দ্বিতীযোঽধ্যাযঃ সাংখ্যযোগঃ সংজয উবাচ তং তথা কৃপযাঽঽবিষ্টমশ্রুপূর্ণাকুলেক্ষণম্ । বিষীদন্তমিদং বাক্যমুবাচ মধুসূদনঃ ॥ভ.গী. ২.১॥ শ্রীভগবানুবাচ কুতস্ত্বা কশ্মলমিদং বিষমে সমুপস্থিতম্ । অনার্যজুষ্টমস্বর্গ্যমকীর্তিকরমর্জুন ॥ভ.গী. ২.২॥ ক্লৈব্যং মা স্ম গমঃ পার্থ নৈতত্ত্বয্যুপপদ্যতে । ক্ষুদ্রং হৃদযদৌর্বল্যং ত্যক্ত্বোত্তিষ্ঠ পরংতপ ॥ভ.গী. ২.৩॥ অর্জুন উবাচ কথং ভীষ্মমহং সংখ্যে দ্রোণং চ মধুসূদন । ইষুভিঃ প্রতিযোত্স্যামি পূজার্হাবরিসূদন ॥ভ.গী. ২.৪॥ গুরূনহত্বা হি মহানুভাবান্ শ্রেযো ভোক্তুং ভৈক্ষ্যমপীহ লোকে । হত্বার্থকামাংস্তু গুরূনিহৈব ভুঞ্জীয ভোগান্ রুধিরপ্রদিগ্ধান্ ॥ভ.গী. ২.৫॥ ন চৈতদ্বিদ্মঃ কতরন্নো গরীযো যদ্বা জযেম যদি বা নো জযেযুঃ । যানেব হত্বা ন জিজীবিষাম- স্তেঽবস্থিতাঃ প্রমুখে ধার্তরাষ্ট্রাঃ ॥ভ.গী. ২.৬॥ কার্পণ্যদোষোপহতস্বভাবঃ পৃচ্ছামি ত্বাং ধর্মসংমূঢচেতাঃ । যচ্ছ্রেযঃ স্যান্নিশ্চিতং ব্রূহি তন্মে শিষ্যস্তেঽহং শাধি মাং ত্বাং প্রপন্নম্ ॥ভ.গী. ২.৭॥ ন হি প্রপশ্যামি মমাপনুদ্যাদ্ যচ্ছোকমুচ্ছোষণমিন্দ্রিযাণাম্ । অবাপ্য ভূমাবসপত্নমৃদ্ধং রাজ্যং সুরাণামপি চাধিপত্যম্ ॥ভ.গী. ২.৮॥ সংজয উবাচ এবমুক্ত্বা হৃষীকেশং গুডাকেশঃ পরন্তপঃ । ন যোত্স্য ইতি গোবিন্দমুক্ত্বা তূষ্ণীং বভূব হ ॥ভ.গী. ২.৯॥ তমুবাচ হৃষীকেশঃ প্রহসন্নিব ভারত । সেনযোরুভযোর্মধ্যে বিষীদন্তমিদং বচঃ ॥ভ.গী. ২.১০॥ শ্রীভগবানুবাচ অশোচ্যানন্বশোচস্ত্বং প্রজ্ঞাবাদাংশ্চ ভাষসে । গতাসূনগতাসূংশ্চ নানুশোচন্তি পণ্ডিতাঃ ॥ভ.গী. ২.১১॥ ন ত্বেবাহং জাতু নাসং ন ত্বং নেমে জনাধিপাঃ । ন চৈব ন ভবিষ্যামঃ সর্বে বযমতঃ পরম্ ॥ভ.গী. ২.১২॥ দেহিনোঽস্মিন্ যথা দেহে কৌমারং যৌবনং জরা । তথা দেহান্তরপ্রাপ্তির্ধীরস্তত্র ন মুহ্যতে ॥ভ.গী. ২.১৩॥ মাত্রাস্পর্শাস্তু কৌন্তেয শীতোষ্ণসুখদুঃখদাঃ । আগমাপাযিনোঽনিত্যাস্তাংস্তিতিক্ষস্ব ভারত ॥ভ.গী. ২.১৪॥ যং হি ন ব্যথযন্ত্যেতে পুরুষং পুরুষর্ষভ । সমদুঃখসুখং ধীরং সোঽমৃতত্বায কল্পতে ॥ভ.গী. ২.১৫॥ নাসতো বিদ্যতে ভাবো নাভাবো বিদ্যতে সতঃ । উভযোরপি দৃষ্টোঽন্তস্ত্বনযোস্তত্ত্বদর্শিভিঃ ॥ভ.গী. ২.১৬॥ অবিনাশি তু তদ্বিদ্ধি যেন সর্বমিদং ততম্ । বিনাশমব্যযস্যাস্য ন কশ্চিত্কর্তুমর্হতি ॥ভ.গী. ২.১৭॥ অন্তবন্ত ইমে দেহা নিত্যস্যোক্তাঃ শরীরিণঃ । অনাশিনোঽপ্রমেযস্য তস্মাদ্যুধ্যস্ব ভারত ॥ভ.গী. ২.১৮॥ য এনং বেত্তি হন্তারং যশ্চৈনং মন্যতে হতম্ । উভৌ তৌ ন বিজানীতো নাযং হন্তি ন হন্যতে ॥ভ.গী. ২.১৯॥ ন জাযতে ম্রিযতে বা কদাচিন্ নাযং ভূত্বা ভবিতা বা ন ভূযঃ । অজো নিত্যঃ শাশ্বতোঽযং পুরাণো ন হন্যতে হন্যমানে শরীরে ॥ভ.গী. ২.২০॥ বেদাবিনাশিনং নিত্যং য এনমজমব্যযম্ । কথং স পুরুষঃ পার্থ কং ঘাতযতি হন্তি কম্ ॥ভ.গী. ২.২১॥ বাসাংসি জীর্ণানি যথা বিহায নবানি গৃহ্ণাতি নরোঽপরাণি । তথা শরীরাণি বিহায জীর্ণানি অন্যানি সংযাতি নবানি দেহী ॥ভ.গী. ২.২২॥ নৈনং ছিন্দন্তি শস্ত্রাণি নৈনং দহতি পাবকঃ । ন চৈনং ক্লেদযন্ত্যাপো ন শোষযতি মারুতঃ ॥ভ.গী. ২.২৩॥ অচ্ছেদ্যোঽযমদাহ্যোঽযমক্লেদ্যোঽশোষ্য এব চ । নিত্যঃ সর্বগতঃ স্থাণুরচলোঽযং সনাতনঃ ॥ভ.গী. ২.২৪॥ অব্যক্তোঽযমচিন্ত্যোঽযমবিকার্যোঽযম্ উচ্যতে । তস্মাদেবং বিদিত্বৈনং নানুশোচিতুমর্হসি ॥ভ.গী. ২.২৫॥ অথ চৈনং নিত্যজাতং নিত্যং বা মন্যসে মৃতম্ । তথাপি ত্বং মহাবাহো নৈবং শোচিতুমর্হসি ॥ভ.গী. ২.২৬॥ জাতস্য হি ধ্রুবো মৃত্যুর্ধ্রুবং জন্ম মৃতস্য চ । তস্মাদপরিহার্যেঽর্থে ন ত্বং শোচিতুমর্হসি ॥ভ.গী. ২.২৭॥ অব্যক্তাদীনি ভূতানি ব্যক্তমধ্যানি ভারত । অব্যক্তনিধনান্যেব তত্র কা পরিদেবনা ॥ভ.গী. ২.২৮॥ আশ্চর্যবত্পশ্যতি কশ্চিদেন- মাশ্চর্যবদ্বদতি তথৈব চান্যঃ । আশ্চর্যবচ্চৈনমন্যঃ শৃণোতি শ্রুত্বাপ্যেনং বেদ ন চৈব কশ্চিত্ ॥ভ.গী. ২.২৯॥ দেহী নিত্যমবধ্যোঽযং দেহে সর্বস্য ভারত । তস্মাত্সর্বাণি ভূতানি ন ত্বং শোচিতুমর্হসি ॥ভ.গী. ২.৩০॥ স্বধর্মমপি চাবেক্ষ্য ন বিকম্পিতুমর্হসি । ধর্ম্যাদ্ধি যুদ্ধাচ্ছ্রেযোঽন্যত্ ক্ষত্রিযস্য ন বিদ্যতে ॥ভ.গী. ২.৩১॥ যদৃচ্ছযা চোপপন্নং স্বর্গদ্বারমপাবৃতম্ । সুখিনঃ ক্ষত্রিযাঃ পার্থ লভন্তে যুদ্ধমীদৃশম্ ॥ভ.গী. ২.৩২॥ অথ চেত্ত্বমিমং ধর্ম্যং সংগ্রামং ন করিষ্যসি । ততঃ স্বধর্মং কীর্তিং চ হিত্বা পাপমবাপ্স্যসি ॥ভ.গী. ২.৩৩॥ অকীর্তিং চাপি ভূতানি কথযিষ্যন্তি তেঽব্যযাম্ । সংভাবিতস্য চাকীর্তির্মরণাদতিরিচ্যতে ॥ভ.গী. ২.৩৪॥ ভযাদ্রণাদুপরতং মংস্যন্তে ত্বাং মহারথাঃ । যেষাং চ ত্বং বহুমতো ভূত্বা যাস্যসি লাঘবম্ ॥ভ.গী. ২.৩৫॥ অবাচ্যবাদাংশ্চ বহূন্ বদিষ্যন্তি তবাহিতাঃ । নিন্দন্তস্তব সামর্থ্যং ততো দুঃখতরং নু কিম্ ॥ভ.গী. ২.৩৬॥ হতো বা প্রাপ্স্যসি স্বর্গং জিত্বা বা ভোক্ষ্যসে মহীম্ । তস্মাদুত্তিষ্ঠ কৌন্তেয যুদ্ধায কৃতনিশ্চযঃ ॥ভ.গী. ২.৩৭॥ সুখদুঃখে সমে কৃত্বা লাভালাভৌ জযাজযৌ । ততো যুদ্ধায যুজ্যস্ব নৈবং পাপমবাপ্স্যসি ॥ভ.গী. ২.৩৮॥ এষা তেঽভিহিতা সাংখ্যে বুদ্ধির্যোগে ত্বিমাং শৃণু । বুদ্ধ্যা যুক্তো যযা পার্থ কর্মবন্ধং প্রহাস্যসি ॥ভ.গী. ২.৩৯॥ নেহাভিক্রমনাশোঽস্তি প্রত্যবাযো ন বিদ্যতে । স্বল্পমপ্যস্য ধর্মস্য ত্রাযতে মহতো ভযাত্ ॥ভ.গী. ২.৪০॥ ব্যবসাযাত্মিকা বুদ্ধিরেকেহ কুরুনন্দন । বহুশাখা হ্যনন্তাশ্চ বুদ্ধযোঽব্যবসাযিনাম্ ॥ভ.গী. ২.৪১॥ যামিমাং পুষ্পিতাং বাচং প্রবদন্ত্যবিপশ্চিতঃ । বেদবাদরতাঃ পার্থ নান্যদস্তীতি বাদিনঃ ॥ভ.গী. ২.৪২॥ কামাত্মানঃ স্বর্গপরা জন্মকর্মফলপ্রদাম্ । ক্রিযাবিশেষবহুলাং ভোগৈশ্বর্যগতিং প্রতি ॥ভ.গী. ২.৪৩॥ ভোগৈশ্বর্যপ্রসক্তানাং তযাপহৃতচেতসাম্ । ব্যবসাযাত্মিকা বুদ্ধিঃ সমাধৌ ন বিধীযতে ॥ভ.গী. ২.৪৪॥ ত্রৈগুণ্যবিষযা বেদা নিস্ত্রৈগুণ্যো ভবার্জুন । নির্দ্বন্দ্বো নিত্যসত্ত্বস্থো নির্যোগক্ষেম আত্মবান্ ॥ভ.গী. ২.৪৫॥ যাবানর্থ উদপানে সর্বতঃ সংপ্লুতোদকে । তাবান্ সর্বেষু বেদেষু ব্রাহ্মণস্য বিজানতঃ ॥ভ.গী. ২.৪৬॥ কর্মণ্যেবাধিকারস্তে মা ফলেষু কদাচন । মা কর্মফলহেতুর্ভূর্মা তে সঙ্গোঽস্ত্বকর্মণি ॥ভ.গী. ২.৪৭॥ যোগস্থঃ কুরু কর্মাণি সঙ্গং ত্যক্ত্বা ধনংজয । সিদ্ধ্যসিদ্ধ্যোঃ সমো ভূত্বা সমত্বং যোগ উচ্যতে ॥ভ.গী. ২.৪৮॥ দূরেণ হ্যবরং কর্ম বুদ্ধিযোগাদ্ধনঞ্জয । বুদ্ধৌ শরণমন্বিচ্ছ কৃপণাঃ ফলহেতবঃ ॥ভ.গী. ২.৪৯॥ বুদ্ধিযুক্তো জহাতীহ উভে সুকৃতদুষ্কৃতে । তস্মাদ্যোগায যুজ্যস্ব যোগঃ কর্মসু কৌশলম্ ॥ভ.গী. ২.৫০॥ কর্মজং বুদ্ধিযুক্তা হি ফলং ত্যক্ত্বা মনীষিণঃ । জন্মবন্ধবিনির্মুক্তাঃ পদং গচ্ছন্ত্যনামযম্ ॥ভ.গী. ২.৫১॥ যদা তে মোহকলিলং বুদ্ধির্ব্যতিতরিষ্যতি । তদা গন্তাসি নির্বেদং শ্রোতব্যস্য শ্রুতস্য চ ॥ভ.গী. ২.৫২॥ শ্রুতিবিপ্রতিপন্না তে যদা স্থাস্যতি নিশ্চলা । সমাধাবচলা বুদ্ধিস্তদা যোগমবাপ্স্যসি ॥ভ.গী. ২.৫৩॥ অর্জুন উবাচ স্থিতপ্রজ্ঞস্য কা ভাষা সমাধিস্থস্য কেশব । স্থিতধীঃ কিং প্রভাষেত কিমাসীত ব্রজেত কিম্ ॥ভ.গী. ২.৫৪॥ শ্রীভগবানুবাচ প্রজহাতি যদা কামান্ সর্বান্ পার্থ মনোগতান্ । আত্মন্যেবাত্মনা তুষ্টঃ স্থিতপ্রজ্ঞস্তদোচ্যতে ॥ভ.গী. ২.৫৫॥ দুঃখেষ্বনুদ্বিগ্নমনাঃ সুখেষু বিগতস্পৃহঃ । বীতরাগভযক্রোধঃ স্থিতধীর্মুনিরুচ্যতে ॥ভ.গী. ২.৫৬॥ যঃ সর্বত্রানভিস্নেহস্তত্তত্প্রাপ্য শুভাশুভম্ । নাভিনন্দতি ন দ্বেষ্টি তস্য প্রজ্ঞা প্রতিষ্ঠিতা ॥ভ.গী. ২.৫৭॥ যদা সংহরতে চাযং কূর্মোঽঙ্গানীব সর্বশঃ । ইন্দ্রিযাণীন্দ্রিযার্থেভ্যস্তস্য প্রজ্ঞা প্রতিষ্ঠিতা ॥ভ.গী. ২.৫৮॥ বিষযা বিনিবর্তন্তে নিরাহারস্য দেহিনঃ । রসবর্জং রসোঽপ্যস্য পরং দৃষ্ট্বা নিবর্ততে ॥ভ.গী. ২.৫৯॥ যততো হ্যপি কৌন্তেয পুরুষস্য বিপশ্চিতঃ । ইন্দ্রিযাণি প্রমাথীনি হরন্তি প্রসভং মনঃ ॥ভ.গী. ২.৬০॥ তানি সর্বাণি সংযম্য যুক্ত আসীত মত্পরঃ । বশে হি যস্যেন্দ্রিযাণি তস্য প্রজ্ঞা প্রতিষ্ঠিতা ॥ভ.গী. ২.৬১॥ ধ্যাযতো বিষযান্ পুংসঃ সঙ্গস্তেষূপজাযতে । সঙ্গাত্সঞ্জাযতে কামঃ কামাত্ক্রোধোঽভিজাযতে ॥ভ.গী. ২.৬২॥ ক্রোধাদ্ভবতি সংমোহঃ সংমোহাত্স্মৃতিবিভ্রমঃ । স্মৃতিভ্রংশাদ্বুদ্ধিনাশো বুদ্ধিনাশাত্প্রণশ্যতি ॥ভ.গী. ২.৬৩॥ রাগদ্বেষবিযুক্তৈস্তু বিষযানিন্দ্রিযৈশ্চরন্ । আত্মবশ্যৈর্বিধেযাত্মা প্রসাদমধিগচ্ছতি ॥ভ.গী. ২.৬৪॥ প্রসাদে সর্বদুঃখানাং হানিরস্যোপজাযতে । প্রসন্নচেতসো হ্যাশু বুদ্ধিঃ পর্যবতিষ্ঠতে ॥ভ.গী. ২.৬৫॥ নাস্তি বুদ্ধিরযুক্তস্য ন চাযুক্তস্য ভাবনা । ন চাভাবযতঃ শান্তিরশান্তস্য কুতঃ সুখম্ ॥ভ.গী. ২.৬৬॥ ইন্দ্রিযাণাং হি চরতাং যন্মনোঽনুবিধীযতে । তদস্য হরতি প্রজ্ঞাং বাযুর্নাবমিবাম্ভসি ॥ভ.গী. ২.৬৭॥ তস্মাদ্যস্য মহাবাহো নিগৃহীতানি সর্বশঃ । ইন্দ্রিযাণীন্দ্রিযার্থেভ্যস্তস্য প্রজ্ঞা প্রতিষ্ঠিতা ॥ভ.গী. ২.৬৮॥ যা নিশা সর্বভূতানাং তস্যাং জাগর্তি সংযমী । যস্যাং জাগ্রতি ভূতানি সা নিশা পশ্যতো মুনেঃ ॥ভ.গী. ২.৬৯॥ আপূর্যমাণমচলপ্রতিষ্ঠং সমুদ্রমাপঃ প্রবিশন্তি যদ্বত্ । তদ্বত্কামা যং প্রবিশন্তি সর্বে স শান্তিমাপ্নোতি ন কামকামী ॥ভ.গী. ২.৭০॥ বিহায কামান্ যঃ সর্বান্ পুমাংশ্চরতি নিঃস্পৃহঃ । নির্মমো নিরহংকারঃ স শান্তিমধিগচ্ছতি ॥ভ.গী. ২.৭১॥ এষা ব্রাহ্মী স্থিতিঃ পার্থ নৈনাং প্রাপ্য বিমুহ্যতি । স্থিত্বাস্যামন্তকালেঽপি ব্রহ্মনির্বাণমৃচ্ছতি ॥ভ.গী. ২.৭২॥