್ತ-ಸೂತ್ರ}
೩.೨.೩೫ \ ತಲ್ಲಿಙ್ಗತ್ವಾತ್ ಇಚ್ಛಾದ್ವೇಷಯೋಃ ಪಾರ್ಥಿವಾದ್ಯೇಷು ಅಪ್ರತಿಷೇಧಃ
{ಪೂರ್ವಪಕ್ಷ-ಸೂತ್ರ}
೩.೨.೩೬ \ ಪರಶ್ವಾದಿಷು ಆರಮ್ಭನಿವೃತ್ತಿದರ್ಶನಾತ್
{ಸಿದ್ಧಾನ್ತ-ಸೂತ್ರ}
೩.೨.೩೭ \ ನಿಯಮಾನಿಯಮೌ ತು ತದ್ವಿಶೇಷಕೌ
{ಸಿದ್ಧಾನ್ತ-ಸೂತ್ರ}
೩.೨.೩೮ \ ಯಥೋಕ್ತಹೇತುತ್ವಾತ್ ಪಾರತನ್ತ್ರ್ಯಾತ್ ಅಕೃತಾಭ್ಯಾಗಮಾತ್ ಚ ನ ಮನಸಃ
{ಸಿದ್ಧಾನ್ತ-ಸೂತ್ರ}
೩.೨.೩೯ \ ಪರಿಶೇಷಾತ್ ಯಥೋಕ್ತಹೇತೂಪಪತ್ತೇಃ ಚ
{ಸಿದ್ಧಾನ್ತ-ಸೂತ್ರ}
೩.೨.೪೦ \ ಸ್ಮರಣಂ ತು ಆತ್ಮನಃ ಜ್ಞಸ್ವಾಭಾವ್ಯಾತ್
{ಸಿದ್ಧಾನ್ತ-ಸೂತ್ರ}
೩.೨.೪೧ \ ಪ್ರಣಿಧಾನ-ನಿಬನ್ಧಾಭ್ಯಾಸ-ಲಿಙ್ಗ-ಲಕ್ಷಣ-ಸಾದೃಶ್ಯ-ಪರಿಗ್ರಹಾಶ್ರಯಾಶ್ರಿತ ಸಮ್ಬನ್ಧಾನನ್ತರ್ಯ-ವಿಯೋಗೈಕಕಾರ್ಯ-
ವಿರೋಧಾತಿಶಯ-ಪ್ರಾಪ್ತಿ-ವ್ಯವಧಾನ-ಸುಖ-ದುಃಖೇಚ್ಛಾ ದ್ವೇಷ-ಭಯಾರ್ಥಿತ್ವ-ಕ್ರಿಯಾರಾಗ-ಧರ್ಮಾಧರ್ಮನಿಮಿತ್ತೇಭ್ಯಃ
{ಸಿದ್ಧಾನ್ತ-ಸೂತ್ರ}
॥ಬುದ್ಧೇರುತ್ಪನ್ನಾಪವರ್ಗಿತ್ವಪರೀಕ್ಷಾಪ್ರಕರಣಮ್ (೪೨-೪೫)॥
೩.೨.೪೨ \ ಕರ್ಮಾನವಸ್ಥಾಯಿಗ್ರಹಣಾತ್
{ಸಿದ್ಧಾನ್ತ-ಸೂತ್ರ}
೩.೨.೪೩ \ ಅವ್ಯಕ್ತಗ್ರಹಣಮ್ ಅನವಸ್ಥಾಯಿತ್ವಾತ್ ವಿದ್ಯುತ್ಸಮ್ಪಾತೇ ರೂಪಾವ್ಯಕ್ತಗ್ರಹಣವತ್
{ಸಿದ್ಧಾನ್ತ-ಸೂತ್ರ}
೩.೨.೪೪ \ ಹೇತೂಪಾದಾನಾತ್ ಪ್ರತಿಷೇದ್ಧವ್ಯಾಭ್ಯನುಜ್ಞಾ
{ಸಿದ್ಧಾನ್ತ-ಸೂತ್ರ}
೩.೨.೪೫ \ ನ ಪ್ರದೀಪಾರ್ಚಿಃಸನ್ತತ್ಯಭಿವ್ಯಕ್ತಗ್ರಹಣವತ್ ತದ್ಗ್ರಹಣಮ್
{ಸಿದ್ಧಾನ್ತ-ಸೂತ್ರ}
॥ಬುದ್ಧೇಃ ಶರೀರಗುಣವ್ಯತಿರೇಕಪರೀಕ್ಷಾಪ್ರಕರಣಮ್ (೪೬-೫೫)॥
೩.೨.೪೬ \ ದ್ರವ್ಯೇ ಸ್ವಗುಣಪರಗುಣೋಪಲಬ್ಧೇಃ ಸಂಶಯಃ
{ಸಿದ್ಧಾನ್ತ-ಸೂತ್ರ}
೩.೨.೪೭ \ ಯಾವಚ್ಛರೀರಭಾವಿತ್ವಾತ್ ರೂಪಾದೀನಾಮ್
{ಸಿದ್ಧಾನ್ತ-ಸೂತ್ರ}
೩.೨.೪೮ \ ನ, ಪಾಕಜಗುಣಾನ್ತರೋತ್ಪತ್ತೇಃ
{ಸಿದ್ಧಾನ್ತ-ಸೂತ್ರ}
೩.೨.೪೯ \ ಪ್ರತಿದ್ವನ್ದ್ವಿಸಿದ್ಧೇಃ ಪಾಕಜಾನಾಮ್ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೩.೨.೫೦ \ ಶರೀರವ್ಯಾಪಿತ್ವಾತ್
{ಸಿದ್ಧಾನ್ತ-ಸೂತ್ರ}
೩.೨.೫೧ \ ನ, ಕೇಶನಖಾದಿಷು ಅನುಪಲಬ್ಧೇಃ
{ಪೂರ್ವಪಕ್ಷ-ಸೂತ್ರ}
೩.೨.೫೨ \ ತ್ವಕ್ಪರ್ಯನ್ತತ್ವಾತ್ ಶರೀರಸ್ಯ ಕೇಶನಖಾದಿಷು ಅಪ್ರಸಙ್ಗಃ
{ಸಿದ್ಧಾನ್ತ-ಸೂತ್ರ}
೩.೨.೫೩ \ ಶರೀರಗುಣವೈಧರ್ಮ್ಯಾತ್
{ಸಿದ್ಧಾನ್ತ-ಸೂತ್ರ}
೩.೨.೫೪ \ ನ, ರೂಪಾದೀನಾಮ್ ಇತರೇತರವೈಧರ್ಮ್ಯಾತ್
{ಪೂರ್ವಪಕ್ಷ-ಸೂತ್ರ}
೩.೨.೫೫ \ ಐನ್ದ್ರಿಯಕತ್ವಾತ್ ರೂಪಾದೀನಾಮ್ ಅಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಮನಃಪರೀಕ್ಷಾಪ್ರಕರಣಮ್ (೫೬-೫೯)॥
೩.೨.೫೬ \ ಜ್ಞಾನಾಯೌಗಪದ್ಯಾತ್ ಏಕಮ್ ಮನಃ
{ಸಿದ್ಧಾನ್ತ-ಸೂತ್ರ}
೩.೨.೫೭ \ ನ, ಯುಗಪತ್ ಅನೇಕಕ್ರಿಯೋಪಲಬ್ಧೇಃ
{ಪೂರ್ವಪಕ್ಷ-ಸೂತ್ರ}
೩.೨.೫೮ \ ಅಲಾತಚಕ್ರದರ್ಶನವತ್ ತದುಪಲಬ್ಧಿಃ ಆಶುಸಞ್ಚಾರಾತ್
{ಸಿದ್ಧಾನ್ತ-ಸೂತ್ರ}
೩.೨.೫೯ \ ಯಥೋಕ್ತಹೇತುತ್ವಾತ್ ಚ ಅಣು
{ಸಿದ್ಧಾನ್ತ-ಸೂತ್ರ}
॥ಅದೃಷ್ಟನಿಷ್ಪಾದ್ಯತ್ವಪರೀಕ್ಷಾಪ್ರಕರಣಮ್ (೬೦-೭೨)॥
೩.೨.೬೦ \ ಪೂರ್ವಕೃತಫಲಾನುಬನ್ಧಾತ್ ತದುತ್ಪತ್ತಿಃ
{ಸಿದ್ಧಾನ್ತ-ಸೂತ್ರ}
೩.೨.೬೧ \ ಭೂತೇಭ್ಯಃ ಮೂರ್ತ್ಯುಪಾದಾನವತ್ ತದುಪಾದಾನಮ್
{ಪೂರ್ವಪಕ್ಷ-ಸೂತ್ರ}
೩.೨.೬೨ \ ನ, ಸಾಧ್ಯಸಮತ್ವಾತ್
{ಸಿದ್ಧಾನ್ತ-ಸೂತ್ರ}
೩.೨.೬೩ \ ನ, ಉತ್ಪತ್ತಿನಿಮಿತ್ತತ್ವಾತ್ ಮಾತಾಪಿತ್ರೋಃ
{ಸಿದ್ಧಾನ್ತ-ಸೂತ್ರ}
೩.೨.೬೪ \ ತಥಾ ಆಹಾರಸ್ಯ
{ಸಿದ್ಧಾನ್ತ-ಸೂತ್ರ}
೩.೨.೬೫ \ ಪ್ರಾಪ್ತೌ ಚ ಅನಿಯಮಾತ್
{ಸಿದ್ಧಾನ್ತ-ಸೂತ್ರ}
೩.೨.೬೬ \ ಶರೀರೋತ್ಪತ್ತಿನಿಮಿತ್ತವತ್ ಸಂಯೋಗೋತ್ಪತ್ತಿನಿಮಿತ್ತಂ ಕರ್ಮ
{ಸಿದ್ಧಾನ್ತ-ಸೂತ್ರ}
೩.೨.೬೭ \ ಏತೇನ ಅನಿಯಮಃ ಪ್ರತ್ಯುಕ್ತಃ
{ಸಿದ್ಧಾನ್ತ-ಸೂತ್ರ}
೩.೨.೬೮ \ ತತ್ ಅದೃಷ್ಟಕಾರಿತಮ್ ಇತಿ ಚೇತ್ ಪುನಃ ತತ್ಪ್ರಸಙ್ಗಃ ಅಪವರ್ಗೇ
{ಸಿದ್ಧಾನ್ತ-ಸೂತ್ರ}
೩.೨.೬೯ \ ಮನಃಕರ್ಮನಿಮಿತ್ತತ್ವಾತ್ ಚ ಸಂಯೋಗಾವ್ಯುಚ್ಛೇದಃ
{ಸಿದ್ಧಾನ್ತ-ಸೂತ್ರ}
೩.೨.೭೦ \ ನಿತ್ಯತ್ವಪ್ರಸಙ್ಗಃ ಚ ಪ್ರಾಯಣಾನುಪಪತ್ತೇಃ
{ಸಿದ್ಧಾನ್ತ-ಸೂತ್ರ}
೩.೨.೭೧ \ ಅಣುಶ್ಯಾಮತಾನಿತ್ಯತ್ವವತ್ ಏತತ್ ಸ್ಯಾತ್
{ಪೂರ್ವಪಕ್ಷ-ಸೂತ್ರ}
೩.೨.೭೨ \ ನ, ಅಕೃತಾಭ್ಯಾಗಮಪ್ರಸಙ್ಗಾತ್
{ಸಿದ್ಧಾನ್ತ-ಸೂತ್ರ}
(ಇತಿ ನ್ಯಾಯಸೂತ್ರೇ ತೃತೀಯಾಧ್ಯಾಯಸ್ಯ ದ್ವಿತೀಯಮ್ ಆಹ್ನಿಕಮ್)
(ಸಮಾಪ್ತಃ ಚ ಅಯಮ್ ತೃತೀಯಃ ಅಧ್ಯಾಯಃ)
(ಅಥ ಚತುರ್ಥಃ ಅಧ್ಯಾಯಃ)
(ಪ್ರಥಮಮ್ ಆಹ್ನಿಕಮ್)
॥ಪ್ರವೃತ್ತಿದೋಷಸಾಮಾನ್ಯಪರೀಕ್ಷಾಪ್ರಕರಣಮ್ (೧-೨)॥
೪.೧.೧ \ ಪ್ರವೃತ್ತಿರ್ಯಥೋಕ್ತಾ
{ಸಿದ್ಧಾನ್ತ-ಸೂತ್ರ}
೪.೧.೨ \ ತಥಾ ದೋಷಾಃ
{ಸಿದ್ಧಾನ್ತ-ಸೂತ್ರ}
॥ದೋಷತ್ರೈರಾಶ್ಯಪರೀಕ್ಷಾಪ್ರಕರಣಮ್ (೩-೮)॥
೪.೧.೩ \ ತ್ರೈರಾಶ್ಯಂ ರಾಗದ್ವೇಷಮೋಹಾರ್ಥಾನ್ತರ್ಭಾವಾತ್
{ಸಿದ್ಧಾನ್ತ-ಸೂತ್ರ}
೪.೧.೪ \ ನ, ಏಕಪ್ರತ್ಯನೀಕಭಾವಾತ್
{ಪೂರ್ವಪಕ್ಷ-ಸೂತ್ರ}
೪.೧.೫ \ ವ್ಯಭಿಚಾರಾದಹೇತುಃ
{ಸಿದ್ಧಾನ್ತ-ಸೂತ್ರ}
೪.೧.೬ \ ತೇಷಾಂ ಮೋಹಃ ಪಾಪೀಯಾನ್, ನಾಮೂಢಸ್ಯೇತರೋತ್ಪತ್ತೇಃ
{ಸಿದ್ಧಾನ್ತ-ಸೂತ್ರ}
೪.೧.೭ \ ನಿಮಿತ್ತನೈಮಿತ್ತಿಕಭಾವಾದರ್ಥಾನ್ತರಭಾವೋ ದೋಷೇಭ್ಯಃ
{ಪೂರ್ವಪಕ್ಷ-ಸೂತ್ರ}
೪.೧.೮ \ ನ ದೋಷಲಕ್ಷಣಾವರೋಧಾನ್ಮೋಹಸ್ಯ
{ಸಿದ್ಧಾನ್ತ-ಸೂತ್ರ}
೪.೧.೯ \ ನಿಮಿತ್ತನೈಮಿತ್ತಿಕೋಪಪತ್ತೇಶ್ಚ ತುಲ್ಯಜಾತೀಯಾನಾಮಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಪ್ರೇತ್ಯಭಾವಪರೀಕ್ಷಾಪ್ರಕರಣಮ್ (೧೦-೧೩)॥
೪.೧.೧೦ \ ಆತ್ಮನಿತ್ಯತ್ವೇ ಪ್ರೇತ್ಯಭಾವಸಿದ್ಧಿಃ
{ಸಿದ್ಧಾನ್ತ-ಸೂತ್ರ}
೪.೧.೧೧ \ ವ್ಯಕ್ತಾದ್ ವ್ಯಕ್ತಾನಾಮ್, ಪ್ರತ್ಯಕ್ಷಪ್ರಾಮಾಣ್ಯಾತ್
{ಸಿದ್ಧಾನ್ತ-ಸೂತ್ರ}
೪.೧.೧೨ \ ನ, ಘಟಾದ್ ಘಟನಿಷ್ಪತ್ತೇಃ
{ಪೂರ್ವಪಕ್ಷ-ಸೂತ್ರ}
೪.೧.೧೩ \ ವ್ಯಕ್ತಾದ್ ಘಟನಿಷ್ಪತ್ತೇರಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಶೂನ್ಯತೋಪಾದಾನನಿರಾಕರಣಪ್ರಕರಣಮ್ (೧೪-೧೮)॥
೪.೧.೧೪ \ ಅಭಾವಾದ್ ಭಾವೋತ್ಪತ್ತಿಃ, ನಾನುಪಮೃದ್ಯ ಪ್ರಾದುರ್ಭಾವಾತ್
{ಪೂರ್ವಪಕ್ಷ-ಸೂತ್ರ}
೪.೧.೧೫ \ ವ್ಯಾಘಾತಾದಪ್ರಯೋಗಃ
{ಸಿದ್ಧಾನ್ತ-ಸೂತ್ರ}
೪.೧.೧೬ \ ನ, ಅತೀತಾನಾಗತಯೋಃ ಕಾರಕಶಬ್ದಪ್ರಯೋಗಾತ್
{ಪೂರ್ವಪಕ್ಷ-ಸೂತ್ರ}
೪.೧.೧೭ \ ನ, ವಿನಷ್ಟೇಭ್ಯೋ ऽನಿಷ್ಪತ್ತೇಃ
{ಸಿದ್ಧಾನ್ತ-ಸೂತ್ರ}
೪.೧.೧೮ \ ಕ್ರಮನಿರ್ದೇಶಾದಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಈಶ್ವರೋಪಾದಾನಾತಾಪ್ರಕರಣಮ್ (೧೯-೨೧)॥
೪.೧.೧೯ \ ಈಶ್ವರಃ ಕಾರಣಮ್, ಪುರುಷಕರ್ಮಾಫಲ್ಯದರ್ಶನಾತ್
{ಸಿದ್ಧಾನ್ತ-ಸೂತ್ರ}
೪.೧.೨೦ \ ನ, ಪುರುಷಕರ್ಮಾಭಾವೇ ಫ್ಲಾನಿಷ್ಪತ್ತೇಃ
{ಪೂರ್ವಪಕ್ಷ-ಸೂತ್ರ}
೪.೧.೨೧ \ ತತ್ಕಾರಿತತ್ವಾದ್ ಅಹೇತುಃ
{ಸಿದ್ಧಾನ್ತ-ಸೂತ್ರ}
॥ಆಕಸ್ಮಿಕತ್ವನಿರಾಕರಣಪ್ರಕರಣಮ್ (೨೨-೨೪)॥
೪.೧.೨೨ \ ಅನಿಮಿತ್ತತೋ ಭಾವೋತ್ಪತ್ತಿಃ, ಕಣ್ಟಕತೈಕ್ಷ್ಣ್ಯಾದಿದರ್ಶನಾತ್
{ಪೂರ್ವಪಕ್ಷ-ಸೂತ್ರ}
೪.೧.೨೩ \ ಅನಿಮಿತ್ತನಿಮಿತ್ತತ್ವಾನ್ನನಿಮಿತ್ತತಃ
{ಸಿದ್ಧಾನ್ತ-ಸೂತ್ರ}
೪.೧.೨೪ \ ನಿಮಿತ್ತನಿಮಿತ್ತಯೋರರ್ಥಾನ್ತರಭಾವಾದಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಸರ್ವಾನಿತ್ಯತ್ವನಿರಾಕರಣಪ್ರಕರಣಮ್ (೨೫-೨೮)॥
೪.೧.೨೫ \ ಸರ್ವಮ್ ಅನಿತ್ಯಮ್, ಉತ್ಪತ್ತಿವಿನಾಶಧರ್ಮಕತ್ವಾತ್
{ಪೂರ್ವಪಕ್ಷ-ಸೂತ್ರ}
೪.೧.೨೬ \ ನ, ಅನಿತ್ಯತಾನಿತ್ಯತ್ವಾತ್
{ಸಿದ್ಧಾನ್ತ-ಸೂತ್ರ}
೪.೧.೨೭ \ ತದನಿತ್ಯತ್ವಮಗ್ನೇರ್ದಾಹ್ಯಂ ವಿನಾಶ್ಯಾನುವಿನಾಶವತ್
{ಸಿದ್ಧಾನ್ತ-ಸೂತ್ರ}
೪.೧.೨೮ \ ನಿತ್ಯಸ್ಯಾಪ್ರತ್ಯಾಖ್ಯಾನಮ್, ಯಥೋಪಲಬ್ಧಿ ವ್ಯವಸ್ಥಾನಾತ್
{ಸಿದ್ಧಾನ್ತ-ಸೂತ್ರ}
॥ಸರ್ವನಿತ್ಯತ್ವನಿರಾಕರಣಮ್ (೨೯-೩೩)॥
೪.೧.೨೯ \ ಸರ್ವಂ ನಿತ್ಯಮ್, ಪಞ್ಚಭೂತನಿತ್ಯತ್ವಾತ್
{ಪೂರ್ವಪಕ್ಷ-ಸೂತ್ರ}
೪.೧.೩೦ \ ನ, ಉತ್ಪತ್ತಿವಿನಾಶಕಾರಣೋಪಲಬ್ಧೇಃ
{ಸಿದ್ಧಾನ್ತ-ಸೂತ್ರ}
೪.೧.೩೧ \ ತಲ್ಲಕ್ಷಣಾವರೋಧಾದಪ್ರತಿಷೇಧಃ
{ಪೂರ್ವಪಕ್ಷ-ಸೂತ್ರ}
೪.೧.೩೨ \ ನ, ಉತ್ಪತ್ತಿತತ್ಕಾರಣೋಪಲಬ್ಧೇಃ
{ಸಿದ್ಧಾನ್ತ-ಸೂತ್ರ}
೪.೧.೩೩ \ ನ, ವ್ಯವಸ್ಥಾನುಪಪತ್ತೇಃ
{ಸಿದ್ಧಾನ್ತ-ಸೂತ್ರ}
॥ಸರ್ವಪೃಥಕ್ತ್ವನಿರಾಕರಣಪ್ರಕರಣಮ್ (೩೪-೩೬)॥
೪.೧.೩೪ \ ಸರ್ವಂ ಪೃಥಗ್, ಭಾವಲಕ್ಷಣಪೃಥಕ್ತ್ವಾತ್
{ಪೂರ್ವಪಕ್ಷ-ಸೂತ್ರ}
೪.೧.೩೫ \ ನ, ಅನೇಕಲಕ್ಷಣೈರೇಕಭಾವನಿಷ್ಪತ್ತೇಃ
{ಸಿದ್ಧಾನ್ತ-ಸೂತ್ರ}
೪.೧.೩೬ \ ಲಕ್ಷಣವ್ಯವಸ್ಥಾನಾದೇವಾಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಸರ್ವಶೂನ್ಯತಾನಿರಾಕರಣಪ್ರಕರಣಮ್ (೩೭-೪೦)॥
೪.೧.೩೭ \ ಸರ್ವಮ್ ಅಭಾವೋ ಭಾವೇಷ್ವಿತರೇತರಾಭಾವಸಿದ್ಧೇಃ
{ಪೂರ್ವಪಕ್ಷ-ಸೂತ್ರ}
೪.೧.೩೮ \ ನ, ಸ್ವಭಾವಸಿದ್ಧೇರ್ಭಾವಾನಾಮ್
{ಸಿದ್ಧಾನ್ತ-ಸೂತ್ರ}
೪.೧.೩೯ \ ನ ಸ್ವಭಾವಸಿದ್ಧಿಃ, ಆಪೇಕ್ಷಿಕತ್ವಾತ್
{ಪೂರ್ವಪಕ್ಷ-ಸೂತ್ರ}
೪.೧.೪೦ \ ವ್ಯಾಹತತ್ವಾದಯುಕ್ತಮ್
{ಸಿದ್ಧಾನ್ತ-ಸೂತ್ರ}
॥ಸಂಖ್ಯೈಕಾನ್ತವಾದಪ್ರಕರಣಮ್ (೪೧-೪೩)॥
೪.೧.೪೧ \ ಸಂಖ್ಯೈಕಾನ್ತಾಸಿದ್ಧಿಃ, ಕಾರಣಾನುಪಪತ್ತ್ಯುಪಪತ್ತಿಭ್ಯಾಮ್
{ಸಿದ್ಧಾನ್ತ-ಸೂತ್ರ}
೪.೧.೪೨ \ ನ, ಕಾರಣವಯವಾಭಾವಾತ್
{ಪೂರ್ವಪಕ್ಷ-ಸೂತ್ರ}
೪.೧.೪೩ \ ನಿರವಯವತ್ವಾದಹೇತುಃ
{ಸಿದ್ಧಾನ್ತ-ಸೂತ್ರ}
॥ಫಲಪರೀಕ್ಷಾಪ್ರಕರಣಮ್ (೪೪-೫೪)॥
೪.೧.೪೪ \ ಸದ್ಯಃ ಕಾಲಾನ್ತರೇ ಚ ಫಲನಿಷ್ಪತ್ತೇಃ ಸಂಶಯಃ
{ಸಿದ್ಧಾನ್ತ-ಸೂತ್ರ}
೪.೧.೪೫ \ ನ ಸದ್ಯಃ, ಕಾಲಾನ್ತರೋಪಭೋಗ್ಯತ್ವಾತ್
{ಸಿದ್ಧಾನ್ತ-ಸೂತ್ರ}
೪.೧.೪೬ \ ಕಾಲಾನ್ತರೇಣಾನಿಷ್ಪತ್ತಿಹೇತುರ್ವಿನಾಶಾತ್
{ಪೂರ್ವಪಕ್ಷ-ಸೂತ್ರ}
೪.೧.೪೭ \ ಪ್ರಾಙ್ನಿಷ್ಪತ್ತೇರ್ವೃಕ್ಷಫಲವತ್ ತತ್ಸ್ಯಾತ್
{ಸಿದ್ಧಾನ್ತ-ಸೂತ್ರ}
೪.೧.೪೮ \ ನಾಸನ್ನ ಸನ್ನ ಸದಸತ್, ಸದಸತೋರ್ವೈಧರ್ಮಯಾತ್
{ಪೂರ್ವಪಕ್ಷ-ಸೂತ್ರ}
೪.೧.೪೯ \ ಉತ್ಪಾದವ್ಯಯದರ್ಶನಾತ್
{ಸಿದ್ಧಾನ್ತ-ಸೂತ್ರ}
೪.೧.೫೦ \ ಬುದ್ಧಿಸಿದ್ಧಂ ತು ತದಸತ್
{ಸಿದ್ಧಾನ್ತ-ಸೂತ್ರ}
೪.೧.೫೧ \ ಆಶ್ರಯವ್ಯತಿರೇಕಾದ್ ವೃಕ್ಷಫಲೋತ್ಪತ್ತಿವದ್ ಇತ್ಯಹೇತುಃ
{ಪೂರ್ವಪಕ್ಷ-ಸೂತ್ರ}
೪.೧.೫೨ \ ಪ್ರೀತೇರಾತ್ಮಾಶ್ರಯತ್ವಾದಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೪.೧.೫೩ \ ನ ಪುತ್ರಪಶುಸ್ತ್ರೀಪರಿಚ್ಛೇದಹಿರಣ್ಯಾನ್ನಾದಿಫಲನಿರ್ದ್ದೇಶಾತ್
{ಪೂರ್ವಪಕ್ಷ-ಸೂತ್ರ}
೪.೧.೫೪ \ ತತ್ಸಮ್ಬನ್ಧಾತ್ ಫಲನಿಷ್ಪತ್ತೇಸ್ತೇಷು ಫಲವದುಪಚಾರಃ
{ಸಿದ್ಧಾನ್ತ-ಸೂತ್ರ}
॥ದುಃಖಪರೀಕ್ಷಾಪ್ರಕರಣಮ್ (೫೫-೫೮)॥
೪.೧.೫೫ \ ವಿವಿಧವಾಧನಾಯೋಗಾದ್ ದುಃಖಮೇವ ಜನ್ಮೋತ್ಪತ್ತಿಃ
{ಸಿದ್ಧಾನ್ತ-ಸೂತ್ರ}
೪.೧.೫೬ \ ನ, ಸುಖಸ್ಯಾಪ್ಯನ್ತರಾಲನಿಷ್ಪತ್ತೇಃ
{ಸಿದ್ಧಾನ್ತ-ಸೂತ್ರ}
೪.೧.೫೭ \ ಭಾಧನಾನಿವೃತ್ತೇರ್ವೇದಯತಃ ಪ್ರ್ಯೇಷಣದೋಷಾದಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೪.೧.೫೮ \ ದುಃಖವಿಕಲ್ಪೇ ಸುಖಾಭಿಮಾನಾಚ್ಚ
{ಸಿದ್ಧಾನ್ತ-ಸೂತ್ರ}
॥ಅಪವರ್ಗಪರೀಕ್ಷಾಪ್ರಕರಣಮ್ (೫೯-೬೮)॥
೪.೧.೫೯ \ ಋಣಕ್ಲೇಶಪ್ರವೃತ್ತ್ಯನುಬ್ನ್ಧಾದಪವರ್ಗಾಭಾವಃ
{ಪೂರ್ವಪಕ್ಷ-ಸೂತ್ರ}
೪.೧.೬೦ \ ಪ್ರಧಾನಶಬ್ದಾನುಪಪತ್ತೇರ್ಗುಣಶಬ್ದೇನಾನುವಾದೋ ನಿನ್ದಾಪ್ರಶಂಸೋಪಪತ್ತೇಃ
{ಸಿದ್ಧಾನ್ತ-ಸೂತ್ರ}
೪.೧.೬೧ \ ಸಮಾರೋಪಣಾದಾತ್ಮನ್ಯಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೪.೧.೬೨ \ ಪಾತ್ರಚಯಾನ್ತಾನುಪಪತ್ತೇಶ್ಚ ಫಲಾಭಾವಃ
{ಸಿದ್ಧಾನ್ತ-ಸೂತ್ರ}
೪.೧.೬೩ \ ಸುಷುಪ್ತಸ್ಯ ಸ್ವಪ್ನಾದರ್ಶನೇ ಕ್ಲೇಶಾಭಾವಾದಪವರ್ಗಃ
{ಸಿದ್ಧಾನ್ತ-ಸೂತ್ರ}
೪.೧.೬೪ \ ನ ಪ್ರವೃತ್ತಿಃ ಪ್ರತಿಸನ್ಧಾನಾಯ ಹೀನಕ್ಲೇಶಸ್ಯ
{ಸಿದ್ಧಾನ್ತ-ಸೂತ್ರ}
೪.೧.೬೫ \ ನ, ಕ್ಲೇಶಸನ್ತತೇಃ ಸ್ವಾಭಾವಿಕತ್ವಾತ್
{ಪೂರ್ವಪಕ್ಷ-ಸೂತ್ರ}
೪.೧.೬೬ \ ಪ್ರಾಗುತ್ಪತ್ತೇರಭಾವಾನಿತ್ಯತ್ವವತ್ ಸ್ವಾಭಾವಿಕೇ ऽಪ್ಯನಿತ್ಯತ್ವಮ್
{ಸಿದ್ಧಾನ್ತ-ಸೂತ್ರ}
೪.೧.೬೭ \ ಅಣುಶ್ಯಾಮತಾನಿತ್ಯತ್ವವದ್ ವಾ
{ಸಿದ್ಧಾನ್ತ-ಸೂತ್ರ}
೪.೧.೬೮ \ ನ, ಸಙ್ಕಲ್ಪನಿಮಿತ್ತತ್ವಾಚ್ಚ ರಾಗಾದೀನಾಮ್
{ಸಿದ್ಧಾನ್ತ-ಸೂತ್ರ}
(ಇತಿ ನ್ಯಾಯಸೂತ್ರೇ ಚತುರ್ಥಾಧ್ಯಾಯಸ್ಯ ಪ್ರಥಮಮ್ ಆಹ್ನಿಕಮ್)
(ದ್ವಿತೀಯಮ್ ಆಹ್ನಿಕಮ್)
॥ತತ್ತ್ವಜ್ಞಾನೋತ್ಪತ್ತಿಪ್ರಕರಣಮ್ (೧-೩)॥
೪.೨.೧ \ ದೋಷನಿಮಿತ್ತಾನಾಂ ತತ್ತ್ವಜ್ಞಾನಾದಹಙ್ಕಾರನಿವೃತ್ತಿಃ
{ಸಿದ್ಧಾನ್ತ-ಸೂತ್ರ}
೪.೨.೨ \ ದೋಷನಿಮಿತ್ತಂ ರೂಪಾದಯೋ ವಿಷಯಃ ಸಙ್ಕಲ್ಪಕೃತಾಃ
{ಸಿದ್ಧಾನ್ತ-ಸೂತ್ರ}
೪.೨.೩ \ ತನ್ನಿಮಿತ್ತಂ ತ್ವವಯವ್ಯಭಿಮಾನಃ
{ಸಿದ್ಧಾನ್ತ-ಸೂತ್ರ}
॥ಪ್ರಾಸಙ್ಗಿಕಮ್ ಅವಯವಿಪ್ರಕರಣಮ್ (೪-೧೭)॥
೪.೨.೪ \ ವಿದ್ಯಾವಿದ್ಯಾದ್ವೈವಿಧ್ಯಾತ್ ಸಂಶಯಃ
{ಪೂರ್ವಪಕ್ಷ-ಸೂತ್ರ}
೪.೨.೫ \ ತದಸಂಶಯಃ, ಪೂರ್ವಹೇತುಪ್ರಸಿದ್ಧತ್ವಾತ್
{ಸಿದ್ಧಾನ್ತ-ಸೂತ್ರ}
೪.೨.೬ \ ವೃತ್ತ್ಯನುಪಪತ್ತೇರಪಿ ತರ್ಹಿ ನ ಸಂಶಯಃ
{ಪೂರ್ವಪಕ್ಷ-ಸೂತ್ರ}
೪.೨.೭ \ ಕೃತ್ಸ್ನೈಕದೇಶಾವೃತ್ತಿತ್ವಾದವಯವಾನಾಮವಯವ್ಯಭಾವಃ
{ಪೂರ್ವಪಕ್ಷ-ಸೂತ್ರ}
೪.೨.೮ \ ತೇಷು ಚಾವೃತ್ತೇರವಯವ್ಯಭಾವಃ
{ಪೂರ್ವಪಕ್ಷ-ಸೂತ್ರ}
೪.೨.೯ \ ಪೃಥಕ್ ಚಾವಯವೇಭ್ಯೋ ऽವೃತ್ತೇಃ
{ಸಿದ್ಧಾನ್ತ-ಸೂತ್ರ}
೪.೨.೧೦ \ ನ ಚಾವಯವ್ಯವಯವಾಃ
{ಪೂರ್ವಪಕ್ಷ-ಸೂತ್ರ}
೪.೨.೧೧ \ ಏಕಸ್ಮಿನ್ ಭೇದಾಭಾವಾದ್ ಭೇದಶಬ್ದಪ್ರಯೋಗಾನುಪಪತ್ತೇರಪ್ರಶ್ನಃ
{ಸಿದ್ಧಾನ್ತ-ಸೂತ್ರ}
೪.೨.೧೨ \ ಅವಯವಾನ್ತರಭಾವೇ ऽಪ್ಯವೃತ್ತೇರಹೇತುಃ
{ಸಿದ್ಧಾನ್ತ-ಸೂತ್ರ}
೪.೨.೧೩ \ ಕೇಶಸಮೂಹೇ ತೈಮಿರಿಕೋಪಲಬ್ಧಿವತ್ ತದುಪಲಬ್ಧಿಃ
{ಪೂರ್ವಪಕ್ಷ-ಸೂತ್ರ}
೪.೨.೧೪ \ ಸ್ವವಿಷಯಾನತಿಕ್ರಮೇಣೇನ್ದ್ರಿಯಸ್ಯ ಪಟುಮನ್ದಭಾವಾದ್ವಿಷಯಗ್ರಹಣಸ್ಯ ತಥಾಭಾಬೋ ನಾವಿಷಯೇ ಪ್ರವೃತ್ತಿಃ
{ಸಿದ್ಧಾನ್ತ-ಸೂತ್ರ}
೪.೨.೧೫ \ ಅವಯವಾವಯವಿಪ್ರಸಙ್ಗಶ್ಚೈವಮಾಪ್ರಲಯಾತ್
{ಸಿದ್ಧಾನ್ತ-ಸೂತ್ರ}
೪.೨.೧೬ \ ನ ಪ್ರಲಯೋ ऽಣುಸದ್ಭಾವಾತ್
{ಸಿದ್ಧಾನ್ತ-ಸೂತ್ರ}
೪.೨.೧೭ \ ಪರಂ ವಾ ತ್ರುಟೇಃ
{ಸಿದ್ಧಾನ್ತ-ಸೂತ್ರ}
॥ಔಪೋದ್ಘಾತಿಕಂ ನಿರವಯವಪ್ರಕರಣಮ್ (೧೮-೨೫)॥
೪.೨.೧೮ \ ಆಕಾಶವ್ಯತಿಭೇದಾತ್ ತದನುಪಪತ್ತಿಃ
{ಸಿದ್ಧಾನ್ತ-ಸೂತ್ರ}
೪.೨.೧೯ \ ಆಕಾಶಾಸರ್ವಗತತ್ವಂ ವಾ
{ಪೂರ್ವಪಕ್ಷ-ಸೂತ್ರ}
೪.೨.೨೦ \ ಅನ್ತರ್ಬಹಿಶ್ಚ ಕಾರ್ಯದ್ರವ್ಯಸ್ಯ ಕಾರಣಾನ್ತರವಚನಾದಕಾರ್ಯೇ ತದಭಾವಃ
{ಸಿದ್ಧಾನ್ತ-ಸೂತ್ರ}
೪.೨.೨೧ \ ಶಬ್ದಸಂಯೋಗವಿಭಾವಾಚ್ಚ ಸರ್ವಗತಮ್
{ಸಿದ್ಧಾನ್ತ-ಸೂತ್ರ}
೪.೨.೨೨ \ ಅವ್ಯೂಹಾವಿಷ್ಟಮ್ಭವಿಭುತ್ವಾನಿ ಚಾಕಾಶಧರ್ಮಾಃ
{ಸಿದ್ಧಾನ್ತ-ಸೂತ್ರ}
೪.೨.೨೩ \ ಮೂರ್ತಿಮತಾಂ ಚ ಸಂಸ್ಥಾನೋಪಪತ್ತೇರವಯವಸದ್ಭಾವಃ
{ಪೂರ್ವಪಕ್ಷ-ಸೂತ್ರ}
೪.೨.೨೪ \ ಸಂಯೋಗೋಪಪತ್ತೇಶ್ಚ
{ಪೂರ್ವಪಕ್ಷ-ಸೂತ್ರ}
೪.೨.೨೫ \ ಅನವಸ್ಥಾಕಾರಿತ್ವಾದನವಸ್ಥಾನುಪಪತ್ತೇಶ್ಚಾಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಬಾಹ್ಯಾರ್ಥಭಙ್ಗನಿರಾಕರಣಪ್ರಕರಣಮ್ (೨೬-೩೭)॥
೪.೨.೨೬ \ ಬುದ್ಧ್ಯಾ ವಿವೇಚನಾತ್ತು ಭಾವಾನಾಂ ಯಾಥಾತ್ಮ್ಯಾನುಪಲಬ್ಧಿಸ್ತನ್ತ್ವಪಕರ್ಷಣೇ ಪಟಸದ್ಭಾವಾನುಪಲಬ್ಧಿವತ್ ತದನುಪಲಬ್ಧಿಃ
{ಪೂರ್ವಪಕ್ಷ-ಸೂತ್ರ}
೪.೨.೨೭ \ ವ್ಯಾಹತತ್ವಾದಹೇತುಃ
{ಸಿದ್ಧಾನ್ತ-ಸೂತ್ರ}
೪.೨.೨೮ \ ತದಾಶ್ರಯತ್ವಾದಪೃಥಗ್ಗ್ರಹಣಮ್
{ಸಿದ್ಧಾನ್ತ-ಸೂತ್ರ}
೪.೨.೨೯ \ ಪ್ರಮಾಣತಶ್ಚಾರ್ಥಪ್ರತಿಪತ್ತೇಃ
{ಸಿದ್ಧಾನ್ತ-ಸೂತ್ರ}
೪.೨.೩೦ \ ಪ್ರಮಾಣಾನುಪಪತ್ತ್ಯುಪಪತ್ತಿಭ್ಯಾಮ್
{ಸಿದ್ಧಾನ್ತ-ಸೂತ್ರ}
೪.೨.೩೧ \ ಸ್ವಪ್ನವಿಷಯಾಭಿಮಾನವದಯಂ ಪ್ರಮಾಣಪ್ರಮೇಯಾಭಿಮಾನಃ
{ಪೂರ್ವಪಕ್ಷ-ಸೂತ್ರ}
೪.೨.೩೨ \ ಮಾಯಾಗನ್ಧರ್ವನಗರಮೃಗತೃಷ್ಣಿಕಾವದ್ವಾ
{ಪೂರ್ವಪಕ್ಷ-ಸೂತ್ರ}
೪.೨.೩೩ \ ಹೇತ್ವಭಾವಾದಸಿದ್ಧಿಃ
{ಸಿದ್ಧಾನ್ತ-ಸೂತ್ರ}
೪.೨.೩೪ \ ಸ್ಮೃತಿಸಂಕಲ್ಪವಚ್ಚ ಸ್ವಪ್ನವಿಷಯಾಭಿಮಾನಃ
{ಸಿದ್ಧಾನ್ತ-ಸೂತ್ರ}
೪.೨.೩೫ \ ಮಿಥ್ಯೋಪಲಬ್ಧೇರ್ವಿನಾಶಸ್ತತ್ತ್ವಜ್ಞಾನಾತ್ಸ್ವಪ್ನವಿಷಯಾಭಿಮಾನಪ್ರಣಾಶವತ್ ಪ್ರತಿಬೋಧೇ
{ಸಿದ್ಧಾನ್ತ-ಸೂತ್ರ}
೪.೨.೩೬ \ ಬುದ್ಧೇಶ್ಚೈವಂ ನಿಮಿತ್ತಸದ್ಭಾವೋಪಲಮ್ಭಾತ್
{ಸಿದ್ಧಾನ್ತ-ಸೂತ್ರ}
೪.೨.೩೭ \ ತತ್ತ್ವಪ್ರಧಾನಭೇದಾಚ್ಚ ಮಿಥ್ಯಾಬುದ್ಧೇರ್ದ್ವೈವಿಧ್ಯೋಪಪತ್ತಿಃ
{ಸಿದ್ಧಾನ್ತ-ಸೂತ್ರ}
॥ತತ್ತ್ವಜ್ಞಾನವಿವೃದ್ಧಿಪ್ರಕರಣಮ್ (೩೮-೪೯)॥
೪.೨.೩೮ \ ಸಮಾಧಿವಿಶೇಷಾಭ್ಯಾಸಾತ್
{ಸಿದ್ಧಾನ್ತ-ಸೂತ್ರ}
೪.೨.೩೯ \ ನ, ಅರ್ಥವಿಶೇಷಪ್ರಾವಲ್ಯಾತ್
{ಪೂರ್ವಪಕ್ಷ-ಸೂತ್ರ}
೪.೨.೪೦ \ ಕ್ಷುದಾದಿಭಿಃ ಪ್ರವರ್ತನಾಚ್ಚ
{ಪೂರ್ವಪಕ್ಷ-ಸೂತ್ರ}
೪.೨.೪೧ \ ಪೂರ್ವಕೃತಫಲಾನುಬನ್ಧಾತ್ ತದುತ್ಪತ್ತಿಃ
{ಸಿದ್ಧಾನ್ತ-ಸೂತ್ರ}
೪.೨.೪೨ \ ಅರಣ್ಯಗುಹಾಪುಲಿನಾದಿಷು ಯೋಗಾಭ್ಯಾಸೋಪದೇಶಃ
{ಸಿದ್ಧಾನ್ತ-ಸೂತ್ರ}
೪.೨.೪೩ \ ಅಪವರ್ಗೇ ऽಪ್ಯೇವಂ ಪ್ರಸಙ್ಗಃ
{ಪೂರ್ವಪಕ್ಷ-ಸೂತ್ರ}
೪.೨.೪೪ \ ನ, ನಿಷ್ಪನ್ನಾವಶ್ಯಮ್ಭಾವಿತ್ವಾತ್
{ಸಿದ್ಧಾನ್ತ-ಸೂತ್ರ}
೪.೨.೪೫ \ ತದಭಾವಶ್ಚಾಪವರ್ಗೇ
{ಸಿದ್ಧಾನ್ತ-ಸೂತ್ರ}
೪.೨.೪೬ \ ತದರ್ಥಂ ಯಮನಿಯಮಾಭ್ಯಾಸಾತ್ಮಸಂಸ್ಕಾರೋ ಯೋಗಾಚ್ಚಾಧ್ಯಾತ್ಮವಿಧ್ಯುಪಾಯೈಃ
{ಸಿದ್ಧಾನ್ತ-ಸೂತ್ರ}
೪.೨.೪೭ \ ಜ್ಞಾನಗ್ರಹಣಾಭ್ಯಾಸಸ್ತದ್ವಿದ್ಯೈಶ್ಚ ಸಹ ಸಂವಾದಃ
{ಸಿದ್ಧಾನ್ತ-ಸೂತ್ರ}
೪.೨.೪೮ \ ತಂ ಶಿಷ್ಯಗುರುಸಬ್ರಹ್ಮಚಾರಿವಿಶಿಷ್ಟಶ್ರೇಯೋ ऽರ್ಥಿಭಿರನಸೂಯಿಭಿರಭ್ಯುಪೇಯಾತ್
{ಸಿದ್ಧಾನ್ತ-ಸೂತ್ರ}
೪.೨.೪೯ \ ಪ್ರತಿಪಕ್ಷಹೀನಮ್ ಅಪಿ ವಾ ಪ್ರಯೋಜನಾರ್ಥಮರ್ಥಿತ್ವೇ
॥ತತ್ತ್ವಜ್ಞಾನಪರಿಪಾಲನಪ್ರಕರಣಮ್ (೫೦-೫೧)॥
೪.೨.೫೦ \ ತತ್ತ್ವಾಧ್ಯವಸಾಯಸಂರಕ್ಷಣಾರ್ಥಂ ಜಲ್ಪವಿತಣ್ಡೇ, ಬೀಜಪ್ರರೋಹಸಂರಕ್ಷ್ಣಾರ್ಥಂ ಕಣ್ಟಕಶಾಖಾವರಣವತ್
{ಸಿದ್ಧಾನ್ತ-ಸೂತ್ರ}
೪.೨.೫೧ \ ತಾಭ್ಯಾಂ ವಿಗೃಹ್ಯಕಥನಮ್
{ಸಿದ್ಧಾನ್ತ-ಸೂತ್ರ}
(ಇತಿ ನ್ಯಾಯಸೂತ್ರೇ ಚತುರ್ಥಾಧ್ಯಾಯಸ್ಯ ದ್ವಿತೀಯಮ್ ಆಹ್ನಿಕಮ್)
(ಸಮಾಪ್ತಶ್ಚ ಚತುರ್ಥಃ ಅಧ್ಯಾಯಃ)
(ಅಥ ಪಞ್ಚಮಃ ಅಧ್ಯಾಯಃ)
(ಪ್ರಥಮಮ್ ಆಹ್ನಿಕಮ್)
॥ಸತ್ಪ್ರತಿಪಕ್ಷದೇಶನಾಭಾಸಪ್ರಕರ್ಣಮ್ (೧-೩)॥
೫.೧.೧ \ ಸಾಧರ್ಮ್ಯವೈಧರ್ಮ್ಯೋತ್ಕರ್ಷಾಪಕರ್ಷವರ್ಣ್ಯಾವರ್ಣ್ಯವಿಕಲ್ಪಸಾಧ್ಯಪ್ರಾಪ್ತ್ಯಪ್ರಾಪ್ತಿಪ್ರಷಙ್ಗಪ್ರತಿದೃಷ್ಟಾನ್ತಾನುತ್ಪತ್ತಿ-
ಸಂಶಯಪ್ರಕರಣಹೇತ್ವರ್ಥಾ ಪತ್ತ್ಯವಿಶೇಷೋಪಪತ್ತ್ಯುಪಲಬ್ಧ್ಯನುಪಲಬ್ಧಿನಿತ್ಯಾನಿತ್ಯಕಆರ್ಯಸಮಾಃ
{ಸಿದ್ಧಾನ್ತ-ಸೂತ್ರ}
೫.೧.೨ \ ಸಾಧರ್ಮ್ಯವೈಧರ್ಮ್ಯಾಭ್ಯಾಮುಪಸಂಹಾರೇ ತದ್ಧರ್ಮವಿಪರ್ಯಯೋಪಪತ್ತೇಃ ಸಾಧರ್ಮ್ಯವೈಧರ್ಮ್ಯಸಮೌ
{ಸಿದ್ಧಾನ್ತ-ಸೂತ್ರ}
೫.೧.೩ \ ಗೋತ್ವಾದ್ ಗೋಸಿದ್ಧಿವತ್ ತತ್ಸಿದ್ಧಿಃ
{ಸಿದ್ಧಾನ್ತ-ಸೂತ್ರ}
॥ಉತ್ಕರ್ಷಸಮಾದಿಜಾತಿಷಟ್ಕಪ್ರಕರಣಮ್ (೪-೬)॥
೫.೧.೪ \ ಸಾಧ್ಯದೃಷ್ಟಾನ್ತಯೋರ್ಧರ್ಮವಿಕಲ್ಪಾದುಭಯಸಾಧ್ಯತ್ವಾಚ್ಚೋತ್ಕರ್ಷಾಪಕರ್ಷ ವರ್ಣ್ಯವಿಕಲ್ಪಸಾಧ್ಯಸಮಾಃ
{ಸಿದ್ಧಾನ್ತ-ಸೂತ್ರ}
೫.೧.೫ \ ಕಿಞ್ಚಿತ್ಸಾಧರ್ಮ್ಯಾದುಪಸಂಹಾರಸಿದ್ಧೇರ್ವೈಧರ್ಮ್ಯಾದಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
೫.೧.೬ \ ಸಾಧ್ಯಾತಿದೇಶಾಚ್ಚ ದೃಷ್ಟಾನ್ತೋಪಪ್ತ್ತೇಃ
{ಸಿದ್ಧಾನ್ತ-ಸೂತ್ರ}
॥ಪ್ರಾಪ್ತ್ಯಪ್ರಾಪ್ತಿಸಮಜಾತಿದ್ವಯಪ್ರಕರಣಮ್ (೭-೮)॥
೫.೧.೭ \ ಪ್ರಾಪ್ಯ ಸಾಧ್ಯಮಪ್ರಾಪ್ಯ ವಾ ಹೇತೋಃ ಪ್ರಾಪ್ತ್ಯಾವಿಶಿಷ್ಟತ್ವಾದಪ್ರಾಪ್ತ್ಯಾಸಾಧಾಕ ತ್ವಾಚ್ಚ ಪ್ರಾಪ್ತ್ಯಪ್ರಾಪ್ತಿಸಮೌ
{ಸಿದ್ಧಾನ್ತ-ಸೂತ್ರ}
೫.೧.೮ \ ಘಟಾದಿನಿಷ್ಪತ್ತಿದರ್ಶನಾತ್ ಪೀಡನೇ ಚಾಭಿಚಾರಾದಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಪ್ರಸಙ್ಗಪ್ರತಿದೃಷ್ಟಾನ್ತಸಮಪ್ರಕರಣಮ್ (೯-೧೧)॥
೫.೧.೯ \ ದೃಷ್ಟಾನ್ತಸ್ಯ ಕಾರಣಾನಪದೇಶಾತ್ ಪ್ರತ್ಯವಸ್ಥಾನಾಚ್ಚ ಪ್ರತಿದೃಷ್ಟಾನ್ತೇನ ಪ್ರಸಙ್ಗಪ್ರತಿದೃಷ್ಟಾನ್ತಸಮೌ
{ಸಿದ್ಧಾನ್ತ-ಸೂತ್ರ}
೫.೧.೧೦ \ ಪ್ರದೀಪೋಪಾದಾನಪ್ರಸಙ್ಗನಿವೃತ್ತಿವತ್ ತದ್ವಿನಿವೃತ್ತಿಃ
{ಸಿದ್ಧಾನ್ತ-ಸೂತ್ರ}
೫.೧.೧೧ \ ಪ್ರತಿದೃಷ್ಟಾನ್ತಹೇತುತ್ವೇ ಚ ನಾಹೇತುರ್ದೃಷ್ಟಾನ್ತಃ
{ಸಿದ್ಧಾನ್ತ-ಸೂತ್ರ}
॥ಅನುತ್ಪತ್ತಿಸಮಪ್ರಕರಣಮ್ (೧೨-೧೩)॥
೫.೧.೧೨ \ ಪ್ರಾಗುತ್ಪತ್ತೇಃ ಕಾರಣಾಭಾವಾದನುತ್ಪತ್ತಿಸಮಃ
{ಸಿದ್ಧಾನ್ತ-ಸೂತ್ರ}
೫.೧.೧೩ \ ತಥಾಭಾವಾದುತ್ಪನ್ನಸ್ಯ ಕಾರಣೋಪಪತ್ತೇರ್ನ ಕಾರಣಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಸಂಶಯಸಮಪ್ರಕರಣಮ್ (೧೪-೧೫)॥
೫.೧.೧೪ \ ಸಾಮಾನ್ಯದೃಷ್ಟಾನ್ತಯೋರೈನ್ದ್ರಿಯಕತ್ವೇ ಸಮಾನೇ ನಿತ್ಯಾನಿತ್ಯಸಾಧರ್ಮ್ಯಾತ್ ಸಂಶಯಸಮಃ
{ಸಿದ್ಧಾನ್ತ-ಸೂತ್ರ}
೫.೧.೧೫ \ ಸಾಧರ್ಮ್ಯಾತ್ಸಂಶಯೇ ನ ಸಂಶಯೋ ವೈಧರ್ಮ್ಯಾದುಭಯಥಾ ವಾ ಸಂಶಯೇ ऽತ್ಯನ್ತ ಸಂಶಯಪ್ರಸಙ್ಗೋ
ನಿತ್ಯತ್ವಾನಭ್ಯೂಪಗಮಾಚ್ಚ ಸಾಮಾನ್ಯಸ್ಯಾಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಪ್ರಕರಣಸಮಪ್ರಕರಣಮ್ (೧೬-೧೭)॥
೫.೧.೧೬ \ ಉಭಯಸಾಧರ್ಮ್ಯಾತ್ ಪ್ರಕ್ರಿಯಾಸಿದ್ಧೇಃ ಪ್ರಕರಣಸಮಃ
{ಸಿದ್ಧಾನ್ತ-ಸೂತ್ರ}
೫.೧.೧೭ \ ಪ್ರತಿಪಕ್ಷಾತ್ ಪ್ರಕರಣಸಿದ್ಧೇಃ ಪ್ರತಿಷೇಧಾನುಪಪತ್ತಿಃ ಪ್ರತಿಪಕ್ಷೋಪಪತ್ತೇಃ
{ಸಿದ್ಧಾನ್ತ-ಸೂತ್ರ}
॥ಅಹೇತುಸಮಪ್ರಕರಣಮ್ (೧೮-೨೦)॥
೫.೧.೧೮ \ ತ್ರೈಕಾಲ್ಯಾಸಿದ್ಧೇರ್ಹೇತೋರಹೇತುಸಮಃ
{ಸಿದ್ಧಾನ್ತ-ಸೂತ್ರ}
೫.೧.೧೯ \ ನ ಹೇತುತಃ ಸಾಧ್ಯಸಿದ್ಧೇಸ್ತ್ರೈಕಾಲ್ಯಾಸ್ಸಿದ್ಧಿಃ
{ಸಿದ್ಧಾನ್ತ-ಸೂತ್ರ}
೫.೧.೨೦ \ ಪ್ರತಿಷೇಧಾನುಪಪತ್ತೇಶ್ಚ ಪ್ರತಿಷೇದ್ಧವ್ಯಾಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಅರ್ಥಾಪತ್ತಿಸಮಪ್ರಕರಣಮ್ (೨೧-೨೨)॥
೫.೧.೨೧ \ ಅರ್ಥಾಪತ್ತಿತಃ ಪ್ರತಿಪಕ್ಷಸಿದ್ಧೇರರ್ಥಾಪತ್ತಿಸಮಃ
{ಸಿದ್ಧಾನ್ತ-ಸೂತ್ರ}
೫.೧.೨೨ \ ಅನುಕ್ತಸ್ಯಾರ್ಥಾಪತ್ತೇಃ ಪಕ್ಷಹಾನೇರುಪಪತ್ತಿರನುಕ್ತತ್ವಾದನೈಕಾನ್ತಿಕತ್ವಾಚ್ ಚಾರ್ಥಾಪತ್ತೇಃ
{ಸಿದ್ಧಾನ್ತ-ಸೂತ್ರ}
॥ಅವಿಶೇಷಸಮಪ್ರಕರಣಮ್ (೨೩-೨೪)॥
೫.೧.೨೩ \ ಏಕಧರ್ಮೋಪಪತ್ತೇರವಿಶೇಷೇ ಸರ್ವಾವಿಶೇಷಪ್ರಸಙ್ಗಾತ್ಸದ್ಭಾಬೋಪಪತ್ತೇರ್-
ಅವಿಶೇಷಸಮಃ
{ಸಿದ್ಧಾನ್ತ-ಸೂತ್ರ}
೫.೧.೨೪ \ ಕ್ವಚಿದ್ಧರ್ಮಾನುಪಪತ್ತೇಃ ಕ್ವಚಿಚ್ಚೋಪಪತ್ತೇಃ ಪ್ರತಿಷೇಧಾಭಾವಃ
{ಸಿದ್ಧಾನ್ತ-ಸೂತ್ರ}
॥ಉಅಪಪತ್ತಿಸಮಪ್ರಕರಣಮ್ (೨೫-೨೬)॥
೫.೧.೨೫ \ ಉಭಯೋಕಾರಣೋಪಪತ್ತೇರುಪಪತ್ತಿಸಮಃ
{ಸಿದ್ಧಾನ್ತ-ಸೂತ್ರ}
೫.೧.೨೬ \ ಉಅಪಪತ್ತಿಕಾರಣಾಭ್ಯನಿಞ್ಜಾನಾದಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಉಪಲಬ್ಧಿಸಮಪ್ರಕರಣಮ್ (೨೭-೨೮)॥
೫.೧.೨೭ \ ನಿರ್ದಿಷ್ಟಕಾರಣಾಭಾವೇ ऽಪ್ಯುಪಲಮ್ಭಾದುಪಲಬ್ಧಿಸಮಃ
{ಸಿದ್ಧಾನ್ತ-ಸೂತ್ರ}
೫.೧.೨೮ \ ಕಾರಣಾನ್ತರಾದಪಿ ತದ್ಧರ್ಮೋಪಪತ್ತೇರಪ್ರತಿಷೇಧಃ
{ಸಿದ್ಧಾನ್ತ-ಸೂತ್ರ}
॥ಅನುಪಲಬ್ಧಿಸಮಪ್ರಕರಣಮ್ (೨೯-೩೧)॥
೫.೧.೨೯ \ ತದನುಪಲಬ್ಧೇರನುಪಲಮ್ಭಾದಭಾವಸಿದ್ಧೌ ತದ್ವಿಪರೀತೋಪಪತ್ತೇರ್ ಅನುಪಲಬ್ಧಿಸಮಃ
{ಸಿದ್ಧಾನ್ತ-ಸೂತ್ರ}
೫.೧.೩೦ \ ಅನುಪಲಮ್ಭಾತ್ಮಕತ್ವಾದನುಪಲಬ್ಧೇರಹೇತುಃ
{ಸಿದ್ಧಾನ್ತ-ಸೂತ್ರ}
೫.೧.೩೧ \ ಜ್ಞಾನವಿಕಲ್ಪಾನಾಂ ಚ ಭಾವಾಭಾವಸಂವೇದನಾದಧ್ಯಾತ್ಮಮ್
{ಸಿದ್ಧಾನ್ತ-ಸೂತ್ರ}
॥ಅನಿತ್ಯಸಮಪ್ರಕರಣಮ್ (೩೨-೩೪)
೫.೧.೩೨ \ ಸಾಧರ್ಮ್ಯಾತ್ತುಲ್ಯಧರ್ಮೋಪಪತ್ತೇಃ ಸರ್ವಾನಿತ್ಯತ್ವಪ್ರಸಙ್ಗಾದನಿತ್ಯಸಮಃ
{ಸಿದ್ಧಾನ್ತ-ಸೂತ್ರ}
೫.೧.೩೩ \ ಸಾಧರ್ಮ್ಯಾದಸಿದ್ಧೇಃ ಪ್ರತಿಷೇಧಾಸಿದ್ಧಿಃ ಪ್ರತಿಷೇಧ್ಯಸಾಧರ್ಮ್ಯಾಚ್ಚ
{ಸಿದ್ಧಾನ್ತ-ಸೂತ್ರ}
೫.೧.೩೪ \ ದೃಷ್ಟಾನ್ತೇ ಚ ಸಾಧ್ಯಸಾಧನಭಾವೇನ ಪ್ರಜ್ಞಾತಸ್ಯ ಧರ್ಮಸ್ಯ ತಸ್ಯ್ಸ ಚೋಭಯಥಾ ಭಾವಾನ್ನಾವಿಶೇಷಃ
{ಸಿದ್ಧಾನ್ತ-ಸೂತ್ರ}
॥ಅನಿತ್ಯಸಮಪ್ರಕರಣಮ್ (೩೫-೩೬)॥
೫.೧.೩೫ \ ನಿತ್ಯಮನಿತ್ಯಭಾವಾದನಿತ್ಯೇ ನಿತ್ಯತ್ವೋಪಪತ್ತೇರ್ನಿತ್ಯಸಮಃ
{ಸಿದ್ಧಾನ್ತ-ಸೂತ್ರ}
೫.೧.೩೬ \ ಪ್ರತಿಷೇಧ್ಯೇ ನಿತ್ಯಮನಿತ್ಯಭಾವಾದನಿತ್ಯೇ ऽನಿತ್ಯತ್ವೋಪಪತ್ತೇಃ ಪ್ರತಿಷೇಧಾಭಾವಃ
{ಸಿದ್ಧಾನ್ತ-ಸೂತ್ರ}
॥ಕಾರ್ಯಸಮಪ್ರಕರಣಮ್ (೩೭-೩೮)॥
೫.೧.೩೭ \ ಪ್ರಯತ್ನಕಾರ್ಯಾನೇಕತ್ವಾತ್ ಕಾರ್ಯಸಮಃ
{ಸಿದ್ಧಾನ್ತ-ಸೂತ್ರ}
೫.೧.೩೮ \ ಕಾರ್ಯಾನ್ಯತ್ವೇ ಪ್ರಯತ್ನಾಹೇತುತ್ವಮನುಪಲಬ್ಧಿಕಾರಣೋಪಪತ್ತೇಃ
{ಸಿದ್ಧಾನ್ತ-ಸೂತ್ರ}
॥ಷಟ್ಪಕ್ಷೀಪ್ರಕರಣಮ್ (೩೯-೪೦)॥
೫.೧.೩೯ \ ಪ್ರತಿಷೇಧೇ ऽಪಿ ಸಮಾನದೋಷಃ
{ಸಿದ್ಧಾನ್ತ-ಸೂತ್ರ}
೫.೧.೪೦ \ ಸರ್ವತ್ರೈವಮ್
{ಸಿದ್ಧಾನ್ತ-ಸೂತ್ರ}
೫.೧.೪೧ \ ಪ್ರತಿಷೇಧವಿಪ್ರತಿಷೇಧೇ ಪ್ರತಿಷೇಧದೋಷವದ್ ದೋಷಃ
{ಸಿದ್ಧಾನ್ತ-ಸೂತ್ರ}
೫.೧.೪೨ \ ಪ್ರತಿಷೇಧಂ ಸದೋಷಮಭ್ಯುಪೇತ್ಯ ಪ್ರತಿಷೇಧವಿಪ್ರತಿಷೇಧೇ ಸಮಾನೋ ದೋಷಪ್ರಸಙ್ಗೋ ಮತಾನುಜ್ಞಾ
{ಸಿದ್ಧಾನ್ತ-ಸೂತ್ರ}
೫.೧.೪೩ \ ಸ್ವಪಕ್ಷಲಕ್ಷನಾಪೇಕ್ಷೋಪಪತ್ತ್ಯುಪಸಂಹಾರೇ ಹೇತುನಿರ್ದೇಶೇ ಪರಪಕ್ಷದೋಷಾ ಭ್ಯುಪಗಮಾತ್ ಸಮಾನೋ ದೋಷ ಇತಿ
{ಸಿದ್ಧಾನ್ತ-ಸೂತ್ರ}
(ಇತಿ ನ್ಯಾಯಸೂತ್ರೇ ಪಞ್ಚಮಾಧ್ಯಾಯಸ್ಯ ಪ್ರಥಮಮ್ ಆಹ್ನಿಕಮ್)
(ದ್ವಿತೀಯಮ್ ಆಹ್ನಿಕಮ್)
೫.೨.೧ \ ಪ್ರತಿಜ್ಞಾಹಾನಿಃ ಪ್ರತಿಜ್ಞಾನ್ತರಂ ಪ್ರತಿಜ್ಞಾವಿರೋಧಃ ಪ್ರತಿಜ್ಞಾಸನ್ನ್ಯಾಸೋ ಹೇತ್ವನ್ತರಮ್ ಅರ್ಥಾನ್ತರಂ
ನಿರರ್ಥಕಮ್ ಅವಿಜ್ಞಾತಾರ್ಥಮ್ ಅಪಾರ್ಥಕಮ್ ಅಪ್ರಾಪ್ತ ಕಾಲಂ ನ್ಯೂನಮ್ ಅಧಿಕಂ ಪುನರುಕ್ತಮ್ ಅನನುಭಾಷಣಮ್
ಅಜ್ಞಾನಮ್ ಅಪ್ರತಿಭಾ ವಿಕ್ಷೇಪೋ ಮತಾನುಜ್ಞಾ ಪರ್ಯನುಯೋಜ್ಯೋಪೇಕ್ಷಣಂ ನಿರನುಯೋಜ್ಯಾನುಯೋಗೋ ऽಪಸಿದ್ಧಾನ್ತೋ
ಹೇತ್ವಾ ಭಾಸಾಶ್ಚ ನಿಗ್ರಹಸ್ಥಾನಾನಿ
{ನಿಗ್ರಹಸ್ಥಾನ-ಉದ್ದೇಶ-ಸೂತ್ರಮ್}
॥ನಿಗ್ರಹಸ್ಥಾನಪಞ್ಚಕಪ್ರಕರಣಮ್ (೨-೬)॥
೫.೨.೨ \ ಪ್ರತಿದೃಷ್ಟಾನ್ತಧರ್ಮಾಭ್ಯನುಜ್ಞಾ ಸ್ವದೃಷ್ಟಾನ್ತೇ ಪ್ರತಿಜ್ಞಾಹಾನಿಃ
{ಪ್ರತಿಜ್ಞಾಹಾನಿಃ ಲಕ್ಷಣ-ಸೂತ್ರಮ್}
೫.೨.೩ \ ಪ್ರತಿಜ್ಞಾತಾರ್ಥಪ್ರತಿಷೇಧಧರ್ಮವಿಕಲ್ಪಾತ್ ತದರ್ಥನಿರ್ದೇಶಃ ಪ್ರತಿಜ್ಞಾನ್ತರ.
{ಪ್ರತಿಜ್ಞಾನ್ತರ-ಲಕ್ಷಣ-ಸೂತ್ರಮ್}
೫.೨.೪ \ ಪ್ರತಿಜ್ಞಾಹೇತ್ವೋರ್ವಿರೋಧಃ ಪ್ರತಿಜ್ಞಾವಿರೋಧಃ
{ಪ್ರತಿಜ್ಞಾವಿರೋಧಃ ಲಕ್ಷಣ-ಸೂತ್ರಮ್}
೫.೨.೫ \ ಪಕ್ಷಪ್ರತಿಷೇಧೇ ಪ್ರತಿಜ್ಞಾತಾರ್ಥಾಪನಯನಂ ಪ್ರತಿಜ್ಞಾಸನ್ನ್ಯಾಸಃ
{ಪ್ರತಿಜ್ಞಾಸನ್ನ್ಯಾಸಃ ಲಕ್ಷಣ-ಸೂತ್ರಮ್}
೫.೨.೬ \ ಅವಿಶೇಷೋಕ್ತೇ ಹೇತೌ ಪ್ರತಿಷಿದ್ಧೇ ವಿಶೇಷಮಿಚ್ಛತೋ ಹೇತ್ವನ್ತರಮ್
{ಹೇತ್ವನ್ತರಮ್ ಲಕ್ಷಣ-ಸೂತ್ರಮ್}
॥ನಿಗ್ರಹಸ್ಥಾನಚತುಷ್ಕಪ್ರಕರಣಮ್ (೭-೧೦)॥
೫.೨.೭ \ ಪ್ರಕೃತಾದರ್ಥಾದಪ್ರತಿಸಮ್ಬ್ದ್ಧಾರ್ಥಮರ್ಥಾನ್ತರಮ್
{ಅರ್ಥಾನ್ತರಮ್ ಲಕ್ಷಣ-ಸೂತ್ರಮ್}
೫.೨.೮ \ ವರ್ಣಕ್ರಮನಿರ್ದೇಶವನ್ನಿರರ್ಥಕಮ್
{ನಿರರ್ಥಕಮ್ ಲಕ್ಷಣ-ಸೂತ್ರಮ್}
೫.೨.೯ \ ಪರಿಷತ್ಪ್ರತಿವಾದಿಭ್ಯಾಂ ತ್ರಿರಭಿಹಿತಮಪ್ಯವಿಜ್ಞಾತಮವಿಜ್ಞಾತಾರ್ಥಮ್
{ಅವಿಜ್ಞಾತಾರ್ಥಮ್ ಲಕ್ಷಣ-ಸೂತ್ರಮ್}
೫.೨.೧೦ \ ಪೌರ್ವಾಪರ್ಯಾಯೋಗಾದಪ್ರತಿಸಮ್ಬದ್ಧಾರ್ಥಮಪಾರ್ಥಕಮ್
{ಅಪಾರ್ಥಕಮ್ ಲಕ್ಷಣ-ಸೂತ್ರಮ್}
॥ನಿಗ್ರಹಸ್ಥಾನತ್ರಿಕಪ್ರಕರಣಮ್ (೧೧-೧೩)॥
೫.೨.೧೧ \ ಅವಯವವಿಪರ್ಯಾಸವಚನಮಪ್ರಾಪ್ತಕಾಲಮ್
{ಅಪ್ರಾಪ್ತಕಾಲಮ್ ಲಕ್ಷಣ-ಸೂತ್ರಮ್}
೫.೨.೧೨ \ ಹೀನಮನ್ಯತಮೇನಾಪ್ಯವಯವೇನ ನ್ಯೂನಮ್
{ನ್ಯೂನಮ್ ಲಕ್ಷಣ-ಸೂತ್ರಮ್}
೫.೨.೧೩ \ ಹೇತೂದಾಹರಣಾಧಿಕಮ್ ಅಧಿಕಮ್
{ಅಧಿಕಮ್ ಲಕ್ಷಣ-ಸೂತ್ರಮ್}
॥ಪುನರುಕ್ತಿನಿಗ್ರಹಸ್ಥಾನಪ್ರಕರಣಮ್ (೧೪-೧೬)॥
೫.೨.೧೪ \ ಶಬ್ದಾರ್ಥಯೋಃ ಪುನರ್ವಚನಂ ಪುನರುಕ್ತಮ್ ಅನ್ಯತ್ರ ಅನುವಾದಾತ್
{ಪುನರುಕ್ತಮ್ ಲಕ್ಷಣ-ಸೂತ್ರಮ್}
೫.೨.೧೫ \ ಅನುವಾದೇ ತು ಅಪುನರುಕ್ತಂ ಶಬ್ದಾಭ್ಯಾಸಾತ್ ಅರ್ಥವಿಶೇಷೋಪಪತ್ತೇಃ
{ಪುನರುಕ್ತಮ್ ಲಕ್ಷಣಾಪವಾದಸೂತ್ರಮ್}
೫.೨.೧೬ \ ಅರ್ಥಾತ್ ಆಪನ್ನಸ್ಯ ಸ್ವಶಬ್ದೇನ ಪುನರ್ವಚನಮ್
{ಪುನರುಕ್ತಮ್ ಲಕ್ಷಣಾಪವಾದಸೂತ್ರಮ್}
॥ಉತ್ತರವಿರೋಧಿನಿಗ್ರಹಸ್ಥಾನಚತುಷ್ಕಪ್ರಕರಣಮ್ (೧೭-೨೦)॥
೫.೨.೧೭ \ ವಿಜ್ಞಾತಸ್ಯ ಪರಿಷದಾ ತ್ರಿಃ ಅಭಿಹಿತಸ್ಯ ಅಪಿ ಅಪ್ರತ್ಯುಚ್ಚಾರಣಮ್ ಅನನುಭಾಷಣಮ್
{ಅನನುಭಾಷಣಮ್ ಲಕ್ಷಣ-ಸೂತ್ರಮ್}
೫.೨.೧೮ \ ಅವಿಜ್ಞಾತಮ್ ಚ ಅಜ್ಞಾನಮ್
{ಅಜ್ಞಾನಮ್ ಲಕ್ಷಣ-ಸೂತ್ರಮ್}
೫.೨.೧೯ \ ಉತ್ತರಸ್ಯ ಅಪ್ರತಿಪತ್ತಿಃ ಅಪ್ರತಿಭಾ
{ಅಪ್ರತಿಭಾ ಲಕ್ಷಣ-ಸೂತ್ರಮ್}
೫.೨.೨೦ \ ಕಾರ್ಯವ್ಯಾಸಙ್ಗಾತ್ ಕಥಾವಿಚ್ಛೇದಃ ವಿಕ್ಷೇಪಃ
{ವಿಕ್ಷೇಪಃ ಲಕ್ಷಣ-ಸೂತ್ರಮ್}
॥ಮತಾನುಜ್ಞಾದಿನಿಗ್ರಹಸ್ಥಾನತ್ರಿಕಪ್ರಕರಣಮ್ (೨೧-೨೩)॥
೫.೨.೨೧ \ ಸ್ವಪಕ್ಷೇ ದೋಷಾಭ್ಯುಪಗಮಾತ್ ಪರಪಕ್ಷೇ ದೋಷಪ್ರಸಙ್ಗಃ ಮತಾನುಜ್ಞಾ
{ಮತಾನುಜ್ಞಾ ಲಕ್ಷಣ-ಸೂತ್ರಮ್}
೫.೨.೨೨ \ ನಿಗ್ರಹಸ್ಥಾನಪ್ರಾಪ್ತಸ್ಯ ಅನಿಗ್ರಹಃ ಪರ್ಯನುಯೋಜ್ಯೋಪೇಕ್ಷಣಮ್
{ಪರ್ಯನುಯೋಜ್ಯೋಪೇಕ್ಷಣಮ್ ಲಕ್ಷಣ-ಸೂತ್ರಮ್}
೫.೨.೨೩ \ ಅನಿಗ್ರಹಸ್ಥಾನೇ ನಿಗ್ರಹಸ್ಥಾನಾಭಿಯೋಗಃ ನಿರನುಯೋಜ್ಯಾನುಯೋಗಃ
{ನಿರನುಯೋಜ್ಯಾನುಯೋಗ ಲಕ್ಷಣ-ಸೂತ್ರಮ್}
॥ಕಥಕಾನ್ಯೋಕ್ತಿನಿರೂಪ್ಯನಿಗ್ರಹಸ್ಥಾನದ್ವಯಪ್ರಕರಣಮ್ (೨೪-೨೫)॥
೫.೨.೨೪ \ ಸಿದ್ಧಾನ್ತಮ್ ಅಭ್ಯುಪೇತ್ಯ ಅನಿಯಮಾತ್ ಕಥಾಪ್ರಸಙ್ಗಃ ಅಪಸಿದ್ಧಾನ್ತಃ
{ಅಪಸಿದ್ಧಾನ್ತ ಲಕ್ಷಣ-ಸೂತ್ರಮ್}
೫.೨.೨೫ \ ಹೇತ್ವಾಭಾಸಾಃ ಚ ಯಥೋಕ್ತಾಃ
{ಹೇತ್ವಾಭಾಸ ನಿರೂಪಣಮ್}
(ಇತಿ ನ್ಯಾಯಸೂತ್ರೇ ಪಞ್ಚಮಾಧ್ಯಾಯಸ್ಯ ದ್ವಿತೀಯಮ್ ಆಹ್ನಿಕಮ್)
(ಸಮಾಪ್ತಶ್ಚಾಯಮ್ ಪಞ್ಚಮಾಧ್ಯಾಯಃ)
ನ್ಯಾಯದರ್ಶನಂ ಸಮಾಪ್ತಮ್