॥೧॥

ಕಶ್ಚಿತ್ ಕಾನ್ತಾವಿರಹಗುರುಣಾ ಸ್ವಾಧಿಕಾರಾತ್ ಪ್ರಮತ್ತಃ

ಶಾಪೇನಾಸ್ತಂಗಮಿತಮಹಿಮಾ ವರ್ಷಭೋಗ್ಯೇಣ ಭರ್ತುಃ।

ಯಕ್ಷಶ್ ಚಕ್ರೇ ಜನಕತನಯಾಸ್ನಾನಪುಣ್ಯೋದಕೇಷು

ಸ್ನಿಗ್ಧಚ್ಛಾಯಾತರುಷು ವಸತಿಂ ರಾಮಗಿರ್ಯಾಶ್ರಮೇಷು॥೧.೧॥

ತಸ್ಮಿನ್ನ್ ಅದ್ರೌ ಕತಿಚಿದ್ ಅಬಲಾವಿಪ್ರಯುಕ್ತಃ ಸ ಕಾಮೀ

ನೀತ್ವಾ ಮಾಸಾನ್ ಕನಕವಲಯಭ್ರಂಶರಿಕ್ತಪ್ರಕೋಷ್ಠಃ।

ಆಷಾಢಸ್ಯ ಪ್ರಥಮದಿವಸೇ ಮೇಘಮ್ ಆಶ್ಲಿಷ್ಟಸಾನುಂ

ವಪ್ರಕ್ರೀಡಾಪರಿಣತಗಜಪ್ರೇಕ್ಷಣೀಯಂ ದದರ್ಶ॥೧.೨॥

ತಸ್ಯ ಸ್ಥಿತ್ವಾ ಕಥಮ್ ಅಪಿ ಪುರಃ ಕೌತುಕಾಧಾನಹೇತೋರ್

ಅನ್ತರ್ಬಾಷ್ಪಶ್ ಚಿರಮ್ ಅನುಚರೋ ರಾಜರಾಜಸ್ಯ ದಧ್ಯೌ।

ಮೇಘಾಲೋಕೇ ಭವತಿ ಸುಖಿನೋ ऽಪ್ಯ್ ಅನ್ಯಥಾವೃತ್ತಿ ಚೇತಃ

ಕಣ್ಠಾಶ್ಲೇಷಪ್ರಣಯಿನಿ ಜನೇ ಕಿಂ ಪುನರ್ ದೂರಸಂಸ್ಥೇ॥೧.೩॥

ಪ್ರತ್ಯಾಸನ್ನೇ ನಭಸಿ ದಯಿತಾಜೀವಿತಾಲಮ್ಬನಾರ್ಥೀ

ಜೀಮೂತೇನ ಸ್ವಕುಶಲಮಯೀಂ ಹಾರಯಿಷ್ಯನ್ ಪ್ರವೃತ್ತಿಮ್।

ಸ ಪ್ರತ್ಯಗ್ರೈಃ ಕುಟಜಕುಸುಮೈಃ ಕಲ್ಪಿತಾರ್ಘಾಯ ತಸ್ಮೈ

ಪ್ರೀತಃ ಪ್ರೀತಿಪ್ರಮುಖವಚನಂ ಸ್ವಾಗತಂ ವ್ಯಾಜಹಾರ॥೧.೪॥

ಧೂಮಜ್ಯೋತಿಃಸಲಿಲಮರುತಾಂ ಸಂನಿಪಾತಃ ಕ್ವ ಮೇಘಃ

ಸನ್ದೇಶಾರ್ಥಾಃ ಕ್ವ ಪಟುಕರಣೈಃ ಪ್ರಾಣಿಭಿಃ ಪ್ರಾಪಣೀಯಾಃ।

ಇತ್ಯ್ ಔತ್ಸುಕ್ಯಾದ್ ಅಪರಿಗಣಯನ್ ಗುಹ್ಯಕಸ್ ತಂ ಯಯಾಚೇ

ಕಾಮಾರ್ತಾ ಹಿ ಪ್ರಕೃತಿಕೃಪಣಾಶ್ ಚೇತನಾಚೇತಏಷು॥೧.೫॥

ಜಾತಂ ವಂಶೇ ಭುವನವಿದಿತೇ ಪುಷ್ಕರಾವರ್ತಕಾನಾಂ

ಜಾನಾಮಿ ತ್ವಾಂ ಪ್ರಕೃತಿಪುರುಷಂ ಕಾಮರ್ಊಪಂ ಮಘೋನಃ।

ತೇನಾರ್ಥಿತ್ವಂ ತ್ವಯಿ ವಿಧಿವಶಾದ್ ದೂರಬನ್ಧುರ್ ಗತೋ ऽಹಂ

ಯಾಚ್ಞಾ ಮೋಘಾ ವರಮ್ ಅಧಿಗುಣೇ ನಾಧಮೇ ಲಬ್ಧಕಾಮಾ॥೧.೬॥

ಸಂತಪ್ತಾನಾಂ ತ್ವಮಸಿ ಶರಣಂ ತತ್ ಪಯೋದ ಪ್ರಿಯಾಯಾಃ

ಸಂದೇಶಂ ಮೇ ಹರ ಧನಪತಿಕ್ರೋಧವಿಶ್ಲೇಷಿತಸ್ಯ।

ಗನ್ತವ್ಯಾ ತೇ ವಸತಿರ್ ಅಲಕಾ ನಾಮ ಯಕ್ಷೇಶ್ವರಾಣಾಂ

ಬಾಹ್ಯೋದ್ಯಾನಸ್ಥಿತಹರಶಿರಶ್ಚನ್ದ್ರಿಕಾಧೌತಹರ್ಮ್ಯಾ॥೧.೭॥

ತ್ವಾಮ್ ಆರ್ಊಢಂ ಪವನಪದವೀಮ್ ಉದ್ಗೃಹೀತಾಲಕಾನ್ತಾಃ

ಪ್ರೇಕ್ಷಿಷ್ಯನ್ತೇ ಪಥಿಕವನಿತಾಃ ಪ್ರತ್ಯಯಾದ್ ಆಶ್ವಸನ್ತ್ಯಃ।

ಕಃ ಸಂನದ್ಧೇ ವಿರಹವಿಧುರಾಂ ತ್ವಯ್ಯ್ ಉಪೇಕ್ಷೇತ ಜಾಯಾಂ

ನ ಸ್ಯಾದ್ ಅನ್ಯೋ ऽಪ್ಯ್ ಅಹಮ್ ಇವ ಜನೋ ಯಃ ಪರಾಧೀನವೃತ್ತಿಃ॥೧.೮॥

ತ್ವಾಂ ಚಾವಶ್ಯಂ ದಿವಸಗಣನಾತತ್ಪರಾಮ್ ಏಕಪತ್ನೀಮ್

ಅವ್ಯಾಪನ್ನಾಮ್ ಅವಿಹತಗತಿರ್ ದ್ರಕ್ಷ್ಯಸಿ ಭ್ರಾತೃಜಾಯಾಮ್।

ಆಶಾಬನ್ಧಃ ಕುಸುಮಸದೃಶಂ ಪ್ರಾಯಶೋ ಹ್ಯ್ ಅಙ್ಗನಾನಾಂ

ಸದ್ಯಃ ಪಾತಿ ಪ್ರಣಯಿ ಹೃದಯಂ ವಿಪ್ರಯೋಗೇ ರುಣದ್ಧಿ॥೧.೯॥

ಮನ್ದಂ ಮನ್ದಂ ನುದತಿ ಪವನಶ್ ಚಾನುಕೂಲೋ ಯಥಾ ತ್ವಾಂ

ವಾಮಶ್ ಚಾಯಂ ನದತಿ ಮಧುರಂ ಚಾತಕಸ್ ತೇ ಸಗನ್ಧಃ।

ಗರ್ಭಾಧಾನಕ್ಷಣಪರಿಚಯಾನ್ ನೂನಮ್ ಆಬದ್ಧಮಾಲಾಃ

ಸೇವಿಷ್ಯನ್ತೇ ನಯನಸುಭಗಂ ಖೇ ಭವನ್ತಂ ಬಲಾಕಾಃ॥೧.೧೦॥

ಕರ್ತುಂ ಯಚ್ ಚ ಪ್ರಭವತಿ ಮಹೀಮ್ ಉಚ್ಛಿಲೀನ್ಧ್ರಾಮ್ ಅವನ್ಧ್ಯಾಂ

ತಚ್ ಛ್ರುತ್ವಾ ತೇ ಶ್ರವಣಸುಭಗಂ ಗರ್ಜಿತಂ ಮಾನಸೋತ್ಕಾಃ।

ಆ ಕೈಲಾಸಾದ್ ಬಿಸಕಿಸಲಯಚ್ಛೇದಪಾಥೇಯವನ್ತಃ

ಸಂಪತ್ಸ್ಯನ್ತೇ ನಭಸಿ ಭವತೋ ರಾಜಹಂಸಾಃ ಸಹಾಯಾಃ॥೧.೧೧॥

ಆಪೃಚ್ಛಸ್ವ ಪ್ರಿಯಸಖಮ್ ಅಮುಂ ತುಙ್ಗಮ್ ಆಲಿಙ್ಗ್ಯ ಶೈಲಂ

ವನ್ದ್ಯೈಃ ಪುಂಸಾಂ ರಘುಪತಿಪದೈರ್ ಅಙ್ಕಿತಂ ಮೇಖಲಾಸು।

ಕಾಲೇ ಕಾಲೇ ಭವತಿ ಭವತೋ ಯಸ್ಯ ಸಂಯೋಗಮ್ ಏತ್ಯ

ಸ್ನೇಹವ್ಯಕ್ತಿಶ್ ಚಿರವಿರಹಜಂ ಮುಞ್ಚತೋ ಬಾಷ್ಪಮುಷ್ಣಮ್॥೧.೧೨॥

ಮರ್ಗಂ ತಾವಚ್ ಛೃಣು ಕಥಯತಸ್ ತ್ವತ್ಪ್ರಯಾಣಾನುರ್ಊಪಂ

ಸಂದೇಶಂ ಮೇ ತದನು ಜಲದ ಶ್ರೋಷ್ಯಸಿ ಶ್ರೋತ್ರಪೇಯಮ್।

ಖಿನ್ನಃ ಖಿನ್ನಃ ಶಿಹರಿಷು ಪದಂ ನ್ಯಸ್ಯ ಗನ್ತಾಸಿ ಯತ್ರ

ಕ್ಷೀಣಃ ಕ್ಷೀಣಃ ಪರಿಲಘು ಪಯಃ ಸ್ರೋತಸಾಂ ಚೋಪಭುಜ್ಯ॥೧.೧೩॥

ಅದ್ರೇಃ ಶೃಙ್ಗಂ ಹರತಿ ಪವನಃ ಕಿಂ ಸ್ವಿದ್ ಇತ್ಯ್ ಉನ್ಮುಖೀಭಿರ್

ದೃಷ್ಟೋತ್ಸಾಹಶ್ ಚಕಿತಚಕಿತಂ ಮುಗ್ಧಸಿದ್ಧಾಙ್ಗನಾಭಿಃ।

ಸ್ಥಾನಾದ್ ಅಸ್ಮಾತ್ ಸರಸನಿಚುಲಾದ್ ಉತ್ಪತೋದಙ್ಮುಖಃ ಖಂ

ದಿಙ್ನಾಗಾನಾಂ ಪಥಿ ಪರಿಹರನ್ ಸ್ಥೂಲಹಸ್ತಾವಲೇಪಾನ್॥೧.೧೪॥

ರತ್ನಚ್ಛಾಯಾವ್ಯತಿಕರ ಇವ ಪ್ರೇಕ್ಷ್ಯಮೇತತ್ಪುರಸ್ತಾದ್

ವಲ್ಮೀಕಾಗ್ರಾತ್ ಪ್ರಭವತಿ ಧನುಃಖಣ್ಡಮ್ ಆಖಣ್ಡಲಸ್ಯ।

ಯೇನ ಶ್ಯಾಮಂ ವಪುರ್ ಅತಿತರಾಂ ಕಾನ್ತಿಮ್ ಆಪತ್ಸ್ಯತೇ ತೇ

ಬರ್ಹೇಣೇವ ಸ್ಫುರಿತರುಚಿನಾ ಗೋಪವೇಷಸ್ಯ ವಿಷ್ಣೋಃ॥೧.೧೫॥

ತ್ವಯ್ಯ್ ಆಯನ್ತಂ ಕೃಷಿಫಲಮ್ ಇತಿ ಭ್ರ್ಊವಿಕಾರಾನ್ ಅಭಿಜ್ಞೈಃ

ಪ್ರೀತಿಸ್ನಿಗ್ಧೈರ್ಜನಪದವಧೂಲೋಚನೈಃ ಪೀಯಮಾನಃ।

ಸದ್ಯಃಸೀರೋತ್ಕಷಣಸುರಭಿ ಕ್ಷೇತ್ರಮ್ ಆರುಹ್ಯ ಮಾಲಂ

ಕಿಂಚಿತ್ ಪಶ್ಚಾದ್ ವ್ರಜ ಲಘುಗತಿರ್ ಭೂಯ ಏವೋತ್ತರೇಣ॥೧.೧೬॥

ತ್ವಾಮ್ ಆಸಾರಪ್ರಶಮಿತವನೋಪಪ್ಲವಂ ಸಾಧು ಮೂರ್ಧ್ನಾ

ವಕ್ಷ್ಯತ್ಯ್ ಅಧ್ವಶ್ರಮಪರಿಗತಂ ಸಾನುಮಾನ್ ಆಮ್ರಕೂಟಃ।

ನ ಕ್ಷುದ್ರೋ ऽಪಿ ಪ್ರಥಮಸುಕೃತಾಪೇಕ್ಷಯಾ ಸಂಶ್ರಯಾಯ

ಪ್ರಾಪ್ತೇ ಮಿತ್ರೇ ಭವತಿ ವಿಮುಖಃ ಕಿಂ ಪುನರ್ ಯಸ್ ತತ್ಥೋಚ್ಚೈಃ॥೧.೧೭॥

ಛನ್ನೋಪಾನ್ತಃ ಪರಿಣತಫಲದ್ಯೋತಿಭಿಃ ಕಾನನಾಮ್ರೈಸ್

ತ್ವಯ್ಯ್ ಆರ್ಊಢೇ ಶಿಖರಮ್ ಅಚಲಃ ಸ್ನಿಗ್ಧವೇಣೀಸವರ್ಣೇ।

ನೂನಂ ಯಾಸ್ಯತ್ಯ್ ಅಮರಮಿಥುನಪ್ರೇಕ್ಷಣೀಯಾಮ್ ಅವಸ್ಥಾಂ

ಮಧ್ಯೇ ಶ್ಯಾಮಃ ಸ್ತನ ಇವ ಭುವಃ ಶೇಷವಿಸ್ತಾರಪಾಣ್ಡುಃ॥೧.೧೮॥

ಸ್ಥಿತ್ವಾ ತಸ್ಮಿನ್ ವನಚರವಧೂಭುಕ್ತಕುಞ್ಜೇ ಮುಹೂರ್ತಂ

ತೋಯೋತ್ಸರ್ಗದ್ರುತತರಗತಿಸ್ ತತ್ಪರಂ ವರ್ತ್ಮ ತೀರ್ಣಃ।

ರೇವಾಂ ದ್ರಕ್ಷ್ಯಸ್ಯ್ ಉಪಲವಿಷಮೇ ವಿನ್ಧ್ಯಪಾದೇ ವಿಶೀರ್ಣಾಂ

ಭಕ್ತಿಚ್ಛೇದೈರ್ ಇವ ವಿರಚಿತಾಂ ಭೂತಿಮ್ ಅಙ್ಗೇ ಗಜಸ್ಯ॥೧.೧೯॥

{ಅಧ್ವಕ್ಲಾನ್ತಂ ಪ್ರತಿಮುಖಗತಂ ಸಾನುಮಾನಾಮ್ರಕೂಟಸ್

ತುಙ್ಗೇನ ತ್ವಾಂ ಜಲದ ಶಿರಸಾ ವಕ್ಷ್ಯತಿ ಶ್ಲಾಘಮಾನಃ।

ಆಸಾರೇಣ ತ್ವಮ್ ಅಪಿ ಶಮಯೇಸ್ ತಸ್ಯ ನೈದಾಘಮ್ ಅಗ್ನಿಂ

ಸದ್ಭಾವಾರ್ದ್ರಃ ಫಲತಿ ನ ಚಿರೇಣೋಪಕಾರೋ ಮಹತ್ಸು॥೧.೧೯ಕ॥}

ತಸ್ಯಾಸ್ ತಿಕ್ತೈರ್ ವನಗಜಮದೈರ್ ವಾಸಿತಂ ವಾನ್ತವೃಷ್ಟಿರ್

ಜಮ್ಬೂಕುಞ್ಜಪ್ರತಿಹತರಯಂ ತೋಯಮ್ ಆದಾಯ ಗಚ್ಛೇಃ।

ಅನ್ತಃಸಾರಂ ಘನ ತುಲಯಿತುಂ ನಾನಿಲಃ ಶಕ್ಷ್ಯತಿ ತ್ವಾಂ

ರಿಕ್ತಃ ಸರ್ವೋ ಭವತಿ ಹಿ ಲಘುಃ ಪೂರ್ಣತಾ ಗೌರವಾಯ॥೧.೨೦॥

ನೀಪಂ ದೃಷ್ಟ್ವಾ ಹರಿತಕಪಿಶಂ ಕೇಸರೈರ್ ಅರ್ಧರ್ಊಢೈರ್

ಆವಿರ್ಭೂತಪ್ರಥಮಮುಕುಲಾಃ ಕನ್ದಲೀಶ್ ಚಾನುಕಚ್ಛಮ್।

ಜಗ್ಧ್ವಾರಣ್ಯೇಷ್ವ್ ಅಧಿಕಸುರಭಿಂ ಗನ್ಧಮ್ ಆಘ್ರಾಯ ಚೋರ್ವ್ಯಾಃ

ಸಾರಙ್ಗಾಸ್ ತೇ ಜಲಲವಮುಚಃ ಸೂಚಯಿಷ್ಯನ್ತಿ ಮಾರ್ಗಮ್॥೧.೨೧॥

ಅಮ್ಭೋಬಿನ್ದುಗ್ರಹಣಚತುರಾಂಶ್ ಚಾತಕಾನ್ ವೀಕ್ಷಮಾಣಾಃ

ಶ್ರೇಣೀಭೂತಾಃ ಪರಿಗಣನಯಾ ನಿರ್ದಿಶನ್ತೋ ಬಲಾಕಾಃ।

ತ್ವಾಮ್ ಆಸಾದ್ಯ ಸ್ತನಿತಸಮಯೇ ಮಾನಯಿಷ್ಯನ್ತಿ ಸಿದ್ಧಾಃ

ಸೋತ್ಕಮ್ಪಾನಿ ಪ್ರಿಯಸಹಚರೀಸಂಭ್ರಮಾಲಿಙ್ಗಿತಾನಿ॥೧.೨೨॥

ಉತ್ಪಶ್ಯಾಮಿ ದ್ರುತಮಪಿ ಸಖೇ ಮತ್ಪ್ರಿಯಾರ್ಥಂ ಯಿಯಾಸೋಃ

ಕಾಲಕ್ಷೇಪಂ ಕಕುಭಸುರಭೌ ಪರ್ವತೇ ಪರ್ವೇತೇ ತೇ।

ಶುಕ್ಲಾಪಾಙ್ಗೈಃ ಸಜಲನಯನೈಃ ಸ್ವಾಗತೀಕೃತ್ಯ ಕೇಕಾಃ

ಪ್ರತುದ್ಯಾತಃ ಕಥಮ್ ಅಪಿ ಭವಾನ್ ಗನ್ತುಮ್ ಆಶು ವ್ಯವಸ್ಯೇತ್॥೧.೨೩॥

ಪಾಣ್ಡುಚ್ಛಾಯೋಪವನವೃತಯಃ ಕೇತಕೈಃ ಸೂಚಿಭಿನ್ನೈರ್

ನೀಡಾರಮ್ಭೈರ್ ಗೃಹಬಲಿಭುಜಾಮ್ ಆಕುಲಗ್ರಾಮಚೈತ್ಯಾಃ।

ತ್ವಯ್ಯ್ ಆಸನ್ನೇ ಪರಿಣತಫಲಶ್ಯಾಮಜಮ್ಬೂವನಾನ್ತಾಃ

ಸಂಪತ್ಸ್ಯನ್ತೇ ಕತಿಪಯದಿನಸ್ಥಾಯಿಹಂಸಾ ದಶಾರ್ಣಾಃ॥೧.೨೪॥

ತೇಷಾಂ ದಿಕ್ಷು ಪ್ರಥಿತವಿದಿಶಾಲಕ್ಷಣಾಂ ರಾಜಧಾನೀಂ

ಗತ್ವಾ ಸದ್ಯಃ ಫಲಮ್ ಅವಿಕಲಂ ಕಾಮುಕತ್ವಸ್ಯ ಲಬ್ಧಾ।

ತೀರೋಪಾನ್ತಸ್ತನಿತಸುಭಗಂ ಪಾಸ್ಯಸಿ ಸ್ವಾದು ಯಸ್ಮಾತ್

ಸಭ್ರ್ಊಭಙ್ಗಂ ಮುಖಮ್ ಇವ ಪಯೋ ವೇತ್ರವತ್ಯಾಶ್ ಚಲೋರ್ಮಿ॥೧.೨೫॥

ನೀಚೈರಾಖ್ಯಂ ಗಿರಿಮ್ ಅಧಿವಸೇಸ್ ತತ್ರ ವಿಶ್ರಾಮಹೇತೋಸ್

ತ್ವತ್ಸಮ್ಪರ್ಕಾತ್ ಪುಲಕಿತಮ್ ಇವ ಪ್ರೌಢಪುಷ್ಪೈಃ ಕದಮ್ಬೈಃ।

ಯಃ ಪುಣ್ಯಸ್ತ್ರೀರತಿಪರಿಮಲೋದ್ಗಾರಿಭಿರ್ ನಾಗರಾಣಾಮ್

ಉದ್ದಾಮಾನಿ ಪ್ರಥಯತಿ ಶಿಲಾವೇಶ್ಮಭಿರ್ ಯೌವನಾನಿ॥೧.೨೬॥

ವಿಶ್ರಾನ್ತಃ ಸನ್ ವ್ರಜ ವನನದೀತೀರಜಾನಾಂ ನಿಷಿಞ್ಚನ್ನ್

ಉದ್ಯಾನಾನಾಂ ನವಜಲಕಣೈರ್ ಯೂಥಿಕಾಜಾಲ್ಕಾನಿ।

ಗಣ್ಡಸ್ವೇದಾಪನಯನರುಜಾಕ್ಲಾನ್ತಕರ್ಣೋತ್ಪಲಾನಾಂ

ಛಾಯಾದಾನಾತ್ ಕ್ಷಣಪರಿಚಿತಃ ಪುಷ್ಪಲಾವೀಮುಖಾನಾಮ್॥೧.೨೭॥

ವಕ್ರಃ ಪನ್ಥಾ ಯದಪಿ ಭವತಃ ಪ್ರಸ್ಥಿತಸ್ಯೋತ್ತರಾಶಾಂ

ಸೌಧೋತ್ಸಙ್ಗಪ್ರಣಯವಿಮುಖೋ ಮಾ ಸ್ಮ ಭೂರ್ ಉಜ್ಜಯಿನ್ಯಾಃ।

ವಿದ್ಯುದ್ದಾಮಸ್ಫುರಿತಚಕ್ರಿತೈಸ್ ತತ್ರ ಪೌರಾಙ್ಗನಾನಾಂ

ಲೋಲಾಪಾಙ್ಗೈರ್ ಯದಿ ನ ರಮಸೇ ಲೋಚನೈರ್ ವಞ್ಚಿತೋ ऽಸಿ॥೧.೨೮॥

ವೀಚಿಕ್ಷೋಭಸ್ತನಿತವಿಹಗಶ್ರೇಣಿಕಾಞ್ಚೀಗುಣಾಯಾಃ

ಸಂಸರ್ಪನ್ತ್ಯಾಃ ಸ್ಖಲಿತಸುಭಗಂ ದರ್ಶಿತಾವರ್ತನಾಭಃ।

ನಿರ್ವಿನ್ಧ್ಯಾಯಾಃ ಪಥಿ ಭವ ರಸಾಭ್ಯನ್ತರಃ ಸಂನಿಪತ್ಯ

ಸ್ತ್ರೀಣಾಮ್ ಆದ್ಯಂ ಪ್ರಣಯವಚನಂ ವಿಭ್ರಮೋ ಹಿ ಪ್ರಿಯೇಷು॥೧.೨೯॥

ವೇಣೀಭೂತಪ್ರತನುಸಲಿಲಾ ತಾಮ್ ಅತೀತಸ್ಯ ಸಿನ್ಧುಃ

ಪಾಣ್ಡುಚ್ಛಾಯಾ ತಟರುಹತರುಭ್ರಂಶಿಭಿರ್ಜೀರ್ಣಪರ್ಣೈಃ।

ಸೌಭಾಗ್ಯಂ ತೇ ಸುಭಗ ವಿರಹಾವಸ್ಥಯಾ ವ್ಯಞ್ಜಯನ್ತೀ

ಕಾರ್ಶ್ಯಂ ಯೇನ ತ್ಯಜತಿ ವಿಧಿನಾ ಸ ತ್ವಯೈವೋಪಪಾದ್ಯಃ॥೧.೩೦॥

ಪ್ರಾಪ್ಯಾವನ್ತೀನ್ ಉದಯನಕಥಾಕೋವಿದಗ್ರಾಮವೃದ್ಧಾನ್

ಪೂರ್ವೋದ್ದಿಷ್ಟಾಮ್ ಉಪಸರ ಪುರೀಂ ಶ್ರೀವಿಶಾಲಾಂ ವಿಶಾಲಾಮ್।

ಸ್ವಲ್ಪೀಭೂತೇ ಸುಚರಿತಫಲೇ ಸ್ವರ್ಗಿಣಾಂ ಗಾಂ ಗತಾನಾಂ

ಶೇಷೈಃ ಪುಣ್ಯೈರ್ ಹೃತಮ್ ಇವ ದಿವಃ ಕಾನ್ತಿಮತ್ ಖಣ್ಡಮ್ ಏಕಮ್॥೧.೩೧॥

ದೀರ್ಘೀಕುರ್ವನ್ ಪಟು ಮದಕಲಂ ಕೂಜಿತಂ ಸಾರಸಾನಾಂ

ಪ್ರತ್ಯೂಷೇಷು ಸ್ಫುಟಿತಕಮಲಾಮೋದಮೈತ್ರೀಕಷಾಯಃ।

ಯತ್ರ ಸ್ತ್ರೀಣಾಂ ಹರತಿ ಸುರತಗ್ಲಾನಿಮ್ ಅಙ್ಗಾನುಕೂಲಃ

ಶಿಪ್ರಾವಾತಃ ಪ್ರಿಯತಮ ಇವ ಪ್ರಾರ್ಥನಾಚಾಟುಕಾರಃ॥೧.೩೨॥

ಹಾರಾಂಸ್ ತಾರಾಂಸ್ ತರಲಗುಟಿಕಾನ್ ಕೋಟಿಶಃ ಶಙ್ಕಶುಕ್ತೀಃ

ಶಷ್ಪಶ್ಯಾಮಾನ್ ಮರಕತಮಣೀನ್ ಉನ್ಮಯೂಖಪ್ರರೋಹಾನ್।

ದೃಷ್ಟ್ವಾ ಯಸ್ಯಾಂ ವಿಪಣಿರಚಿತಾನ್ ವಿದ್ರುಮಾಣಾಂ ಚ ಭಙ್ಗಾನ್

ಸಂಲಕ್ಷ್ಯನ್ತೇ ಸಲಿಲನಿಧಯಸ್ ತೋಯಮಾತ್ರಾವಶೇಷಾಃ॥೧.೩೩॥

ಪ್ರದ್ಯೋತಸ್ಯ ಪ್ರಿಯದುಹಿತರಂ ವತ್ಸರಾಜೋ ऽತ್ರ ಜಹ್ರೇ

ಹೈಮಂ ತಾಲದ್ರುಮವನಮ್ ಅಭೂದ್ ಅತ್ರ ತಸ್ಯೈವ ರಾಜ್ಞಃ।

ಅತ್ರೋದ್ಭ್ರಾನ್ತಃ ಕಿಲ ನಲಗಿರಿಃ ಸ್ತಮ್ಭಮ್ ಉತ್ಪಾಟ್ಯ ದರ್ಪಾದ್

ಇತ್ಯ್ ಆಗನ್ತೂನ್ ರಮಯತಿ ಜನೋ ಯತ್ರ ಬನ್ಧೂನ್ ಅಭಿಜ್ಞಃ॥೧.೩೪॥

ಜಾಲೋದ್ಗೀರ್ಣೈರ್ ಉಪಚಿತವಪುಃ ಕೇಶಸಂಸ್ಕಾರಧೂಪೈರ್

ಬನ್ಧುಪ್ರೀತ್ಯಾ ಭವನಶಿಖ್ಜಿಭಿರ್ ದತ್ತನೃತ್ಯೋಪಹಾರಃ।

ಹರ್ಮ್ಯೇಷ್ವ್ ಅಸ್ಯಾಃ ಕುಸುಮಸುರಭಿಷ್ವ್ ಅಧವಖೇದಂ ನಯೇಥಾ

ಲಕ್ಷ್ಮೀಂ ಪಶ್ಯಂಲ್ ಲಲಿತವನಿತಾಪಾದರಾಗಾಙ್ಕಿತೇಷು॥೧.೩೫॥

ಭರ್ತುಃ ಕಣ್ಠಚ್ಛವಿರ್ ಇತಿ ಗಣೈಃ ಸಾದರಂ ವೀಕ್ಷ್ಯಮಾಣಃ

ಪುಣ್ಯಂ ಯಾಯಾಸ್ ತ್ರಿಭುವನಗುರೋರ್ ಧಾಮ ಚಣ್ಡೀಶ್ವರಸ್ಯ।

ಧೂತೋದ್ಯಾನಂ ಕುವಲಯರಜೋಗನ್ಧಿಭಿರ್ ಗನ್ಧವತ್ಯಾಸ್

ತೋಯಕ್ರೀಡಾನಿರತಯುವತಿಸ್ನಾನತಿಕ್ತೈರ್ ಮರುದ್ಭಿಃ॥೧.೩೬॥

ಅಪ್ಯ್ ಅನ್ಯಸ್ಮಿಞ್ ಜಲಧರ ಮಹಾಕಾಲಮ್ ಆಸಾದ್ಯ ಕಾಲೇ

ಸ್ಥಾತವ್ಯಂ ತೇ ನಯನವಿಷಯಂ ಯಾವದ್ ಅತ್ಯೇತಿ ಭಾನುಃ।

ಕುರ್ವನ್ ಸನ್ಧ್ಯಾವಲಿಪಟಹತಾಂ ಶೂಲಿನಃ ಶ್ಲಾಘನೀಯಾಮ್

ಆಮನ್ದ್ರಾಣಾಂ ಫಲಮ್ ಅವಿಕಲಂ ಲಪ್ಸ್ಯಸೇ ಗರ್ಜಿತಾನಾಮ್॥೧.೩೭॥

ಪಾದನ್ಯಾಸೈಃ ಕ್ವಣಿತರಶನಾಸ್ ತತ್ರ ಲೀಲಾವಧೂತೈ

ರತ್ನಚ್ಛಾಯಾಖಚಿತವಲಿಭಿಶ್ ಚಾಮರೈಃ ಕ್ಲಾನ್ತಹಸ್ತಾಃ।

ವೇಶ್ಯಾಸ್ ತ್ವತ್ತೋ ನಖಪದಸುಖಾನ್ ಪ್ರಾಪ್ಯ ವರ್ಷಾಗ್ರಬಿನ್ದೂನ್

ಆಮೋಕ್ಷ್ಯನ್ತೇ ತ್ವಯಿ ಮಧುಕರಶ್ರೇಣಿದೀರ್ಘಾನ್ ಕಟಕ್ಷಾನ್॥೧.೩೮॥

ಪಶ್ಚಾದ್ ಉಚ್ಚೈರ್ಭುಜತರುವನಂ ಮಣ್ಡಲೇನಾಭ್ಲೀನಃ

ಸಾಂಧ್ಯಂ ತೇಜಃ ಪ್ರತಿನವಜಪಾಪುಷ್ಪರಕ್ತಂ ದಧಾನಃ।

ನೃತ್ತಾರಮ್ಭೇ ಹರ ಪಶುಪತೇರ್ ಆರ್ದ್ರನಾಗಾಜಿನೇಚ್ಛಾಂ

ಶಾನ್ತೋದ್ವೇಗಸ್ತಿಮಿತನಯನಂ ದೃಷ್ಟಭಕ್ತಿರ್ ಭವಾನ್ಯಾ॥೧.೩೯॥

ಗಚ್ಛನ್ತೀನಾಂ ರಮಾಣವಸತಿಂ ಯೋಷಿತಾಂ ತತ್ರ ನಕ್ತಂ

ರುದ್ಧಾಲೋಕೇ ನರಪತಿಪಥೇ ಸೂಚಿಭೇದ್ಯೈಸ್ ತಮೋಭಿಃ।

ಸೌದಾಮನ್ಯಾ ಕನಕನಿಕಷಸ್ನಿಗ್ಧಯಾ ದರ್ಶಯೋರ್ವೀಂ

ತೋಯೋತ್ಸರ್ಗಸ್ತನಿತಮುಹರೋ ಮಾ ಚ ಭೂರ್ವಿಕ್ಲವಾಸ್ತಾಃ॥೧.೪೦॥

ತಾಂ ಕಸ್ಯಾಂಚಿದ್ ಭವನವಲಭೌ ಸುಪ್ತಪಾರಾವತಾಯಾಂ

ನೀತ್ವಾ ರಾತ್ರಿಂ ಚಿರವಿಲಸನಾತ್ ಖಿನ್ನವಿದ್ಯುತ್ಕಲತ್ರಃ।

ದೃಷ್ಟೇ ಸೂರ್ಯೇ ಪುನರಪಿ ಭವಾನ್ ವಾಹಯೇದಧ್ವಶೇಷಂ

ಮನ್ದಾಯನ್ತೇ ನ ಖಲು ಸುಹೃದಾಮಭ್ಯುಪತಾರ್ಥಕೃತ್ಯಾಃ॥೧.೪೧॥

ತಸ್ಮಿನ್ ಕಾಲೇ ನಯನಸಲಿಅಂ ಯೋಷಿತಾಂ ಖಣ್ಡಿತಾನಾಂ

ಶಾನ್ತಿಂ ನೇಯಂ ಪ್ರಣಯಿಭಿರ್ ಅತೋ ವರ್ತ್ಮ ಭಾನೋಸ್ ತ್ಯಜಾಶು।

ಪ್ರಾಲೇಯಾಸ್ತ್ರಂ ಕಮಲವದನಾತ್ ಸೋ.ಅಪಿ ಹರ್ತುಂ ನಲಿನ್ಯಾಃ

ಪ್ರತ್ಯಾವೃತ್ತಸ್ತ್ವಯಿ ಕರರುಧಿ ಸ್ಯಾದನಲ್ಪಭ್ಯಸೂಯಃ॥೧.೪೨॥

ಗಮ್ಭೀರಾಯಾಃ ಪಯಸಿ ಸರಿತಶ್ ಚೇತಸೀವ ಪ್ರಸನ್ನೇ

ಛಾಯಾತ್ಮಾಪಿ ಪ್ರಕೃತಿಸುಭಗೋ ಲಪ್ಸ್ಯತೇ ತೇ ಪ್ರವೇಶಮ್।

ತಸ್ಮಾದ್ ಅಸ್ಯಾಃ ಕುಮುದವಿಶದಾನ್ಯ್ ಅರ್ಹಸಿ ತ್ವಂ ನ ಧೈರ್ಯಾನ್

ಮೋಘೀಕರ್ತುಂ ಚಟುಲಶಫೋರೋದ್ವರ್ತನಪ್ರೇಕ್ಷಿತಾನಿ॥೧.೪೩॥

ತಸ್ಯಾಃ ಕಿಂಚಿತ್ ಕರಧೃತಮ್ ಇವ ಪ್ರಾಪ್ತ್ವಾಈರಶಾಖಂ

ಹೃತ್ವಾ ನೀಲಂ ಸಲಿಲವಸನಂ ಮುಕ್ತರೋಧೋನಿತಮ್ಬಮ್।

ಪ್ರಸ್ಥಾನಂ ತೇ ಕಥಮ್ ಅಪಿ ಸಖೇ ಲಮ್ಬಮಾನಸ್ಯ ಭಾವಿ

ಜ್ಞಾತಾಸ್ವಾದೋ ವಿವೃತಜಘನಾಂ ಕೋ ವಿಹಾತುಂ ಸಮರ್ಥಾ॥೧.೪೪॥

ತ್ವನ್ನಿಷ್ಯನ್ದೋಚ್ಛ್ವಸಿತವಸುಧಾಗನ್ಧಸಮ್ಪರ್ಕರಮ್ಯಃ

ಸ್ರೋತೋರನ್ಧ್ರಧ್ವನಿತಸುಭಗಂ ದನ್ತಿಭಿಃ ಪೀಯಮಾನಃ।

ನೀಚೈರ್ ವಾಸ್ಯತ್ಯ್ ಉಪಜಿಗಮಿಷೋರ್ ದೇವಪೂರ್ವಂ ಗಿರಿಂ ತೇ

ಶೀತೋ ವಾಯುಃ ಪರಿಣಮಯಿತಾ ಕಾನನೋದುಮ್ಬರಾಣಾಮ್॥೧.೪೫॥

ತತ್ರ ಸ್ಕನ್ದಂ ನಿಯತವಸತಿಂ ಪುಷ್ಪಮೇಘೀಕೃತಾತ್ಮಾ

ಪುಷ್ಪಾಸಾರೈಃ ಸ್ನಪಯತು ಭವಾನ್ ವ್ಯೋಮಗಙ್ಗಾಜಲಾರ್ದ್ರೈಃ।

ರಕ್ಷಾಹೇತೋರ್ ನವಶಶಿಭೃತಾ ವಾಸವೀನಾಂ ಚಮೂನಾಮ್

ಅತ್ಯಾದಿತ್ಯಂ ಹುತವಹಮುಖೇ ಸಂಭೃತಂ ತದ್ ಧಿ ತೇಯಃ॥೧.೪೬॥

ಜ್ಯೋತಿರ್ಲೇಖಾವಲಯಿ ಗಲಿತಂ ಯಸ್ಯ ಬರ್ಹಂ ಭವಾನೀ

ಪುತ್ರಪ್ರೇಮ್ಣಾ ಕುವಲಯದಲಪ್ರಾಪಿ ಕರ್ಣೇ ಕರೋತಿ।

ಧೌತಾಪಾಙ್ಗಂ ಹರಶಶಿರುಚಾ ಪಾವಕೇಸ್ ತಂ ಮಯೂರಂ

ಪಶ್ಚಾದ್ ಅದ್ರಿಗ್ರಹಣಗುರುಭಿರ್ ಗರ್ಜಿತೈರ್ ನರ್ತಯೇಥಾಃ॥೧.೪೭॥

ಆರಾದ್ಯೈನಂ ಶರವಣಭವಂ ದೇವಮ್ ಉಲ್ಲಙ್ಘಿತಾಧ್ವಾ

ಸಿದ್ಧದ್ವನ್ದ್ವೈರ್ ಜಲಕಣಭಯಾದ್ ವೀಣಿಭಿರ್ ಮುಕ್ತಮಾರ್ಗಃ।

ವ್ಯಾಲಮ್ಬೇಥಾಃ ಸುರಭಿತನಯಾಲಮ್ಭಜಾಂ ಮಾನಯಿಷ್ಯನ್

ಸ್ರೋತೋಮೂರ್ತ್ಯಾ ಭುವಿ ಪರಿಣತಾಂ ರನ್ತಿದೇವಸ್ಯ ಕೀರ್ತಿಮ್॥೧.೪೮॥

ತ್ವಯ್ಯ್ ಆದಾತುಂ ಜಲಮ್ ಅವನತೇ ಶಾರ್ಙ್ಗಿಣೋ ವರ್ಣಚೌರೇ

ತಸ್ಯಾಃ ಸಿನ್ಧೋಃ ಪೃಥುಮ್ ಅಪಿ ತನುಂ ದೂರಭಾವಾತ್ ಪ್ರವಾಹಮ್।

ಪ್ರೇಕ್ಷಿಷ್ಯನ್ತೇ ಗಗನಗತಯೋ ನೂನಮ್ ಆವರ್ಜ್ಯ ದೃಷ್ಟಿರ್

ಏಕಂ ಭುಕ್ತಾಗುಣಮ್ ಇವ ಭುವಃ ಸ್ಥೂಲಮಧ್ಯೇನ್ದ್ರನೀಲಮ್॥೧.೪೯॥

ತಾಮ್ ಉತ್ತೀರ್ಯ ವ್ರಜ ಪರಿಚಿತಭ್ರ್ಊಲತಾವಿಭ್ರಮಾಣಾಂ

ಪಕ್ಷ್ಮೋತ್ಕ್ಷೇಪಾದ್ ಉಪರಿವಿಲಸತ್ಕೃಷ್ಣಶಾರಪ್ರಭಾಣಾಮ್।

ಕುನ್ದಕ್ಷೇಪಾನುಗಮಧುಕರಶ್ರೀಮುಷಾಮ್ ಆತ್ಮಬಿಮ್ಬಂ

ಪಾತ್ರೀಕುರ್ವನ್ ದಶಪುರವಧೂನೇತ್ರಕೌತೂಹಲಾನಾಮ್॥೧.೫೦॥

ಬ್ರಹ್ಮಾವರ್ತಂ ಜನಪದಮ್ ಅಥ ಚ್ಛಾಯಯಾ ಗಾಹಮಾನಃ

ಕ್ಷೇತ್ರಂ ಕ್ಷತ್ರಪ್ರಧನಪಿಶುನಂ ಕೌರವಂ ತದ್ ಭಜೇಥಾಃ।

ರಾಜನ್ಯಾನಾಂ ಶಿತಶರಶತೈರ್ ಯತ್ರ ಗಾಣ್ಡೀವಧನ್ವಾ

ಧಾರಾಪಾತೈಸ್ ತ್ವಮ್ ಇವ ಕಮಲಾನ್ಯ್ ಅಭ್ಯವರ್ಷನ್ ಮುಖಾನಿ॥೧.೫೧॥

ಹಿತ್ವಾ ಹಾಲಾಮ್ ಅಭಿಮತರಸಾಂ ರೇವತೀಲೋಚನಾಙ್ಕಾಂ

ಬನ್ಧುಪ್ರೀತ್ಯಾ ಸಮರವಿಮುಖೋ ಲಾಙ್ಗಲೀ ಯಾಃ ಸಿಷೇವೇ।

ಕೃತ್ವಾ ತಾಸಾಮ್ ಅಧಿಗಮಮ್ ಅಪಾಂ ಸೌಮ್ಯ ಸಾರಸ್ವತೀನಾಮ್

ಅನ್ತಃ ಶುದ್ಧಸ್ ತ್ವಮ್ ಅಪಿ ಭವಿತಾ ವರ್ಣಮಾತ್ರೇಣ ಕೃಷ್ಣಃ॥೧.೫೨॥

ತಸ್ಮಾದ್ ಗಚ್ಛೇರ್ ಅನುಕನಖಲಂ ಶೈಲರಾಜಾವತೀರ್ಣಾಂ

ಜಾಹ್ನೋಃ ಕನ್ಯಾಂ ಸಗರತನಯಸ್ವರ್ಗಸೋಪಾನಪಙ್ಕ್ತಿಮ್।

ಗೌರೀವಕ್ತ್ರಭ್ರುಕುಟಿರಚನಾಂ ಯಾ ವಿಹಸ್ಯೇವ ಫೇನೈಃ

ಶಮ್ಭೋಃ ಕೇಶಗ್ರಹಣಮ್ ಅಕರೋದ್ ಇನ್ದುಲಗ್ನೋರ್ಮಿಹಸ್ತಾ॥೧.೫೩॥

ತಸ್ಯಾಃ ಪಾತುಂ ಸುರಗಜ ಇವ ವ್ಯೋಮ್ನಿ ಪಶ್ಚಾರ್ಧಲಮ್ಬೀ

ತ್ವಂ ಚೇದ್ ಅಚ್ಛಸ್ಫಟಿಕವಿಶದಂ ತರ್ಕಯೇಸ್ ತಿರ್ಯಗ್ ಅಮ್ಭಃ।

ಸಂಸರ್ಪನ್ತ್ಯಾ ಸಪದಿ ಭವತಃ ಸ್ರೋತಸಿ ಚ್ಛಾಯಯಾಸೌ

ಸ್ಯಾದ್ ಅಸ್ಥಾನೋಪಗತಯಮುನಾಸಂಗಮೇವಾಭಿರಾಮಾ॥೧.೫೪॥

ಆಸೀನಾನಾಂ ಸುರಭಿತಶಿಲಂ ನಾಭಿಗನ್ಧೈರ್ ಮೃಗಾಣಾಂ

ತಸ್ಯಾ ಏವ ಪ್ರಭವಮ್ ಅಚಲಂ ಪ್ರಾಪ್ಯ ಗೌರಂ ತುಷಾರೈಃ।

ವಕ್ಷ್ಯಸ್ಯ್ ಅಧ್ವಶ್ರಮವಿನಯೇನ ತಸ್ಯ ಶೃಙ್ಗೇ ನಿಷಣ್ಣಃ

ಶೋಭಾಂ ಶುಭ್ರಾಂ ತ್ರಿನಯನವೃಷೋತ್ಖಾತಪಙ್ಕೋಪಮೇಯಮ್॥೧.೫೫॥

ತಂ ಚೇದ್ ವಾಯೌ ಸರತಿ ಸರಲಸ್ಕನ್ಧಸಂಘಟ್ಟಜನ್ಮಾ

ಬಾಧೇತೋಲ್ಕಾಕ್ಷಪಿತಚಮರೀಬಾಲಭಾರೋ ದವಾಗ್ನಿಃ।

ಅರ್ಹಸ್ಯ್ ಏನಂ ಶಮಯಿತುಮ್ ಅಲಂ ವಾರಿಧಾರಾಸಹಸ್ರೈರ್

ಆಪನ್ನಾರ್ತಿಪ್ರಶಮನಫಲಾಃ ಸಂಪದೋ ಹ್ಯ್ ಉತ್ತಮಾನಾಮ್॥೧.೫೬॥

ಯೇ ಸಂರಮ್ಭೋತ್ಪತನರಭಸಾಃ ಸ್ವಾಙ್ಗಭಙ್ಗಾಯ ತಸ್ಮಿನ್

ಮುಕ್ತಾಧ್ವಾನಂ ಸಪದಿ ಶರಭಾ ಲಙ್ಘಯೇಯುರ್ ಭವನ್ತಮ್।

ತಾನ್ ಕುರ್ವೀಥಾಸ್ ತುಮುಲಕರಕಾವೃಷ್ಟಿಪಾತಾವಕೀರ್ಣನ್

ಕೇ ವಾ ನ ಸ್ಯುಃ ಪರಿಭವಪದಂ ನಿಷ್ಫಲಾರಮ್ಭಯತ್ನಾಃ॥೧.೫೭॥

ತತ್ರ ವ್ಯಕ್ತಂ ದೃಷದಿ ಚರಣನ್ಯಾಸಮ್ ಅರ್ಧೇನ್ದುಮೌಲೇಃ

ಶಶ್ವತ್ ಸಿದ್ಧೈರ್ ಉಪಚಿತಬಲಿಂ ಭಕ್ತಿನಮ್ರಃ ಪರೀಯಾಃ।

ಯಸ್ಮಿನ್ ದೃಷ್ಟೇ ಕರಣವಿಗಮಾದ್ ಊರ್ಧ್ವಮ್ ಉದ್ಧೂತಪಾಪಾಃ

ಕಲ್ಪಿಷ್ಯನ್ತೇ ಸ್ಥಿರಗಣಪದಪ್ರಾಪ್ತಯೇ ಶ್ರದ್ದಧಾನಾಃ॥೧.೫೮॥

ಶಬ್ದಾಯನ್ತೇ ಮಧುರಮ್ ಅನಿಲೈಃ ಕೀಚಕಾಃ ಪೂರ್ಯಮಾಣಾಃ

ಸಂರಕ್ತಾಭಿಸ್ ತ್ರಿಪುರವಿಜಯೋ ಗೀಯತೇ ಕಿಂನರಾಭಿಃ।

ನಿರ್ಹ್ರಾದಸ್ ತೇ ಮುರಜ ಇವ ಚೇತ್ ಕನ್ದರೇಷು ಧ್ವನಿಃ ಸ್ಯಾತ್

ಸಂಗೀತಾರ್ಥೋ ನನು ಪಶುಪತೇಸ್ ತತ್ರ ಭಾವೀ ಸಮಗ್ರಃ॥೧.೫೯॥

ಪ್ರಾಲೇಯಾದ್ರೇರ್ ಉಪತಟಮ್ ಅತಿಕ್ರಮ್ಯ ತಾಂಸ್ ತಾನ್ ವಿಶೇಷಾನ್

ಹಂಸದ್ವಾರಂ ಭೃಗುಪತಿಯಶೋವರ್ತ್ಮ ಯತ್ ಕ್ರೌಞ್ಚರನ್ಧ್ರಮ್।

ತೇನೋದೀಚೀಂ ದಿಶಮ್ ಅನುಸರೇಸ್ ತಿರ್ಯಗ್ ಆಯಾಮಶೋಭೀ

ಶ್ಯಾಮಃ ಪಾದೋ ಬಲಿನಿಯಮನಾಭ್ಯುದ್ಯತಸ್ಯೇವ ವಿಷ್ಣೋಃ॥೧.೬೦॥

ಗತ್ವಾ ಚೋರ್ಧ್ವಂ ದಶಮುಖಭುಜೋಚ್ಛ್ವಾಸಿತಪ್ರಸ್ಥಸಂಧೇಃ

ಕೈಲಾಸಸ್ಯ ತ್ರಿದಶವನಿತಾದರ್ಪಣಸ್ಯಾತಿಥಿಃ ಸ್ಯಾಃ।

ಶೃಙ್ಗೋಚ್ಛ್ರಾಯೈಃ ಕುಮುದವಿಶದೈರ್ ಯೋ ವಿತತ್ಯ ಸ್ಥಿತಃ ಖಂ

ರಾಶೀಭೂತಃ ಪ್ರತಿದಿನಮ್ ಇವ ತ್ರ್ಯಮ್ಬಕಸ್ಯಟ್ಟಹಾಸಃ॥೧.೬೧॥

ಉತ್ಪಶ್ಯಾಮಿ ತ್ವಯಿ ತಟಗತೇ ಸ್ನಿಗ್ಧಭಿನ್ನಾಞ್ಜನಾಭೇ

ಸದ್ಯಃ ಕೃತ್ತದ್ವಿರದದಶನಚ್ಛೇದಗೌರಸ್ಯ ತಸ್ಯ।

ಶೋಭಾಮ್ ಅದ್ರೇಃ ಸ್ತಿಮಿತನಯನಪ್ರೇಕ್ಷಣೀಯಾಂ ಭವಿತ್ರೀಮ್

ಅಂಸನ್ಯಸ್ತೇ ಸತಿ ಹಲಭೃತೋ ಮೇಚಕೇ ವಾಸಸೀವ॥೧.೬೨॥

ಹಿತ್ವಾ ತಸ್ಮಿನ್ ಭುಜಗವಲಯಂ ಶಮ್ಭುನಾ ದತ್ತಹಸ್ತಾ

ಕ್ರೀಡಾಶೈಲೇ ಯದಿ ಚ ವಿಚರೇತ್ ಪಾದಚಾರೇಣ ಗೌರೀ।

ಭಙ್ಗೀಭಕ್ತ್ಯಾ ವಿರಚಿತವಪುಃ ಸ್ತಮ್ಭಿತಾನ್ತರ್ಜಲೌಘಃ

ಸೋಪಾನತ್ವಂ ಕುರು ಮಣಿತಟಾರೋಹಣಾಯಾಗ್ರಯಾಯೀ॥೧.೬೩॥

ತತ್ರಾವಶ್ಯಂ ವಲಯಕುಲಿಶೋದ್ಧಟ್ಟನೋದ್ಗೀರ್ಣತೋಯಂ

ನೇಷ್ಯನ್ತಿ ತ್ವಾಂ ಸುರಯುವತಯೋ ಯನ್ತ್ರಧಾರಾಗೃಹತ್ವಮ್।

ತಾಭ್ಯೋ ಮೋಕ್ಷಸ್ ತವ ಯದಿ ಸಖೇ ಘರ್ಮಲಬ್ಧಸ್ಯ ನ ಸ್ಯಾತ್

ಕ್ರೀಡಾಲೋಲಾಃ ಶ್ರವಣಪರುಷೈರ್ ಗರ್ಜಿತೈರ್ ಭಾಯಯೇಸ್ ತಾಃ॥೧.೬೪॥

ಹೇಮಾಮ್ಭೋಜಪ್ರಸವಿ ಸಲಿಲಂ ಮಾನಸಸ್ಯಾದದಾನಃ

ಕುರ್ವನ್ ಕಾಮಂ ಕ್ಷಣಮುಖಪಟಪ್ರೀತಿಮ್ ಐರಾವತಸ್ಯ।

ಧುನ್ವನ್ ಕಲ್ಪದ್ರುಮಕಿಸಲಯಾನ್ ಯಂಶುಕಾನೀವ ವಾತೈರ್

ನಾನಾಚೇಷ್ಟೈರ್ ಜಲದಲಲಿತೈರ್ ನಿರ್ವಿಶೇಸ್ ತಂ ನಗೇನ್ದ್ರಮ್॥೧.೬೫॥

ತಸ್ಯೋತ್ಸಙ್ಗೇ ಪ್ರಣಯಿನ ಇವ ಸ್ರಸ್ತಗಙ್ಗಾದುಕೂಲಾಂ

ನ ತ್ವಂ ದೃಷ್ಟ್ವಾ ನ ಪುನರ್ ಅಲಕಾಂ ಜ್ಞಾಸ್ಯಸೇ ಕಾಮಚಾರಿನ್।

ಯಾ ವಃ ಕಾಲೇ ವಹತಿ ಸಲಿಲೋದ್ಗಾರಮ್ ಉಚ್ಚೈರ್ ವಿಮಾನಾ

ಮುಕ್ತಾಜಾಲಗ್ರಥಿತಮ್ ಅಲಕಂ ಕಾಮಿನೀವಾಭ್ರವೃನ್ದಮ್॥೧.೬೬॥

॥೨॥

ಊತ್ತರಮೇಘಃ

ವಿಧುನ್ವನ್ತಂ ಲಲಿತವನಿತಾಃ ಸೇನ್ದ್ರಚಾಪಂ ಸಚಿತ್ರಾಃ

ಸಂಗೀತಾಯ ಪ್ರಹತಮುರಜಾಃ ಸ್ನಿಗ್ಧಗಮ್ಭೀರಘೋಷಮ್।

ಅನ್ತಸ್ತೋಯಂ ಮಣಿಮಯಭುವಸ್ ತುಙ್ಗಮ್ ಅಭ್ರಂಲಿಹಾಗ್ರಾಃ

ಪ್ರಾಸಾದಾಸ್ ತ್ವಾಂ ತುಲಯಿತುಮ್ ಅಲಂ ಯತ್ರ ತೈಸ್ ತೈರ್ ವಿಶೇಷೈಃ॥೨.೧॥

ಹಸ್ತೇ ಲೀಲಾಕಮಲಮ್ ಅಲಕೇ ಬಾಲಕುನ್ದಾನುವಿದ್ಧಂ

ನೀತಾ ಲೋಧ್ರಪ್ರಸವರಜಸಾ ಪಾಣ್ಡುತಾಮ್ ಆನನೇ ಶ್ರೀಃ।

ಚೂಡಾಪಾಶೇ ನವಕುರವಕಂ ಚಾರು ಕರ್ಣೇ ಶಿರೀಷಂ

ಸೀಮನ್ತೇ ಚ ತ್ವದುಪಗಮಜಂ ಯತ್ರ ನೀಪಂ ವಧೂನಾಮ್॥೨.೨॥

ಯತ್ರೋನ್ಮತ್ತಭ್ರಮರಮುಖರಾಃ ಪಾದಪಾ ನಿತ್ಯಪುಷ್ಪಾ

ಹಂಸಶ್ರೇಣೀರಚಿತರಶನಾ ನಿತ್ಯಪದ್ಮಾ ನಲಿನ್ಯಃ।

ಕೇಕೋತ್ಕಣ್ಠಾ ಭುವನಶಿಖಿನೋ ನಿತ್ಯಭಾಸ್ವತ್ಕಲಾಪಾ

ನಿತ್ಯಜ್ಯೋತ್ಸ್ನಾಃ ಪ್ರಹಿತತಮೋವೃತ್ತಿರಮ್ಯಾಃ ಪ್ರದೋಷಾಃ॥೨.೩॥

ಆನನ್ದೋತ್ಥಂ ನಯನಸಲಿಲಮ್ಯತ್ರ ನಾನ್ಯೈರ್ ನಿಮಿತ್ತೈರ್

ನಾನ್ಯಸ್ ತಾಪಂ ಕುಸುಮಶರಜಾದ್ ಇಷ್ಟಸಂಯೋಗಸಾಧ್ಯಾತ್।

ನಾಪ್ಯ್ ಅನ್ಯಸ್ಮಾತ್ ಪ್ರಣಯಕಲಹಾದ್ ವಿಪ್ರಯೋಗೋಪಪತ್ತಿರ್

ವಿತ್ತೇಶಾನಾಂ ನ ಚ ಖಲು ವಯೋ ಯೌವನಾದ್ ಅನ್ಯದ್ ಅಸ್ತಿ॥೨.೪॥

ಯಸ್ಯಾಂ ಯಕ್ಷಾಃ ಸಿತಮಣಿಮಯಾನ್ಯ್ ಏತ್ಯ ಹರ್ಮ್ಯಸ್ಥಲಾನಿ

ಜ್ಯೋತಿಶ್ಛಾಯಾಕುಸುಮರಚಿತಾನ್ಯ್ ಉತ್ತಮಸ್ತ್ರೀಸಹಾಯಾಃ।

ಆಸೇವನ್ತೇ ಮಧು ರತಿಫಲಂ ಕಲ್ಪವೃಕ್ಷಪ್ರಸೂತಂ

ತ್ವದ್ಗಮ್ಭೀರಧ್ವನಿಷು ಶನಕೈಃ ಪುಷ್ಕರೇಷ್ವ್ ಆಹತೇಷು॥೨.೫॥

ಮನ್ದಾಕಿನ್ಯಾಃ ಸಲಿಲಶಿಶಿರೈಃ ಸೇವ್ಯಮಾನಾ ಮರುದ್ಭಿರ್

ಮನ್ದಾರಾಣಾಮ್ ಅನುತಟರುಹಾಂ ಛಾಯಯಾ ವಾರಿತೋಷ್ಣಾಃ।

ಅನ್ವೇಷ್ಟವ್ಯೈಃ ಕನಕಸಿಕತಾಮುಷ್ಟಿನಿಕ್ಷೇಪಗೂಢೈಃ

ಸಂಕ್ರೀಡನ್ತೇ ಮಣಿಭಿರಮರಪ್ರಾರ್ಥಿತಯಾ ಯತ್ರ ಕನ್ಯಾಃ॥೨.೬॥

ನೀವೀಬನ್ಧೋಚ್ಛ್ವಾಸಿತಶಿಥಿಲಂ ಯತ್ರ ಬಿಮ್ಬಾಧರಾಣಾಂ

ಕ್ಷೌಮಂ ರಾಗಾದನಿಭೃತಕರೇಷ್ವ್ ಆಕ್ಷಿಪತ್ಸು ಪ್ರಿಯೇಷು।

ಅರ್ಚಿಸ್ತುಙ್ಗಾನ್ ಅಭಿಮುಖಮ್ ಅಪಿ ಪ್ರಾಪ್ಯ ರತ್ನಪ್ರದೀಪಾನ್

ಹ್ರೀಮೂಢಾನಾಂ ಭವತಿ ವಿಫಲಪ್ರೇರಣಾ ಚೂರ್ಣಮುಷ್ಟಿಃ॥೨.೭॥

ನೇತ್ರಾ ನೀತಾಃ ಸತತಗತಿನಾ ಯದ್ವಿಮಾನಾಗ್ರಭೂಮೀರ್

ಆಲೇಖ್ಯಾನಾಂ ಸಲಿಲಕಣಿಕಾದೋಷಮ್ ಉತ್ಪಾದ್ಯ ಸದ್ಯಃ।

ಶಙ್ಕಾಸ್ಪೃಷ್ಟಾ ಇವ ಜಲಮುಚಸ್ ತ್ವಾದೃಶಾ ಜಾಲಮಾರ್ಗೈರ್

ಧೂಮೋದ್ಗಾರಾನುಕೃತಿನಿಪುಣಾ ಜರ್ಜರಾ ನಿಷ್ಪತನ್ತಿ॥೨.೮॥

ಯತ್ರ ಸ್ತ್ರೀಣಾಂ ಪ್ರಿಯತಮಭುಜೋಚ್ಛ್ವಾಸಿತಾಲಿಙ್ಗಿತಾನಾಮ್

ಅಙ್ಗಗ್ಲಾನಿಂ ಸುರತಜನಿತಾಂ ತನ್ತುಜಾಲಾವಲಮ್ಬಾಃ।

ತ್ವತ್ಸಂರೋಧಾಪಗಮವಿಶದಶ್ ಚನ್ದ್ರಪಾದೈರ್ ನಿಶೀಥೇ

ವ್ಯಾಲುಮ್ಪನ್ತಿ ಸ್ಫುಟಜಲಲವಸ್ಯನ್ದಿನಶ್ ಚನ್ದ್ರಕಾನ್ತಾಃ॥೨.೯॥

ಅಕ್ಷಯ್ಯಾನ್ತರ್ಭವನನಿಧಯಃ ಪ್ರತ್ಯಹಂ ರಕ್ತಕಣ್ಠೈರ್

ಉದ್ಗಾಯದ್ಭಿರ್ ಧನಪತಿಯಶಃ ಕಿಂನರೈರ್ ಯತ್ರ ಸಾರ್ಧಮ್।

ವೈಭ್ರಾಜಾಖ್ಯಂ ವಿಬುಧವನಿತಾವಾರಮುಖ್ಯಸಹಾಯಾ

ಬದ್ಧಾಲಾಪಾ ಬಹಿರುಪವನಂ ಕಾಮಿನೋ ನಿರ್ವಿಶನ್ತಿ॥೨.೧೦॥

ಗತ್ಯುತ್ಕಮ್ಪಾದ್ ಅಲಕಪತಿತೈರ್ ಯತ್ರ ಮನ್ದಾರಪುಷ್ಪೈಃ

ಪುತ್ರಚ್ಛೇದೈಃ ಕನಕಕಮಲೈಃ ಕರ್ಣವಿಸ್ರಂಶಿಭಿಶ್ ಚ।

ಮುಕ್ತಾಜಾಲೈಃ ಸ್ತನಪರಿಸರಚ್ಛಿನ್ನಸೂತ್ರೈಶ್ ಚ ಹಾರೈರ್

ನೈಶೋ ಮಾರ್ಗಃ ಸವಿತುರ್ ಉದಯೇ ಸೂಚ್ಯತೇ ಕಾಮಿನೀನಾಮ್॥೨.೧೧॥

ವಾಸಶ್ ಚಿತ್ರಂ ಮಧು ನಯನಯೋರ್ ವಿಭ್ರಮಾದೇಶದಕ್ಷಂ

ಪುಷ್ಪೋದ್ಭೇದಂ ಸಹ ಕಿಸಲಯೈರ್ ಭೂಷಣಾನಾಂ ವಿಕಲ್ಪಮ್।

ಲಾಕ್ಷಾರಾಗಂ ಚರಣಕಮಲನ್ಯಾಸಯೋಗ್ಯಂ ಚ ಯಸ್ಯಾಮ್

ಏಕಃ ಸೂತೇ ಸಕಲಮ್ ಅಬಲಾಮಣ್ಡನಂ ಕಲ್ಪವೃಕ್ಷಃ॥೨.೧೨॥

ಪತ್ರಶ್ಯಾಮಾ ದಿನಕರಹಯಸ್ಪರ್ಧಿನೋ ಯತ್ರ ವಾಹಾಃ

ಶೈಲೋದಗ್ರಾಸ್ ತ್ವಮ್ ಇವ ಕರಿಣೋ ವೃಷ್ಟಿಮನ್ತಃ ಪ್ರಭೇದಾತ್।

ಯೋಧಾಗ್ರಣ್ಯಃ ಪ್ರತಿದಶಮುಖಂ ಸಂಯುಗೇ ತಸ್ಥಿವಾಂಸಃ

ಪ್ರತ್ಯಾದಿಷ್ಟಾಭರಣರುಚಯಶ್ ಚನ್ದ್ರಹಾಸವ್ರಣಾಙ್ಕೈಃ॥೨.೧೩॥

ಮತ್ವಾ ದೇವಂ ಧನಪತಿಸಖಂ ಯತ್ರ ಸಾಕ್ಷಾದ್ ವಸನ್ತಂ

ಪ್ರಾಯಶ್ ಚಾಪಂ ನ ವಹತಿ ಭಯಾನ್ ಮನ್ಮಥಃ ಷಟ್ಪದಜ್ಯಮ್।

ಸಭ್ರ್ಊಭಙ್ಗಪ್ರಹಿತನಯನೈಃ ಕಾಮಿಲಕ್ಷ್ಯೇಷ್ವ್ ಅಮೋಘೈಸ್

ತಸ್ಯಾರಮ್ಭಶ್ ಚತುರವನಿತಾವಿಭ್ರಮೈರ್ ಏವ ಸಿದ್ಧಃ॥೨.೧೪॥

ತತ್ರಾಗಾರಂ ಧನಪತಿಗೃಹಾನ್ ಉತ್ತರೇಣಾಸ್ಮದೀಯಂ

ದೂರಾಲ್ ಲಕ್ಷ್ಯಂ ಸುರಪತಿಧನುಶ್ಚಾರುಣಾ ತೋರಣೇನ।

ಯಸ್ಯೋಪಾನ್ತೇ ಕೃತಕತನಯಃ ಕಾನ್ತಯಾ ವರ್ಧಿತೋ ಮೇ

ಹಸ್ತಪ್ರಾಪ್ಯಸ್ತವಕನಮಿತೋ ಬಾಲಮನ್ದಾರವೃಕ್ಷಃ॥೨.೧೫॥

ವಾಪೀ ಚಾಸ್ಮಿನ್ ಮರಕತಶಿಲಾಬದ್ಧಸೋಪಾನಮಾರ್ಗಾ

ಹೈಮೈಶ್ಛನ್ನಾ ವಿಕಚಕಮಲೈಃ ಸ್ನಿಗ್ಧವೈದೂರ್ಯನಾಲೈಃ।

ಯಸ್ಯಾಸ್ ತೋಯೇ ಕೃತವಸತಯೋ ಮಾನಸಂ ಸಂನಿಕೃಷ್ಟಂ

ನಾಧ್ಯಾಸ್ಯನ್ತಿ ವ್ಯಪಗತಶುಚಸ್ ತ್ವಾಮ್ ಅಪಿ ಪ್ರೇಕ್ಷ್ಯ ಹಂಸಾಃ॥೨.೧೬॥

ತಸ್ಯಾಸ್ ತೀರೇ ರಚಿತಶಿಖರಃ ಪೇಶಲೈರ್ ಇನ್ದ್ರನೀಲೈಃ

ಕ್ರೀಡಾಶೈಲಃ ಕನಕಕದಲೀವೇಷ್ಟನಪ್ರೇಕ್ಷಣೀಯಃ।

ಮದ್ಗೇಹಿನ್ಯಾಃ ಪ್ರಿಯ ಇತಿ ಸಖೇ ಚೇತಸಾ ಕಾತರೇಣ

ಪ್ರೇಕ್ಷ್ಯೋಪಾನ್ತಸ್ಫುರಿತತಡಿತಂ ತ್ವಾಂ ತಮ್ ಏವ ಸ್ಮರಾಮಿ॥೨.೧೭॥

ರಕ್ತಾಶೋಕಶ್ ಚಲಕಿಸಲಯಃ ಕೇಸರಶ್ ಚಾತ್ರ ಕಾನ್ತಃ

ಪ್ರತ್ಯಾಸನ್ನೌ ಕುರುವಕವೃತೇರ್ ಮಾಧವೀಮಣ್ಡಪಸ್ಯ।

ಏಕಃ ಸಖ್ಯಾಸ್ ತವ ಸಹ ಮಯಾ ವಾಮಪಾದಾಭಿಲಾಷೀ

ಕಾಙ್ಕ್ಷತ್ಯ್ ಅನ್ಯೋ ವದನಮದಿರಾಂ ದೋಹದಚ್ಛದ್ಮನಾಸ್ಯಾಃ॥೨.೧೮॥

ತನ್ಮಧ್ಯೇ ಚ ಸ್ಫಟಿಕಫಲಕಾ ಕಾಞ್ಚನೀ ವಾಸಯಷ್ಟಿರ್

ಮೂಲೇ ಬದ್ಧಾ ಮಣಿಭಿರ್ ಅನತಿಪ್ರೌಢವಂಶಪ್ರಕಾಶೈಃ।

ತಾಲೈಃ ಶಿಞ್ಜಾವಲಯಸುಭಗೈರ್ ನರ್ತಿತಃ ಕಾನ್ತಯಾ ಮೇ

ಯಾಮ್ ಅಧ್ಯಾಸ್ತೇ ದಿವಸವಿಗಮೇ ನೀಲಕಣ್ಠಃ ಸುಹೃದ್ ವಃ॥೨.೧೯॥

ಏಭಿಃ ಸಾಧೋ ಹೃದಯನಿಹಿತೈರ್ ಲಕ್ಷಣೈರ್ ಲಕ್ಷಯೇಥಾ

ದ್ವಾರೋಪಾನ್ತೇ ಲಿಖಿತವಪುಷೌ ಶಙ್ಖಪದ್ಮೌ ಚ ದೃಷ್ಟ್ವಾ।

ಕ್ಷಾಮಚ್ಛಾಯಾಂ ಭವನಮ್ ಅಧುನಾ ಮದ್ವಿಯೋಗೇನ ನೂನಂ

ಸೂರ್ಯಾಪಾಯೇ ನ ಖಲು ಕಮಲಂ ಪುಷ್ಯತಿ ಸ್ವಾಮಭಿಖ್ಯಾಮ್॥೨.೨೦॥

ಗತ್ವಾ ಸದ್ಯಃ ಕಲಭತನುತಾಂ ಶೀಘ್ರಸಂಪಾತಹೇತೋಃ

ಕ್ರೀಡಾಶೈಲೇ ಪ್ರಥಮಕಥಿತೇ ರಮ್ಯಸಾನೌ ನಿಷಣ್ಣಃ।

ಅರ್ಹಸ್ಯ್ ಅನ್ತರ್ಭವನಪತಿತಾಂ ಕರ್ತುಮ್ ಅಲ್ಪಾಲ್ಪಭಾಸಂ

ಖದ್ಯೋತಾಲೀವಿಲಸಿತನಿಭಾಂ ವಿದ್ಯುದುನ್ಮೇಷದೃಷ್ಟಿಮ್॥೨.೨೧॥

ತನ್ವೀ ಶ್ಯಾಮಾ ಶಿಖರೀದಶನಾ ಪಕ್ವಬಿಮ್ಬಾಧರೌಷ್ಠೀ

ಮಧ್ಯೇ ಕ್ಷಾಮಾ ಚಕಿತಹರಿಣೀಪ್ರೇಕ್ಷಣಾ ನಿಮ್ನನಾಭಿಃ।

ಶ್ರೋಣೀಭಾರಾದ್ ಅಲಸಗಮನಾ ಸ್ತೋಕನಮ್ರಾ ಸ್ತನಾಭ್ಯಾಂ

ಯಾ ತತ್ರ ಸ್ಯಾದ್ ಯುವತೀವಿಷಯೇ ಸೃಷ್ಟಿರ್ ಆದ್ಯೈವ ಧಾತುಃ॥೨.೨೨॥

ತಾಂ ಜಾನೀಥಾಃ ಪರಿಮಿತಕಥಾಂ ಜೀವಿತಂ ಮೇ ದ್ವಿತೀಯಂ

ದೂರೀಭೂತೇ ಮಯಿ ಸಹಚರೇ ಚಕ್ರವಾಕೀಮ್ ಇವೈಕಾಮ್।

ಗಾಢೋತ್ಕಣ್ಠಾಂ ಗುರುಷು ದಿವಸೇಷ್ವ್ ಏಷು ಗಚ್ಛತ್ಸು ಬಾಲಾಂ

ಜಾತಾಂ ಮನ್ಯೇ ಶಿಶಿರಮಥಿತಾಂ ಪದ್ಮಿನೀಂ ವಾನ್ಯರ್ಊಪಾಮ್॥೨.೨೩॥

ನೂನಂ ತಸ್ಯಾಃ ಪ್ರಬಲರುದಿತೋಚ್ಛೂನನೇತ್ರಂ ಪ್ರಿಯಾಯಾ

ನಿಃಶ್ವಾಸಾನಾಮ್ ಅಶಿಶಿರತಯಾ ಭಿನ್ನವರ್ಣಾಧರೋಷ್ಠಮ್।

ಹಸ್ತನ್ಯಸ್ತಂ ಮುಖಮ್ ಅಸಕಲವ್ಯಕ್ತಿ ಲಮ್ಬಾಲಕತ್ವಾದ್

ಇನ್ದೋರ್ ದೈನ್ಯಂ ತ್ವದನುಸರಣಕ್ಲಿಷ್ಟಕಾನ್ತೇರ್ ಬಿಭರ್ತಿ॥೨.೨೪॥

ಆಲೋಕೇ ತೇ ನಿಪತತಿ ಪುರಾ ಸಾ ಬಲಿವ್ಯಾಕುಲಾ ವಾ

ಮತ್ಸಾದೃಶ್ಯಂ ವಿರಹತನು ವಾ ಭಾವಗಮ್ಯಂ ಲಿಖನ್ತೀ।

ಪೃಚ್ಛನ್ತೀ ವಾ ಮಧುರವಚನಾಂ ಸಾರಿಕಾಂ ಪಞ್ಜರಸ್ಥಾಂ

ಕಚ್ಚಿದ್ ಭರ್ತುಃ ಸ್ಮರಸಿ ರಸಿಕೇ ತ್ವಂ ಹಿ ತಸ್ಯ ಪ್ರಿಯೇತಿ॥೨.೨೫॥

ಉತ್ಸಙ್ಗೇ ವಾ ಮಲಿನವಸನೇ ಸೌಮ್ಯ ನಿಕ್ಷಿಪ್ಯ ವೀಣಾಂ

ಮದ್ಗೋತ್ರಾಙ್ಕಂ ವಿರಚಿತಪದಂ ಗೇಯಮ್ ಉದ್ಗಾತುಕಾಮಾ।

ತನ್ತ್ರೀಮ್ ಆರ್ದ್ರಾಂ ನಯನಸಲಿಲೈಃ ಸಾರಯಿತ್ವಾ ಕಥಂಚಿದ್

ಭೂಯೋ ಭೂಯಃ ಸ್ವಯಮ್ ಅಪಿ ಕೃತಾಂ ಮೂರ್ಚ್ಛನಾಂ ವಿಸ್ಮರನ್ತೀ॥೨.೨೬॥

ಶೇಷಾನ್ ಮಾಸಾನ್ ವಿರಹದಿವಾಸಸ್ಥಾಪಿತಸ್ಯಾವಧೇರ್ ವಾ

ವಿನ್ಯಸ್ಯನ್ತೀ ಭುವಿ ಗಣನಯಾ ದೇಹಲೀದತ್ತಪುಷ್ಪೈಃ।

ಸಮ್ಭೋಗಂ ವಾ ಹೃದಯನಿಹಿತಾರಮ್ಭಮ್ ಆಸ್ವಾದಯನ್ತೀ

ಪ್ರಾಯೇಣೈತೇ ರಮಣವಿರಹೇಷ್ವ್ ಅಙ್ಗನಾನಾಂ ವಿನೋದಾಃ॥೨.೨೭॥

ಸವ್ಯಾಪಾರಮ್ ಅಹನಿ ನ ತಥಾ ಪೀಡಯೇದ್ ವಿಪ್ರಯೋಗಃ

ಶಙ್ಕೇ ರಾತ್ರೌ ಗುರುತರಶುಚಂ ನಿರ್ವಿನೋದಾಂ ಸಖೀಂ ತೇ।

ಮತ್ಸನ್ದೇಶಃ ಸುಖಯಿತುಮ್ ಅಲಂ ಪಶ್ಯ ಸಾಧ್ವೀಂ ನಿಶೀಥೇ

ತಾಮ್ ಉನ್ನಿದ್ರಾಮ್ ಅವನಿಶಯನಾಂ ಸೌಧವಾತಾಯನಸ್ಥಃ॥೨.೨೮॥

ಆಧಿಕ್ಷಾಮಾಂ ವಿರಹಶಯನೇ ಸಂನಿಷಣ್ಣೈಕಪಾರ್ಶ್ವಾಂ

ಪ್ರಾಚೀಮೂಲೇ ತನುಮ್ ಇವ ಕಲಾಮಾತ್ರಶೇಷಾಂ ಹಿಮಾಂಶೋಃ।

ನೀತಾ ರಾತ್ರಿಃ ಕ್ಷಣ ಇವ ಮಯಾ ಸಾರ್ಧಮ್ ಇಚ್ಛಾರತೈರ್ ಯಾ

ತಾಮ್ ಏವೋಷ್ಣೈರ್ ವಿರಹಮಹತೀಮ್ ಅಶ್ರುಭಿರ್ ಯಾಪಯನ್ತೀಮ್॥೨.೨೯॥

ಪಾದಾನ್ ಇನ್ದೋರಮೃತಶಿಶಿರಾಞ್ಜಲಮಾರ್ಗಪ್ರವಿಷ್ಟಾನ್

ಪೂರ್ವಪ್ರೀತ್ಯಾ ಗತಮಭುಮುಖಂ ಸಂನಿವೃತ್ತಂ ತಥೈವ।

ಚಕ್ಷುಃ ಖೇದಾತ್ ಸಲಿಲಗುರುಭಿಃ ಪಕ್ಷ್ಮಭಿಶ್ಛಾದಯನ್ತೀಂ

ಸಾಭ್ರೇ.ಅಹ್ನೀವ ಸ್ಥಲಕಮಲಿನೀ ನ ಪ್ರಭುದ್ಧಾಂ ನ ಸುಪ್ತಾಮ್॥೨.೩೦॥

ನಿಃಶ್ವಾಸೇನಾಧರಕಿಸಲಯಕ್ಲೇಶಿನಾ ವಿಕ್ಷಿಪನ್ತೀಂ

ಶುದ್ಧಸ್ನಾನಾತ್ ಪರುಷಮಲಕಂ ನೂನಮಾಗಣ್ಣ್ದಲಮ್ಬಮ್।

ಮತ್ಸಂಭೋಗಃ ಕಥಮುಪನಮೇತ್ ಸ್ವಪ್ನಜೋ.ಅಪೀತಿ ನಿದ್ರಾಮ್

ಆಕಾಙ್ಕ್ಷನ್ತೀಂ ನಯನಸಲಿಲೋತ್ಪೀಡರುದ್ಧಾವಕಾಶಮ್॥೨.೩೧॥

ಆದ್ಯೇ ಬದ್ಧಾ ವಿರಹದಿವಸೇ ಯಾ ಶಿಖಾ ದಾಮ ಹಿತ್ವಾ

ಶಾಪಸ್ಯಾನ್ತೇ ವಿಗಲಿತಶುಚಾ ತಾಂ ಮಯೋದ್ವೇಷ್ಟನೀಯಾಮ್।

ಸ್ಪರ್ಶಕ್ಲಿಷ್ಟಾಮ್ ಅಯಮಿತನಖೇನಾಸಕೃತ್ಸಾರಯನ್ತೀಂ

ಗಣ್ಡಾಭೋಗಾತ್ ಕಠಿನವಿಷಮಾಮ್ ಏಕವೇಣೀಂ ಕರೇಣ॥೨.೩೨॥

ಸಾ ಸಂನ್ಯಸ್ತಾಭರಣಮ್ ಅಬಲಾ ಪೇಶಲಂ ಧಾರಯನ್ತೀ

ಶಯ್ಯೋತ್ಸಙ್ಗೇ ನಿಹಿತಮ್ ಅಸಕೃದ್ ದುಃಖದುಃಖೇನ ಗಾತ್ರಮ್।

ತ್ವಾಮ್ ಅಪ್ಯ್ ಅಸ್ರಂ ನವಜಲಮಯಂ ಮೋಚಯಿಷ್ಯತ್ಯ್ ಅವಶ್ಯಂ

ಪ್ರಾಯಃ ಸರ್ವೋ ಭವತಿ ಕರುಣಾವೃತ್ತಿರ್ ಆರ್ದ್ರಾನ್ತರಾತ್ಮಾ॥೨.೩೩॥

ಜಾನೇ ಸಖ್ಯಾಸ್ ತವ ಮಯಿ ಮನಃ ಸಂಭೃತಸ್ನೇಹಮಸ್ಮಾದ್

ಇತ್ಥಂಭೂತಾಂ ಪ್ರಥಮವಿರಹೇ ತಾಮ್ ಅಹಂ ತರ್ಕಯಾಮಿ।

ವಾಚಾಲಂ ಮಾಂ ನ ಖಲು ಸುಭಗಂಮನ್ಯಭಾವಃ ಕರೋತಿ

ಪ್ರತ್ಯಕ್ಷಂ ತೇ ನಿಖಿಲಮ್ ಅಚಿರಾದ್ ಭ್ರಾತರ್ ಉಕ್ತಂ ಮಯಾ ಯತ್॥೨.೩೪॥

ರುದ್ಧಾಪಾಙ್ಗಪ್ರಸರಮ್ ಅಲಕೈರ್ ಅಞ್ಜನಸ್ನೇಹಶೂನ್ಯಂ

ಪ್ರತ್ಯಾದೇಶಾದ್ ಅಪಿ ಚ ಮಧುನೋ ವಿಸ್ಮೃತಭ್ರ್ಊವಿಲಾಸಮ್।

ತ್ವಯ್ಯ್ ಆಸನ್ನೇ ನಯನಮ್ ಉಪರಿಸ್ಪನ್ದಿ ಶಙ್ಕೇ ಮೃಗಾಕ್ಷ್ಯಾ

ಮೀನಕ್ಷೋಭಾಚ್ ಚಲಕುವಲಯಶ್ರೀತುಲಾಮ್ ಏಷ್ಯತೀತಿ॥೨.೩೫॥

ವಾಮಶ್ ಚಾಸ್ಯಾಃ ಕರರುಹಪದೈರ್ ಮುಚ್ಯಮಾನೋ ಮದೀಯೈರ್

ಮುಕ್ತಾಜಾಲಂ ಚಿರಪರಿಚಿತಂ ತ್ಯಾಜಿತೋ ದೈವಗತ್ಯಾ।

ಸಂಭೋಗಾನ್ತೇ ಮಮ ಸಮುಚಿತೋ ಹಸ್ತಸಂವಾಹಮಾನಾಂ

ಯಾಸ್ಯತ್ಯ್ ಊರುಃ ಸರಸಕದಲೀಸ್ತಮ್ಭಗೌರಶ್ ಚಲತ್ವಮ್॥೨.೩೬॥

ತಸ್ಮಿನ್ ಕಾಲೇ ಜಲದ ಯದಿ ಸಾ ಲಬ್ಧನಿದ್ರಾಸುಖಾ ಸ್ಯಾದ್

ಅನ್ವಾಸ್ಯೈನಾಂ ಸ್ತನಿತವಿಮುಖೋ ಯಾಮಮಾತ್ರಂ ಸಹಸ್ವ।

ಮಾ ಭೂದ್ ಅಸ್ಯಾಃ ಪ್ರಣಯಿನಿ ಮಯಿ ಸ್ವಪ್ನಲಬ್ಧೇ ಕಥಂಚಿತ್

ಸದ್ಯಃ ಕಣ್ಠಚ್ಯುತಭುಜಲತಾಗ್ರನ್ಥಿ ಗಾಢೋಪಗೂಢಮ್॥೨.೩೭॥

ತಾಮ್ ಉತ್ಥಾಪ್ಯ ಸ್ವಜಲಕಣಿಕಾಶೀತಲೇನಾನಿಲೇನ

ಪ್ರತ್ಯಾಶ್ವಸ್ತಾಂ ಸಮಮ್ ಅಭಿನವೈರ್ ಜಾಲಕೈರ್ ಮಾಲತೀನಾಮ್।

ವಿದ್ಯುದ್ಗರ್ಭಃ ಸ್ತಿಮಿತನಯನಾಂ ತ್ವತ್ಸನಾಥೇ ಗವಾಕ್ಷೇ

ವಕ್ತುಂ ಧೀರಃ ಸ್ತನಿತವಚನೈರ್ ಮಾನಿನೀಂ ಪ್ರಕ್ರಮೇಥಾಃ॥೨.೩೮॥

ಭರ್ತುರ್ ಮಿತ್ರಂ ಪ್ರಿಯಮ್ ಅವಿಧವೇ ವಿದ್ಧಿ ಮಾಮ್ ಅಮ್ಬುವಾಹಂ

ತತ್ಸಂದೇಶೈರ್ ಹೃದಯನಿಹಿತೈರ್ ಆಗತಂ ತ್ವತ್ಸಮೀಪಮ್।

ಯೋ ವೃನ್ದಾನಿ ತ್ವರಯತಿ ಪಥಿ ಶ್ರಮ್ಯತಾಂ ಪ್ರೋಷಿತಾನಾಂ

ಮನ್ದ್ರಸ್ನಿಗ್ಧೈರ್ ಧ್ವನಿಭಿರ್ ಅಬಲಾವೇಣಿಮೋಕ್ಷೋತ್ಸುಕಾನಿ॥೨.೩೯॥

ಇತ್ಯ್ ಆಖ್ಯಾತೇ ಪವನತನಯಂ ಮೈಥಿಲೀವೋನ್ಮುಖೀ ಸಾ

ತ್ವಾಮ್ ಉತ್ಕಣ್ಠೋಚ್ಛ್ವಸಿತಹೃದಯಾ ವೀಕ್ಷ್ಯ ಸಮ್ಭಾವ್ಯ ಚೈವ।

ಶ್ರೋಷ್ಯತ್ಯ್ ಅಸ್ಮಾತ್ ಪರಮ್ ಅವಹಿತಾ ಸೌಮ್ಯ ಸೀಮನ್ತಿನೀನಾಂ

ಕಾನ್ತೋದನ್ತಃ ಸುಹೃದುಪನತಃ ಸಂಗಮಾತ್ ಕಿಂಚಿದ್ ಊನಃ॥೨.೪೦॥

ತಾಮ್ ಆಯುಷ್ಮನ್ ಮಮ ಚ ವಚನಾದ್ ಆತ್ಮನಶ್ ಚೋಪಕರ್ತುಂ

ಬ್ರ್ಊಯಾ ಏವಂ ತವ ಸಹಚರೋ ರಾಮಗಿರ್ಯಾಶ್ರಮಸ್ಥಃ।

ಅವ್ಯಾಪನ್ನಃ ಕುಶಲಮ್ ಅಬಲೇ ಪೃಚ್ಛತಿ ತ್ವಾಂ ವಿಯುಕ್ತಃ

ಪೂರ್ವಾಭಾಷ್ಯಂ ಸುಲಭವಿಪದಾಂ ಪ್ರಾಣಿನಾಮ್ ಏತದ್ ಏವ॥೨.೪೧॥

ಅಙ್ಗೇನಾಙ್ಗಂ ಪ್ರತನು ತನುನಾ ಗಾಢತಪ್ತೇನ ತಪ್ತಂ

ಸಾಸ್ರೇಣಾಶ್ರುದ್ರುತಮ್ ಅವಿರತೋತ್ಕಣ್ಠಮ್ ಉತ್ಕಣ್ಠಿತೇನ।

ಉಷ್ಣೋಚ್ಛ್ವಾಸಂ ಸಮಧಿಕತರೋಚ್ಛ್ವಾಸಿನಾ ದೂರವರ್ತೀ

ಸಂಕಲ್ಪೈಸ್ ತೈರ್ ವಿಶತಿ ವಿಧಿನಾ ವೈರಿಣಾ ರುದ್ಧಮಾರ್ಗಃ॥೨.೪೨॥

ಶಬ್ದಾಖ್ಯೇಯಂ ಯದಪಿ ಕಿಲ ತೇ ಯಃ ಸಖೀನಾಂ ಪುರಸ್ತಾತ್

ಕರ್ಣೇ ಲೋಲಃ ಕಥಯಿತುಮ್ ಅಭೂದ್ ಆನನಸ್ಪರ್ಶಲೋಭಾತ್।

ಸೋ ऽತಿಕ್ರಾನ್ತಃ ಶ್ರವಣವಿಷಯಂ ಲೋಚನಾಭ್ಯಾಮ್ ಅದೃಷ್ಟಸ್

ತ್ವಾಮ್ ಉತ್ಕಣ್ಠಾವಿರಚಿತಪದಂ ಮನ್ಮುಖೇನೇದಮ್ ಆಹ॥೨.೪೩॥

ಶ್ಯಾಮಾಸ್ವ್ ಅಙ್ಗಂ ಚಕಿತಹರಿಣೀಪ್ರೇಕ್ಷಣೇ ದೃಷ್ಟಿಪಾತಂ

ವಕ್ತ್ರಚ್ಛಾಯಾಂ ಶಶಿನಿ ಶಿಖಿನಾಂ ಬರ್ಹಭಾರೇಷು ಕೇಶಾನ್।

ಉತ್ಪಶ್ಯಾಮಿ ಪ್ರತನುಷು ನದೀವೀಚಿಷು ಭ್ರ್ಊವಿಲಾಸಾನ್

ಹನ್ತೈಕಸ್ಮಿನ್ ಕ್ವಚಿದ್ ಅಪಿ ನ ತೇ ಚಣ್ಡಿ ಸಾದೃಶ್ಯಮ್ ಅಸ್ತಿ॥೨.೪೪॥

ತ್ವಾಮ್ ಆಲಿಖ್ಯ ಪ್ರಣಯಕುಪಿತಾಂ ಧಾತುರಾಗೈಃ ಶಿಲಾಯಾಮ್

ಆತ್ಮಾನಂ ತೇ ಚರಣಪತಿತಂ ಯಾವದ್ ಇಚ್ಛಾಮಿ ಕರ್ತುಮ್।

ಅಸ್ರೈಸ್ ತಾವನ್ ಮುಹುರ್ ಉಪಚಿತೈರ್ ದೃಷ್ಟಿರ್ ಆಲುಪ್ಯತೇ ಮೇ

ಕ್ರ್ಊರಸ್ ತಸ್ಮಿನ್ನ್ ಅಪಿ ನ ಸಹತೇ ಸಂಗಮಂ ನೌ ಕೃತಾನ್ತಃ॥೨.೪೫॥

ಧಾರಾಸಿಕ್ತಸ್ಥಲಸುರಭಿಣಸ್ ತ್ವನ್ಮುಖಸ್ಯಾಸ್ಯ ಬಾಲೇ

ದೂರೀಭೂತಂ ಪ್ರತನುಮ್ ಅಪಿ ಮಾಂ ಪಞ್ಚಬಾಣಃ ಕ್ಷಿಣೋತಿ।

ಘರ್ಮಾನ್ತೇ ऽಸ್ಮಿನ್ ವಿಗಣಯ ಕಥಂ ವಾಸರಾಣಿ ವ್ರಜೇಯುರ್

ದಿಕ್ಸಂಸಕ್ತಪ್ರವಿತತಘನವ್ಯಸ್ತಸೂರ್ಯಾತಪಾನಿ॥೨.೪೫ಅ॥

ಮಾಮ್ ಆಕಾಶಪ್ರಣಿಹಿತಭುಜಂ ನಿರ್ದಯಾಶ್ಲೇಷಹೇತೋರ್

ಲಬ್ಧಾಯಾಸ್ ತೇ ಕಥಮ್ ಅಪಿ ಮಯಾ ಸ್ವಪ್ನಸನ್ದರ್ಶನೇಷು।

ಪಶ್ಯನ್ತೀನಾಂ ನ ಖಲು ಬಹುಶೋ ನ ಸ್ಥಲೀದೇವತಾನಾಂ

ಮುಕ್ತಾಸ್ಥೂಲಾಸ್ ತರುಕಿಸಲಯೇಷ್ವ್ ಅಶ್ರುಲೇಶಾಃ ಪತನ್ತಿ॥೨.೪೬॥

ಭಿತ್ತ್ವಾ ಸದ್ಯಃ ಕಿಸಲಯಪುಟಾನ್ ದೇವದಾರುದ್ರುಮಾಣಾಂ

ಯೇ ತತ್ಕ್ಷೀರಸ್ರುತಿಸುರಭಯೋ ದಕ್ಷಿಣೇನ ಪ್ರವೃತ್ತಾಃ।

ಆಲಿಙ್ಗ್ಯನ್ತೇ ಗುಣವತಿ ಮಯಾ ತೇ ತುಷಾರಾದ್ರಿವಾತಾಃ

ಪೂರ್ವಂ ಸ್ಪೃಷ್ಟಂ ಯದಿ ಕಿಲ ಭವೇದ್ ಅಙ್ಗಮ್ ಏಭಿಸ್ ತವೇತಿ॥೨.೪೭॥

ಸಂಕ್ಷಿಪ್ಯನ್ತೇ ಕ್ಷನ ಇವ ಕಥಂ ದೀರ್ಘಯಾಮಾ ತ್ರಿಯಾಮಾ

ಸರ್ವಾವಸ್ಥಾಸ್ವ್ ಅಹರ್ ಅಪಿ ಕಥಂ ಮನ್ದಮನ್ದಾತಪಂ ಸ್ಯಾತ್।

ಇತ್ಥಂ ಚೇತಶ್ ಚಟುಲನಯನೇ ದುರ್ಲಭಪ್ರಾರ್ಥನಂ ಮೇ

ಗಾಢೋಷ್ಮಾಭಿಃ ಕೃತಮ್ ಅಶರಣಂ ತ್ವದ್ವಿಯೋಗವ್ಯಥಾಭಿಃ॥೨.೪೮॥

ನನ್ವ್ ಆತ್ಮಾನಂ ಬಹು ವಿಗಣಯನ್ನ್ ಆತ್ಮನೈವಾವಲಮ್ಬೇ

ತತ್ಕಲ್ಯಾಣಿ ತ್ವಮ್ ಅಪಿ ನಿತರಾಂ ಮಾ ಗಮಃ ಕಾತರತ್ವಮ್।

ಕಸ್ಯಾತ್ಯನ್ತಂ ಸುಖಮ್ ಉಪನತಂ ದುಃಖಮ್ ಏಕಾನ್ತತೋ ವಾ

ನೀಚೈರ್ ಗಚ್ಛತ್ಯ್ ಉಪರಿ ಚ ದಶಾ ಚಕ್ರನೇಮಿಕ್ರಮೇಣ॥೨.೪೯॥

ಶಾಪಾನ್ತೋ ಮೇ ಭುಜಗಶಯನಾದ್ ಉತ್ಥಿತೇ ಶಾರ್ಙ್ಗಪಾಣೌ

ಶೇಷಾನ್ ಮಾಸಾನ್ ಗಮಯ ಚತುರೋ ಲೋಚನೇ ಮೀಲಯಿತ್ವಾ।

ಪಶ್ಚಾದ್ ಆವಾಂ ವಿರಹಗುಣಿತಂ ತಂ ತಮ್ ಆತ್ಮಾಭಿಲಾಷಂ

ನಿರ್ವೇಕ್ಷ್ಯಾವಃ ಪರಿಣತಶರಚ್ಚನ್ದ್ರಿಕಾಸು ಕ್ಷಪಾಸು॥೨.೫೦॥

ಭೂಯಶ್ಚಾಹ ತ್ವಮ್ ಅಪಿ ಶಯನೇ ಕಣ್ಠಲಗ್ನಾ ಪುರಾ ಮೇ

ನಿದ್ರಾಂ ಗತ್ವಾ ಕಿಮ್ ಅಪಿ ರುದತೀ ಸಸ್ವರಂ ವಿಪ್ರಬುದ್ಧಾ।

ಸಾನ್ತರ್ಹಾಸಂ ಕಥಿತಮ್ ಅಸಕೃತ್ ಪೃಚ್ಛತಶ್ ಚ ತ್ವಯಾ ಮೇ

ದೃಷ್ಟಃ ಸ್ವಪ್ನೇ ಕಿತವ ರಮಯನ್ ಕಾಮ್ ಅಪಿ ತ್ವಂ ಮಯೇತಿ॥೨.೫೧॥

ಏತಸ್ಮಾನ್ ಮಾಂ ಕುಶಲಿನಮ್ ಅಭಿಜ್ಞಾನದಾನಾದ್ ವಿದಿತ್ವಾ

ಮಾ ಕೌಲೀನಾದ್ ಅಸಿತನಯನೇ ಮಯ್ಯ್ ಅವಿಶ್ವಾಸಿನೀ ಭೂಃ।

ಸ್ನೇಹಾನ್ ಆಹುಃ ಕಿಮ್ ಅಪಿ ವಿರಹೇ ಧ್ವಂಸಿನಸ್ ತೇ ತ್ವ್ ಅಭೋಗಾದ್

ಇಷ್ಟೇ ವಸ್ತುನ್ಯ್ ಉಪಚಿತರಸಾಃ ಪ್ರೇಮರಾಶೀಭವನ್ತಿ॥೨.೫೨॥

ಆಶ್ವಾಸ್ಯೈವಂ ಪ್ರಥಮವಿರಹೋದಗ್ರಶೋಕಾಂ ಸಖೀಂ ತೇ

ಶೈಲಾದ್ ಆಶು ತ್ರಿನಯನವೃಷೋತ್ಖಾತಕೂಟಾನ್ ನಿವೃತ್ತಃ।

ಸಾಭಿಜ್ಞಾನಪ್ರಹಿತಕುಶಲೈಸ್ ತದ್ವಚೋಭಿರ್ ಮಮಾಪಿ

ಪ್ರಾತಃ ಕುನ್ದಪ್ರಸವಶಿಥಿಲಂ ಜೀವಿತಂ ಧಾರಯೇಥಾಃ॥೨.೫೩॥

ಕಚ್ಚಿತ್ ಸೌಮ್ಯ ವ್ಯವಸಿತಮ್ ಇದಂ ಬನ್ಧುಕೃತ್ಯಂ ತ್ವಯಾ ಮೇ

ಪ್ರತ್ಯಾದೇಶಾನ್ ನ ಖಲು ಭವತೋ ಧೀರತಾಂ ಕಲ್ಪಯಾಮಿ।

ನಿಃಶಬ್ದೋ ऽಪಿ ಪ್ರದಿಶಸಿ ಜಲಂ ಯಾಚಿತಶ್ ಚಾತಕೇಭ್ಯಃ

ಪ್ರತ್ಯುಕ್ತಂ ಹಿ ಪ್ರಣಯಿಷು ಸತಾಮ್ ಈಪ್ಸಿತಾರ್ಥಕ್ರಿಯೈವ॥೨.೫೪॥